കണ്ണൂര്: പൊതുസ്ഥലങ്ങളിലും, ഇലക്ട്രിക്പോസ്റ്റുകളിലും, ടെലഫോണ് പോസ്റ്റുകളിലും സ്ഥാപിച്ചിട്ടുളള രാഷ്ട്രീയ പാര്ട്ടികളുടെ പോസ്റ്ററുകളും ചിഹ്നങ്ങളും കൊടികളും പൊതുസ്ഥലങ്ങളില് സ്ഥാപിച്ചിട്ടുളള സ്തൂപങ്ങളും മറ്റുളളവയും നിയമസഭാ തെരഞ്ഞെടുപ്പിന്റെ മാതൃകാ പെരുമാറ്റചട്ടത്തിന്റെ ഭാഗമായി എടുത്തുമാറ്റുകയോ പൂര്ണ്ണമായി മറക്കുകയോ ചെയ്യേണ്ടതാണെന്ന് നിര്ദ്ദേശം കര്ശനമായി പാലിക്കണമെന്ന് ജില്ലാ കലക്ടര് അറിയിച്ചു. ബന്ധപ്പെട്ട എല്ലാ രാഷ്ട്രീയ പാര്ട്ടികളും ഇക്കാര്യത്തില് ഉടന് നടപടി സ്വീകരിക്കേണ്ടതാണ്. അല്ലാത്തപക്ഷം ഇനിയും മാറ്റാത്തവ ശ്രദ്ധയില്പെട്ടാല് എംസിസിയുമായി ബന്ധപ്പെട്ട ഉദ്യോഗസ്ഥര് മുന്നറിയിപ്പ് നല്കാതെ എടുത്തുമാറ്റുന്നതാണെന്ന് ജില്ലാ കലക്ടര് അറിയിച്ചു. ഇതിലേക്ക് വരുന്ന ചെലവ് ബന്ധപ്പെട്ട രാഷ്ട്രീയ കക്ഷി/സ്ഥാനാര്ത്ഥികളുടെ ചിലവില് ഉള്പ്പെടുത്തുന്നതും അത് ഈടാക്കുന്നതിനാവശ്യമായ നടപടികള് സ്വീകരിക്കുന്നതുമായിരിക്കും.
ഉച്ചഭാഷിണി ഉപയോഗിക്കുന്നതിന് രാവിലെ 6 മണി മുതല് രാത്രി 10 വരെ മാത്രമേ അനുവാദം ഉണ്ടായിരിക്കുകയുളളൂ. പല രാഷ്ട്രീയ പാര്ട്ടികളും യോഗത്തില് ഉച്ചഭാഷിണിക്കുളള മുന്കൂര് അനുവാദം വാങ്ങാതെ ഉപയോഗിക്കുന്നതായി ശ്രദ്ധയില്പെട്ടിട്ടുണ്ട്. ആയതിനാല് ഉച്ചഭാഷിണി ഉപയോഗിക്കുന്നതിന് ബന്ധപ്പെട്ട അധികാരികളില് നിന്നും മുന്കൂര് അനുവാദം നിര്ബന്ധായും ലഭ്യമാക്കേണ്ടതാണ്. അനുവദിച്ച സമയപരിധിക്ക് മുമ്പോ ശേഷമോ ഒരു കാരണവശാലും ഉച്ചഭാഷിണി ഉപയോഗിക്കരുത്. അല്ലാത്ത പക്ഷം ഇക്കാര്യത്തില് നിയമനടപടികള് സ്വീകരിക്കുന്നതാണെന്നും ജില്ലാ കലക്ടര് അറിയിച്ചു.
