കട്ടപ്പന: ഡ്രൈവര്‍ തസ്തികകളില്‍ നിയമനം നടത്തണമെന്ന കോടതിവിധി (സംസ്ഥാന അഡ്മിനിസ്‌ട്രേറ്റീവ്‌ട്രൈബ്യൂണല്‍) നടപ്പാക്കാത്ത ഇടുക്കി ജില്ലാ പഞ്ചായത്ത് ഡെപ്യൂട്ടി ഡയറക്ടര്‍ക്കെതിരെ ഉദ്യോഗാര്‍ഥികള്‍ വീണ്ടും കോടതിയിലേയ്‌ക്ക്. ജില്ലയിലെ വിവിധ വകുപ്പുകളിലേയ്‌ക്കുള്ള ഡ്രൈവര്‍ ഗ്രേഡ്‌രണ്ട് എല്‍.ഡി.വി തസ്തികയില്‍ 2011 ഫെബ്രുവരി രണ്ടിന് പ്രസിദ്ധീകരിച്ച റാങ്ക് ലിസ്റ്റിലുള്ള ഉദ്യോഗാര്‍ഥികളാണ് കോടതിയെ സമീപിക്കുന്നത്. പി.എസ്.സി. റാങ്ക് ലിസ്റ്റ് പുറത്തുവന്നശേഷം വിവിധ വകുപ്പുകളിലായി 245 ഒഴിവുകള്‍ ഉണ്ടായിട്ടും രണ്ടുവര്‍ഷത്തോളം ഒരെണ്ണംപോലും റിപ്പോര്‍ട്ടു ചെയ്യാന്‍ വകുപ്പു മേധാവികള്‍ തയാറായില്ല. റാങ്ക് ഹോള്‍ഡര്‍മാര്‍ മുഖ്യമന്ത്രി അടക്കമുള്ളവര്‍ക്ക് നല്‍കിയ പരാതി മാധ്യമങ്ങള്‍ റിപ്പോര്‍ട്ടു ചെയ്തതോടെ 135 ഒഴിവുകള്‍ റിപ്പോര്‍ട്ടു ചെയ്യുകയും പി.എസ്.സി. നിയമനം നല്‍കുകയും ചെയ്തു. എന്നാല്‍ പിന്നീട് ഒരു നടപടിയും ഉണ്ടായില്ല. തുടര്‍ന്നാണ് എല്ലാ വകുപ്പുകളിലേയും ഒഴിവുകളുടെ എണ്ണവും വിശദാംശങ്ങളും വിവരാവകാശ നിയമപ്രകാരം ശേഖരിച്ച് ഉദ്യോഗാര്‍ഥികള്‍ കോടതിയെ സമീപിച്ചത്. 2015 സെപ്തംബര്‍ 29 ലെ കോടതി ഉത്തരവു പ്രകാരം 15 ഒഴിവുകള്‍ പഞ്ചായത്ത് ഡെപ്യൂട്ടി ഡയറക്ടര്‍ പി.എസ്.സിക്ക് റിപ്പോര്‍ട്ടു ചെയ്യുകയും ചെയ്തു. ഉടന്‍ നിയമനം കിട്ടുമെന്ന പ്രതീക്ഷയില്‍ ഉദ്യോഗാര്‍ഥികള്‍ പി.എസ്.സിയെ സമീപിച്ചപ്പോഴാണ് പെര്‍ഫോമ (തസ്തികയുടെ വിശദാംശം) ഇല്ലാതെയാണ് റിപ്പോര്‍ട്ടു ചെയ്തതെന്ന് അറിയുന്നത്. പി.എസ്.സി ആവശ്യപ്പെട്ടിട്ടും പെര്‍ഫോമ നല്‍കിയില്ല. ഇതുസംബന്ധിച്ച കോടതിയുടെ ചോദ്യത്തിന് ഒഴിവുകള്‍ ഇല്ലെന്ന സത്യവാങ്മൂലം നല്‍കി ഡെപ്യൂട്ടി ഡയറക്ടര്‍ കോടതിയെ തെറ്റിദ്ധരിപ്പിച്ചതായും റാങ്ക് ഹോള്‍ഡര്‍മാര്‍ ആരോപിക്കുന്നു. കോടതി ഉത്തരവ് ലംഘിച്ച ഡി.ഡി.പിക്കെതിരെ വീണ്ടും കോടതിയെ സമീപിക്കുമെന്ന് കെ.പി. സത്യന്‍, പി.എം. ബൈജു എന്നിവര്‍ അറിയിച്ചു.
ഡ്രൈവര്‍ തസ്തികകളില്‍ നിയമനം നടത്തുന്നില്ല; ഉദ്യോഗാര്‍ത്ഥികള്‍ കോടതിയിലേക്ക്
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.