ചിന്മയ മിഷന് ഭഗവദ് ഗീതാജ്ഞാനസത്രത്തിന് സ്വാമി മിത്രാനന്ദയും വിശിഷ്ടവ്യക്തികളും ഭദ്രദീപ പ്രകാശനം നിര്വ്വഹിക്കുന്നു.
ആലപ്പുഴ: ദ്രവ്യങ്ങള് കൊണ്ടുള്ള പൂജയേക്കാള് മനസുകൊണ്ടുള്ള പൂജയ്ക്കാണ് പ്രാധാന്യമെന്നും ഗീത ഉദ്ഘോഷിക്കുന്നതും മാനസപൂജയാണെന്നും സ്വാമി മിത്രാനന്ദ. ചിന്മയ ജന്മശതാബ്ദി ഭഗവദ്ഗീതാ ജ്ഞാനസത്രം ഉദ്ഘാടനം ചെയ്യുകയായിരുന്നു അദ്ദേഹം. വിദ്യാഭ്യാസ പാഠ്യവിഷയങ്ങളില് ഗീതാപഠനം നിര്ബ്ബന്ധമാക്കണം. ഇന്നത്തെ യുവതലമുറ കുരുക്ഷേത്ര ഭൂമിയിലെ തളര്ന്നുനില്ക്കുന്ന അര്ജ്ജുനന് സമാനമാണ്. ഗീതാപഠനം വിദ്യാര്ത്ഥികള് പ്രാവര്ത്തികമാക്കിയാല് കര്മ്മശേഷി വര്ദ്ധിപ്പിച്ച് വിജയശ്രീലാളിതനായ അര്ജ്ജുനനിലേക്ക് എത്തിച്ചേരുമെന്നും അദ്ദേഹം അഭിപ്രായപ്പെട്ടു.
മെട്രോ നഗരങ്ങളിലെ യുവാക്കള് ആത്മഹത്യയ്ക്ക് വിധേയരാകുന്നു. കര്മ്മശേഷി ഉണര്ത്തി ജീവിത പാത കാട്ടിക്കൊടുക്കാന് നല്ല ഗുരുക്കന്മാരില്ലാതാകുന്നു. ഈ സാഹചര്യത്തിലാണ് പാഠ്യവിഷയമായി ഗീത ഉള്പ്പെടുത്തുന്നതിന്റെ പ്രാധാന്യം നമ്മള് മനസിലാക്കേണ്ടതെന്നും അദ്ദേഹം കൂട്ടിച്ചേര്ത്തു.
ചിന്മയ മിഷന് വര്ക്കിങ് ചെയര്മാന് സി. നാഗപ്പന് അദ്ധ്യക്ഷത വഹിച്ചു. നഗരസഭാ ചെയര്മാന് തോമസ് ജോസഫ്, ജയകൃഷ്ണസ്വാമി, സുരേഷ് മോഹന്, രഘുനന്ദന്, അഡ്വ. മനോജ്കുമാര്, ഡോ. കെ. നാരായണന് എന്നിവര് ആശംസയര്പ്പിച്ചു.
വൈകിട്ട് 3.30ന് മുല്ലയ്ക്കല് ക്ഷേത്ര പരിസരത്തുനിന്നാരംഭിച്ച ഘോഷയാത്ര നാലിന് യജ്ഞവേദിയില് എത്തി. തുടര്ന്ന് വ്യത്യസ്ത മേഖലകളില് നിന്നുള്ള പതിനെട്ടു വ്യക്തികള് ചേര്ന്നാണ് യത്രവേദിയില് ദീപപ്രോജ്വലനം നടത്തിയത്.
