അടിമാലി: ഏഴുപതിറ്റാണ്ട് മുന്പ് നിര്മ്മിച്ച കമ്പിളികണ്ടം- കുരിശുകുത്തി- ഇഞ്ചത്തൊട്ടി റോഡ് ഗതാഗത യോഗ്യമാക്കാത്തതില് പ്രതിഷേധിച്ച് ജനകീയ കമ്മിറ്റിയുടെ നേതൃത്വത്തില് പ്രദേശവാസികള് ഇന്ന് ഉപരോധ സമരം നടത്തും. രാവിലെ 11-ന് കമ്പിളികണ്ടം ജങ്ഷനിലാണ് റോഡ് ഉപരോധ സമരം സംഘടിപ്പിച്ചിട്ടുള്ളത്. വരുന്ന തെരഞ്ഞെടുപ്പില് ഒരു രാഷ്ട്രീയ പാര്ട്ടികള്ക്കും വോട്ടു ചെയ്യാതെ വിട്ടു നില്ക്കുക, ആയിരക്കണക്കിന് ആളുകള് താമസിക്കുന്ന കുരിശുകുത്തി മേഖലയില് തെരഞ്ഞെടുപ്പു സംബന്ധിച്ചുള്ള ഫ്ളെക്സ് ബോര്ഡുകള് സ്ഥാപിക്കാന് അനുവദിക്കാതിരിക്കുക തുടങ്ങിയ സമര മാര്ഗങ്ങളും സ്വീകരിച്ചിട്ടുണ്ടെന്ന് ജനകീയ കമ്മിറ്റി ഭാരവാഹികളായ രമണിയമ്മ ജി. പിള്ള, രവി കണ്ടറുമറ്റത്തില് തുടങ്ങിയവര് അറിയിച്ചു. പതിറ്റാണ്ടുകള് നീണ്ട നിവേദനങ്ങള്ക്കും പരാതികള്ക്കും ഒടുവില് 2012-ല് ഇടുക്കി പാക്കേജില് ഉള്പ്പെടുത്തി രണ്ടു കോടി തൊണ്ണൂറു ലക്ഷം രൂപ അനുവദിച്ചതായി പ്രദേശവാസികളെ നേതാക്കള് ധരിപ്പിച്ചിരുന്നു. 3.8 കിലോമീറ്റര് റോഡിന്റെ നിര്മ്മാണം പൂര്ത്തിയാക്കുമെന്നായിരുന്നു പ്രഖ്യാപനം. ഇതും നടക്കാതെ വന്നതോടെ പലവട്ടം പ്രദേശവാസികള് സംഘടിച്ച് പ്രതിഷേധങ്ങള് നടത്തി. ഒടുവില് കഴിഞ്ഞ വര്ഷം 240 മീറ്റര് മാത്രം റോഡ് നാക്കിയ ശേഷം ഒരു കോടി മൂന്നു ലക്ഷം രൂപ ബില് മാറിയെടുത്തു. പണി പൂര്ത്തിയായി ഒരാഴ്ചക്കുള്ളില് ഇതിന്റെ പലയിടവും മഴയില് കുത്തിയൊലിച്ചു പോയി. പിന്നീട് മാസങ്ങള്ക്കു ശേഷം കാലവര്ഷ കെടുതിയില് ഉള്പ്പെടുത്തി പണം ചെലവഴിച്ച് വീണ്ടും ഈ ഭാഗം മാത്രം പണി പൂര്ത്തിയാക്കുകയായിരുന്നു. കുരിശുകുത്തി – ഇഞ്ചത്തൊട്ടി വഴി പനംകൂട്ടിയിലേക്ക് പ്രവേശിക്കുന്ന ഈ റോഡിന്റെ നാലു കിലോമീറ്ററോളം വരുന്ന
ഭാഗം ഇപ്പോഴും പൂര്ണ്ണമായി തകര്ന്നു കിടക്കുകയാണ്.
