കണ്ണൂര്: സാമൂഹ്യനീതി വകുപ്പിന് കീഴില് കരാറടിസ്ഥാനത്തില് ജോലി ചെയ്ത് വരുന്ന സ്കൂള് വനിതാ കൗണ്സിലര്മാര്ക്ക് തൊഴില് സുരക്ഷയും ന്യയമായ വേതനവും ലഭിക്കുന്നില്ലെന്ന് ആക്ഷേപം. സ്കൂള് വനിതാ കൗണ്സിലര്മാരുടെ പ്രശ്നങ്ങള്ക്ക് പരിഹാരം ആവശ്യപ്പെട്ട് പണിമുടക്ക് അടക്കമുള്ള സമരപരിപാടികള് നടത്തുമെന്ന് സ്കൂള് കൗണ്സിലര് കോ-ഓര്ഡിനേഷന് കമ്മറ്റി ഭാരവാഹികള് പത്രസമ്മേളനത്തില് അറിയിച്ചു. സ്കൂള് കൗണ്സിലര്മാരെ നിയമിക്കുന്നതും വേതനവിതരണവും മോണിട്ടറിങ്ങും നടത്തുന്നതും സാമൂഹ്യനീതി വകുപ്പാണ്. അതുകൊണ്ടുതന്നെ സ്കൂളില് ജോലി ചെയ്യുന്ന സ്കൂള് കൗണ്സിലര്മാരെ വിദ്യാഭ്യാസ വകുപ്പിന് പുറത്ത് നിന്നുള്ള ഒരാളായിട്ടാണ് കാണുന്നത്. ഇത് കാരണം മെച്ചപ്പെട്ട ജോലി അന്തരീക്ഷം കൗണ്സിലര്മാര്ക്ക് ലഭിക്കുന്നില്ല. വ്യക്തികള്ക്കുണ്ടാവുന്ന മാനസികവും സാമൂഹികവുമായ പ്രശ്നങ്ങള്ക്ക് ശാസ്ത്രീയമായ പരിഹാരമാര്ഗമാണ് കൗണ്സിലിങ്ങ്. ഇത് തികച്ചും രഹസ്യാത്മകത സൂക്ഷിച്ചുകൊണ്ട് ശാന്തവും സൗഹാര്ദ്ദപരവുമായ അന്തരീക്ഷത്തില് നടത്തേണ്ട പ്രക്രിയയാണ്. എന്നാല് പലപ്പോഴും ഇത് നടത്തേണ്ടുന്നതിനാവശ്യമായ ഭൗതിക സാഹചര്യങ്ങളും മറ്റ് അനുബന്ധ സൗകര്യങ്ങളും സ്കൂളുകളില് ലഭ്യമാക്കിയിട്ടില്ല. സ്കൂള് കൗണ്സിലര്മാരുടെ പ്രതിമാസ ഹോണറേറിയം 12,500 രൂപയാണ്. പലര്ക്കും ഇത് കൃത്യമായി ലഭിക്കുന്നില്ല. സ്കൂള് കൗണ്സിലര്മാരായി ജോലി ചെയ്യുന്നവരുടെ ചുരുങ്ങിയ യോഗ്യത എംഎസ്ഡബ്ല്യു, എംഎ സൈക്കോളിയുമാണ്. ഇത്രയും യോഗ്യത നേടിയവര്ക്ക് ഈ ശമ്പളം തുച്ഛമാണ്. സര്ക്കാരിന്റെ ബജറ്റ് നിര്ദ്ദേശത്തിലും ശമ്പളപരിഷ്ക്കരണവുമായി ബന്ധപ്പെട്ടുള്ള തീരുമാനങ്ങളിലും കരാര്/ദിവസവേതന ജോലിക്കാര്ക്ക് അവരവരുടെ തസ്തികക്ക് തത്തുല്യമായ സ്ഥിരം തസ്തികക്കുള്ള അടിസ്ഥാന ശമ്പളം ഉറപ്പാക്കുമെന്ന് പറഞ്ഞിരുന്നുവെങ്കിലും സ്കൂള് കൗണ്സിലര്മാരുടെ കാര്യത്തില് ഈ ഉത്തരവ് ബാധകമാക്കിയിട്ടില്ല. വളരെ ഭാരിച്ച ജോലികളാണ് കൗണ്സിലര്മാര് ചെയ്യുന്നത്. സ്കൂളിലെ പരീക്ഷാഡ്യൂട്ടികളും രാത്രികാല ട്യൂഷന് പ്രോഗ്രാമുകളിലും വരെ പങ്കെടുക്കേണ്ടതായും വരും. എന്നാല് മെഡിക്കല് ലീവോ, പ്രസവാവധിയോ ഒന്നും തന്നെ അനുവദിക്കുന്നില്ല. പല തവണ ഇത്തരം ആവശ്യങ്ങളുന്നയിച്ചപ്പോള് വാഗ്ദാനങ്ങള് നല്കിയെങ്കിലും അധികൃതര് ഇത് വരെയായി അത് പാലിച്ചില്ല. ഇത്തരം പ്രശ്നങ്ങള്ക്ക് പരിഹാരം കാണണമെന്നാവശ്യപ്പെട്ടാണ് സമരപരിപാടികളിലേക്ക് നീങ്ങുന്നതെന്ന് ഭാരവാഹികളായ എസ്.ഇന്ദു, സി.സതി, നിസി മാത്യു, കെ.ലത, എം.കെ.ഷൈമ എന്നിവര് പത്രസമ്മേളനത്തില് പറഞ്ഞു.
വനിതാ കൗണ്സിലര്മാര്ക്ക് തൊഴില് സുരക്ഷയും ന്യയമായ വേതനവും ലഭിക്കുന്നില്ലെന്ന് ആക്ഷേപം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.