തിരുവനന്തപുരം: കോട്ടയ്ക്കകത്തെ അഭേദാശ്രമത്തിന്റെ ഉടമസ്ഥതയിലുള്ള ഭൂമി കൈയേറാന് സ്വകാര്യ ഹോട്ടല് ഉടമയുടെ നീക്കം. സമീപത്തെ ശ്രീപദ്മനാഭ ഹോട്ടലിന്റെ ഉടമ വിജയകുമാരന് നായരാണ് ആശ്രമഭൂമി കൈയേറാന് ശ്രമിക്കുന്നതെന്ന് ആശ്രമാധികൃതര് പറയുന്നു. ഹോട്ടലിന്റെ പുറകിലുള്ള, 60 വര്ഷമായി ആശ്രമം കൈവശം വച്ചിരിക്കുന്ന ഭൂമിയാണ് തനിക്കവകാശപ്പെട്ടതെന്ന നിലയില് ഹോട്ടലുടമ കൈയേറാന് ശ്രമിക്കുന്നത്. വ്യാപാരിവ്യവസായി ഏകോപന സമിതിയുടെ കൊടി ഈ ഭൂമിയില് ഹോട്ടലുടമയും മകനും ചേര്ന്ന് നാട്ടി. എന്നാല് ഏകോപനസമിതി ഭാരവാഹികളാരും തന്നെ ഒപ്പമുണ്ടായിരുന്നില്ല.
അഭേദാശ്രമം ഹോട്ടലുടമ കൈയേറിയതില് പ്രതിഷേധിച്ച് കടക്കു മുന്നില് കുത്തിയിരുന്ന് സമരം
നടത്തുന്നവരുമായി പോലീസ് ചര്ച്ച നടത്തുന്നു
ഓപ്പറേഷന് അനന്തയുമായി ബന്ധപ്പെട്ട് ഓട നിര്മാണത്തോടൊപ്പം ആശ്രമഭൂമി വേര്തിരിച്ച് മതില് കെട്ടി അടയ്ക്കാന് കളക്ടര് ഉത്തരവിട്ടിരുന്നു. ഇതനുസരിച്ച് സാമഗ്രികള് കൊണ്ടുവന്നെങ്കിലും ഹോട്ടലുടമയുടെ പ്രതിഷേധത്തെ തുടര്ന്ന് മതില് കെട്ടാനായില്ല. ഡ്രെയിനേജ് പൈപ്പ് സ്ഥാപിക്കാന് രണ്ടുദിവസത്തെ കാലാവധി വേണമെന്ന ഹോട്ടലുടമയുടെ ആവശ്യത്തെ തുടര്ന്നാണ് നിര്മാണ പ്രവര്ത്തനങ്ങള് നിലച്ചത്. എന്നാല് കഴിഞ്ഞ രണ്ടുദിവസത്തിനുള്ളില് ഹോട്ടലുടമ ആശ്രമഭൂമി കൈയേറി സെപ്റ്റിക് ടാങ്കുകള് നിര്മിച്ചു. ഇന്നലെ ആശ്രമത്തിലെ ക്ഷേത്ര ഉത്സവത്തിന് കൊടിയേറുന്ന സമയത്ത് വിജയകുമാരന് നായര് ഭൂമി കൈയേറി ഷെഡ്ഡു നിര്മിക്കാന് ശ്രമിച്ചു. ഇതിനെതിരെ ആശ്രമാധികൃതര് രംഗത്തെത്തി തടഞ്ഞു. ഹോട്ടലുടമയ്ക്കെതിരെ ആശ്രമവാസികളും ഭക്തജനങ്ങളും ചേര്ന്ന് സമരം ആരംഭിക്കുകയായിരുന്നു.
ഫോര്ട്ട് എസ്ഐ ഷാജിമോന്റെ നേതൃത്വത്തിലെത്തിയ പോലീസ് കളക്ടറുടെ അനുമതി ഇല്ലാതെ യാതൊരു വിധ നിര്മാണപ്രവര്ത്തനങ്ങളും നടത്താന് ഹോട്ടലുടമയെ അനുവദിക്കില്ലെന്ന് ആശ്രമവാസികള്ക്ക് ഉറപ്പുനല്കി. തുടര്ന്ന് സമരം അവസാനിപ്പിക്കുകയായിരുന്നു. അനധികൃതമായി വ്യാപാരിവ്യവസായി ഏകോപന സമിതിയുടെ കൊടി ഉപയോഗിച്ച് ആശ്രമഭൂമി കൈയേറാന് നീക്കം നടത്തിയ ഹോട്ടലുടമയ്ക്കെതിരെ വ്യാപക പ്രതിഷേധം ഭക്തജനങ്ങളില് നിന്ന് ഉയര്ന്നിരിക്കുകയാണ്.
