തിരുവനന്തപുരം: ഊരാളുങ്കല് സൊസൈറ്റിക്ക് പൊതുമരാമത്ത് സെക്രട്ടറി ടെണ്ടറില്ലാതെ 977.7 കോടി രൂപയ്ക്ക് നല്കിയ അഞ്ച് പ്രവൃത്തിക്കളും 100 കോടിരൂപ കുറച്ച് ഏറ്റെടുക്കാന് കേരളാ കരാറുകാര് തയ്യാറാണെന്ന് വ്യക്തമാക്കുന്ന സത്യവാങ്മൂലം 5ന് ഹൈക്കോടതിയില് സമര്പ്പിക്കുമെന്ന് കേരള ഗവണ്മെന്റ് കോണ്ട്രാക്ടേഴ്സ് സംയുക്തസമിതി ഭാരവാഹികള് വാര്ത്താസമ്മേളനത്തില് അറിയിച്ചു.
പൊതുമരാമത്ത് സെക്രട്ടറിയുടെ 2016 ഫെബ്രുവരി 20 ലെ ഉത്തരവില് 450 കോടി രൂപ അടങ്കല് വരുന്ന നാടുകാണി-വഴിക്കടവ്-നിലമ്പൂര്-എടവണ്ണ-മഞ്ചേരി-മലപ്പറം-വേങ്ങര-തിരൂരങ്ങാട്-പരപ്പനങ്ങാടി റോഡ്, വലിയഴീക്കല് പാലം – 146.50കോടി, രാമനാട്ടുകാര മേല്പ്പാലം- 85കോടി, തോണ്ടയോട് മേല്പ്പാലം- 59 കോടി, ഹില് ഹൈവേ- ചെറുപുഴ- പയ്യാവൂര്- ഉളിക്കല്- വെള്ളിത്തോട് റോഡ്- 237.20 കോടി എന്നിവയുടെ 977.7 കോടി രൂപ ആകെ അടങ്കല് വരുന്ന അഞ്ച് പ്രവൃത്തികളാണ് ടെണ്ടര് കൂടാതെ ഊരാളുങ്കല് സൊസൈറ്റിക്ക് നല്കിയത്.
ഈ ഉത്തരവ് റദ്ദാക്കണമെന്നാവശ്യപ്പെട്ട് കേരളാ ഗവണ്മെന്റ് കോണ്ട്രാക്ടേഴ്സ് അസോസിയേഷന് സമര്പ്പിച്ച റിട്ട് ഹര്ജി ഫയലില് സ്വീകരിച്ച ഹൈക്കോടതി ഏപ്രില് 23വരെ തത്സ്ഥിതി തുടരാന് നിര്ദ്ദേശിച്ചു. 5ന് വീണ്ടും ഹര്ജി പരിഗണിക്കാനിരിക്കെയാണ് പുതിയ സത്യവാങ്മൂലം സമര്പ്പിക്കുക.
അഞ്ച് പണികളും അടങ്കലിനനുസരിച്ച് സുതാര്യമായി പൂര്ത്തിയാക്കുമെന്നും അഞ്ചുശതമാനം ജാമ്യസംഖ്യയായി കെട്ടിവയ്ക്കാമെന്നും മെഷിനറികളുടെ ലഭ്യത ഉറപ്പാക്കുന്ന സര്ട്ടിഫിക്കറ്റുകള് ഹാജരാക്കാമെന്നും ഹൈക്കോടതിക്ക് ഉറപ്പുനല്കും. പണികള് ചെയ്യുന്ന കരാറുകാരുടെ യോഗ്യത ഹൈക്കോടതി നിര്ദ്ദേശിക്കുന്ന കമ്മിഷനെ ബോധ്യപ്പെടുത്താമെന്നും സത്യവാങ്മൂലത്തില് പറയും.
അഞ്ച് ലക്ഷത്തിന് മുകളില് വരുന്ന എല്ലാ പ്രവൃത്തികളും ഇ-ടെണ്ടര് ചെയ്യണമെന്നും മത്സര സ്വഭാവം ഉറപ്പുവരുത്താന് ഒന്നിലധികം ടെണ്ടറുകള് ഇല്ലെങ്കില് വീണ്ടും ടെണ്ടര് ചെയ്യണമെന്നും പൊതുമരാമത്ത് മാന്വലില് വ്യവസ്ഥയുള്ളപ്പോള്, സര്ക്കാര് പ്രത്യേക ഉത്തരവുകളിലൂടെ ആയിരക്കണക്കിന് കോടി രൂപയുടെ പണികള് നിക്ഷിപ്ത താത്പര്യക്കാര്ക്ക് നേരിട്ട് നല്കുന്നത് അഴിമതിയാണ്. പത്തുശതമാനം കൈക്കൂലി കൊടുത്താല് കരാറുകള് ഇടനില ഏജന്സികള് മുഖേന ആര്ക്കും കരസ്ഥമാക്കാവുന്ന സ്ഥിതിയാണ് കേരളത്തിലുള്ളത്.
അക്രഡിറ്റഡ് ഏജന്സികള്ക്ക് ടെണ്ടറില്ലാത്തെ പണികള് നേരിട്ട് നല്കുന്ന ഉത്തരവുകള് പിന്വലിക്കുക, പൊതുമരാമത്ത്- ജലവിഭവ വകുപ്പുകളുടെ നടപടിക്രമങ്ങള് ലഘൂകരിച്ചും കുടിശ്ശിക ഇല്ലാതാക്കിയും നിലനിര്ത്തുക, പണികള് വന് പാക്കേജുകളായി ടെണ്ടര് ചെയ്ത് ചെറുകിട-ഇടത്തരം കരാറുകാരെ ഒഴിവാക്കുന്നത് അവസാനിപ്പിക്കുക, കോമ്പസിറ്റ് ടെണ്ടറുകള് ഉപേക്ഷിക്കുക തുടങ്ങിയ ആവശ്യങ്ങള് ഉന്നയിച്ച് 18 മുതല് മേയ് 10 വരെ സംസ്ഥാനത്തെ എല്ലാ നിയോജക മണ്ഡലങ്ങളിലും വാഹന പ്രചാരണ ജാഥകളും പൊതുസമ്മേളനങ്ങളും സംഘടിപ്പിക്കും.
വാര്ത്താസമ്മേളനത്തില് കെജിസിഎ സംസ്ഥാന പ്രസിഡന്റ് വര്ഗ്ഗീസ് കണ്ണംപള്ളി, എജിഇസിഎ സംസ്ഥാന പ്രസിഡന്റ് പി. വേലപ്പന്നായര്, സമരസമിതി ചെയര്മാന് കെ. അനില്കുമാര്, കണ്വീനര് ആര്. രാജശേഖരന്നായര്, അഷറഫ് കടവിളാകം, ആര്. വിശ്വനാഥന്, ജഗദ്നാഥന്, കെ. സുരേഷ്, ഇ.എ. വഹാവ് എന്നിവര് പങ്കെടുത്തു.
