ഇരിട്ടി: കൊട്ടിയൂര്‍ വൈശാഖ മഹോത്സവത്തിന്റെ പ്രാരംഭ ചടങ്ങുകളില്‍ ഒന്നായ പ്രക്കൂഴം നാളെ ഇക്കരെ കൊട്ടിയൂര്‍ മഹാദേവ ക്ഷേത്രത്തില്‍ നടക്കും. ഇതോടനുബന്ധിച്ച് നടക്കുന്ന അവലളവിനുള്ള അവല്‍ പാല നരഹരി നരസിംഹ മൂര്‍ത്തി ക്ഷേത്രത്തില്‍ തയ്യാറായി. 18 സേര്‍ നെല്ലാണ് അവില്‍ തയ്യാറാക്കാനായി ഉപയോഗിക്കുന്നത്. കഴിഞ്ഞ 25 വര്‍ഷമായി പാല നരഹരി നരസിംഹ മൂര്‍ത്തി ക്ഷേത്രത്തില്‍ നിന്നുമാണ് അവല്‍ തയ്യാറാക്കി കൊട്ടിയൂര്‍ മഹാദേവ ക്ഷേത്രത്തില്‍ എത്തിക്കുന്നത്. ഇതിനായി പ്രത്യേകം വ്രതമെടുത്ത പ്രായമായ സ്ത്രീകള്‍ പരമ്പരാഗതമായ രീതിയില്‍ ഉരലും ഉലക്കയും കൊണ്ട് ഇടിച്ചാണ് അവല്‍ തയ്യാറാക്കുന്നത്. 11 അമ്മമാരാണ് ഇക്കുറി ഈ കര്‍മ്മത്തില്‍ ഏര്‍പ്പെട്ടത്. 18 സേര്‍ നെല്ല് പ്രത്യേക മണ്‍ കലത്തില്‍ കഴുകി വൃത്തിയാക്കി ഉണക്കി എടുത്ത ശേഷമാണു ഇത് ഉരലും ഉലക്കയും ഉപയോഗിച്ച് ഇടിച്ചു അവലാക്കി മാറ്റുന്നത്. ഇന്ന് വൈകുന്നേരം 4 മണിയോടെ എം. പ്രഭാകരന്റെ നേതൃത്വത്തിലുള്ള സംഘം അവലുമായി ക്ഷേത്രത്തിലേക്ക് പുറപ്പെടും.
പാല നരഹരി നരസിംഹ മൂര്‍ത്തി ക്ഷേത്രത്തില്‍ വ്രതം നോറ്റ അമ്മമാര്‍ അവില്‍ തയ്യാറാക്കുന്നു
