ന്യൂദല്ഹി: ഒറ്റവര്ഷം കൊണ്ട് കേന്ദ്രത്തിലെ നരേന്ദ്ര മോദി സര്ക്കാര് ലഭ്യമാക്കിയത് 2.05 ലക്ഷം തൊഴിലവസരങ്ങള്. 2015ല് ലോകത്ത് ഏറ്റവും കൂടുതല് തൊഴിലവസരങ്ങള് ഉണ്ടാക്കിയ രാജ്യവും ഭാരതമാണ്. മോദി സര്ക്കാരിന്റെ വിപ്ലവകരമായ ആസൂത്രണ പദ്ധതിയായ മെയ്ക് ഇന് ഇന്ത്യ പദ്ധതിയാണ് ഈ തൊഴില് കുതിപ്പിനു വഴിതെളിച്ചത്. അതോടൊപ്പം വിദേശ നിക്ഷേപത്തിന്റെ മേഖലയില് ഭാരതം ചൈനയെയും പിന്നിലാക്കി.
മോദി സര്ക്കാരും നയങ്ങളും നടപടികളും ഭാരതത്തില് വലിയ മാറ്റങ്ങള് സൃഷ്ടിക്കുന്നതായി ഫിനാന്ഷ്യല് ടൈംസ് പത്രമാണ് വിലയിരുത്തുന്നത്. മെയ്ക് ഇന് പദ്ധതി വഴി രാജ്യത്ത് കൂടുതല് തൊഴിലവസരങ്ങള് സൃഷ്ടിക്കാനായി, വിദേശ നിക്ഷേപത്തില് ചൈനയെ പിന്തള്ളാനും നമുക്ക് കഴിഞ്ഞു, ഫിനാന്ഷ്യല് ടൈംസിന്റെ വിദേശനിക്ഷേപ ഇന്റലിജന്സ് പറയുന്നു.
നേരിട്ടുള്ള വിദേശ നിക്ഷേപക്കാര്യത്തില് കഴിഞ്ഞ വര്ഷം ഭാരതം ചൈനയെ പിന്തള്ളി. 2015ല് മാത്രം 6300 കോടി ഡോളറാണ് വിവിധ രാജ്യങ്ങള് ഭാരതത്തില് നിക്ഷേപിച്ചത്. കഴിഞ്ഞ വര്ഷം ലോകത്ത് തൊഴിലവസരം ഏറ്റവും കൂടിയതും ഭാരതത്തിലാണ്, റിപ്പോര്ട്ടില് പറയുന്നു.
കഴിഞ്ഞ ഒരു വര്ഷത്തിനുള്ളില് ലോകത്ത് ഏറ്റവും കൂടുതല് വിദേശ നിക്ഷേപം നടന്നിട്ടുള്ളത് ഭാരതത്തിലാണ്. അമേരിക്കയില് 5960 കോടി ഡോളറിന്റേയും ചൈനയില് 5660 കോടി ഡോളറിന്റേയും വിദേശ നിക്ഷേപമാണ് ലഭിച്ചത്. എണ്ണ, പ്രകൃതി വാതകം, പാരമ്പര്യേതര ഊര്ജ മേഖല എന്നീ മേഖലകളിലാണ് ഭാരതം ചൈനയെക്കാള് മുന്നേറിയത്. ഇതാദ്യമായാണ് ഭാരതം ചൈനയേയും അമേരിക്കയേയും പിന്തള്ളുന്നത്.
പദ്ധതികളുടെ കാര്യത്തിലും വര്ദ്ധനയുണ്ട്. 697 പദ്ധതികളാണ് കൂടിയത്; എട്ടു ശതമാനം വര്ധന. പ്രമുഖ കമ്പനികളായ ഫോക്സ്കോണ്, സണ് എഡിസണ് എന്നീ കമ്പനികള് അഞ്ചു ദശലക്ഷം ഡോളറും, നാലു ദശലക്ഷം ഡോളറും വീതം ഭാരതത്തില് വിദേശ നിക്ഷേപം നടത്താമെന്നും 2015ല് ഉറപ്പ് നല്കിയിരുന്നു.
ഭാരതത്തില് ഏറ്റവും കൂടുതല് വിദേശനിക്ഷേപം നടന്നിട്ടുള്ള സംസ്ഥാനം ഗുജറാത്താണ്. കഴിഞ്ഞ വര്ഷം 12.4 ദശലക്ഷം ഡോളര് വിദേശ നിക്ഷേപമാണ് ഗുജറാത്ത് നേടിയെടുത്തത്. മഹാരാഷ്ട്രയാണ് രണ്ടാം സ്ഥാനത്ത് 2015ല് 8.3 ദശലക്ഷം ഡോളര്.
