ഇടുക്കി: വെള്ളത്തൂവല് പോലീസ് സ്റ്റേഷന് പരിധിയായ ചിത്തിരപുരത്ത് കെഎസ്ഇബി ഗേറ്റ് സ്ഥാപിക്കാന് നിര്മ്മിച്ച തൂണുകള് ക്രൈസ്തവ പുരോഹിതന്റെ നേതൃത്വത്തിലുള്ള സംഘം തകര്ത്തു. ചിത്തിരപുരം സെന്റ് ആനീസ് പള്ളി വികാരി ജോവാക്യം കുഞ്ഞുമോന്റെ നേതൃത്വത്തിലുള്ള ഇരുപതംഗ സംഘമാണ് സര്ക്കാരിന്റെ ഉടമസ്ഥതയിലുള്ള ഭൂമിയിലെ കോണ്ക്രീറ്റ് തൂണുകള് നശിപ്പിച്ചത്. പള്ളിവാസല് ജലവൈദ്യുതപദ്ധതിയുടെ ഭാഗമായുള്ള ഈ പ്രദേശത്ത് ഗേറ്റ് സ്ഥാപിക്കാനായി നിര്മ്മിച്ച തൂണാണ് പള്ളിഭാരവാഹികളെ കൂട്ടി പുരോഹിതന് തകര്ത്തത്. കെഎസ്ഇബി അധികൃതര് പരാതി നല്കിയതോടെ പുരോഹിതനെയുംകൂട്ടരെയും രക്ഷപെടുത്തുന്നതിന് വെള്ളത്തൂവല് പോലീസ് ശ്രമിച്ചു. ആദ്യം കേസ് എടുക്കാന് പോലീസ് തയ്യാറായില്ല. പിന്നീട് ഉന്നത പോലീസ് ഉദ്യോഗസ്ഥന് കേസെടുക്കാന് നിര്ദ്ദേശിച്ചപ്പോഴാണ് നിയമ ലംഘനം നടത്തിയ പുരോഹിതനും കണ്ടാലറിയാവുന്ന മറ്റ് ഇരുപത് പേര്ക്കുമെതിരെ പേരിനൊരു കേസെടുക്കാന് തയ്യാറായത്. 341, 427 എന്നീ വകുപ്പുകള് പ്രകാരമാണ് ക്രൈം നമ്പര് 199 പ്രകാരം കേസെടുത്തത്.
ഈ കേസില് സ്റ്റേഷന് ജാമ്യം ലഭിക്കുകയും ചെയ്യും. സര്ക്കാര് മുതല് നശിപ്പിച്ചതിന് പി.ഡി.പി.പി ആക്ട് പ്രകാരം ജാമ്യമില്ലാവകുപ്പാണ് പുരോഹിതനും കൂട്ടര്ക്കുമെതിരെ ചുമത്തേണ്ടത്. ഇങ്ങനെ വന്നാല് പുരോഹിതനെ അറസ്റ്റ് ചെയ്ത് ജയിലിലടയ്ക്കേണ്ടിവരും. നിസ്സാരവകുപ്പ് ചുമത്തി കേസെടുത്ത സംഭവത്തില് പോലീസിനെതിരെ വ്യാപക ആക്ഷേപം നിലനില്ക്കുകയാണ്. ഹൈന്ദവ സംഘടനകള് പോലീസിന്റെ നിയമ ലംഘനത്തിനെതിരെ കോടതിയെ സമീപിക്കാനൊരുങ്ങുകയാണ്. പുരോഹതന്റെ നേതൃത്വത്തില് നടത്തിയ നശീകരണ പ്രവര്ത്തനത്തില് 81000 രൂപ കെഎസ്ഇബിക്ക് നഷ്ടം സംഭവിച്ചതായി പരാതിയില് പറയുന്നു.
