കണ്ണൂര്: കണ്ണൂര് സര്വ്വകലാശാല സമര്പ്പിച്ച സ്വയം വിലയിരുത്തല് റിപ്പോര്ട്ടിന്റെ അടിസ്ഥാനത്തില് സര്വ്വകലാശാലയെ സമഗ്രമായി വിലയിരുത്തി ഗ്രേഡ് നിര്ണ്ണയിക്കുന്നതിനായി പത്തുപേരടങ്ങിയ നാക് സംഘം ഇന്നലെ സര്വ്വകലാശാലയില് പരിശോധന തുടങ്ങി. സംഘാംഗങ്ങളെ വൈസ് ചാന്സിലറുടെ നേതൃത്വത്തില് സ്റ്റാറ്റിയൂട്ടറി ഓഫീസര്മാരും സിണ്ടിക്കേറ്റ് അംഗങ്ങളും വകുപ്പ് തലവന്മാരും ചേര്ന്ന് സ്വീകരിച്ചു. നാക് ചെയര്മാനും ബറോഡ എം.എസ്.യൂണിവേഴ്സിറ്റി മോളിക്കുലാര് ജനറ്റിക്സ് വിഭാഗം പ്രഫസറുമായ ജോ.ഭരത് ബി.ചാറ്റു, പശ്ചിമ ബംഗാള് ബര്ദ്വാന് സര്വ്വകലാശാല പ്രൊ വെസ് ചാന്സലര് ഡോ.ഷോറോസി മോഹന് ദാന്, ചാണ്ഡീഗഡ് പി.ജി.ഇന്സ്റ്റ്റ്റിയൂട്ട് ഓഫ് മെഡിക്കല് എഡ്യൂക്കേഷനിലെ പ്രൊഫസറായ ഡോ.മീരശര്മ്മ, ഹൈദരബാദ് ഉസ്മാനിയ യൂണിവേഴ്സിറ്റി പ്രൊഫ.സി.മധുമതി, കാശ്മീര് സര്വ്വകലാശാലയിലെ മാനേജ്മെന്റ് പ്രൊഫസറായ ഡോ.എ.എം.ഷാ, പഞ്ചാബ് ഗുരുനാനാക്ക് ദേവ് സര്വ്വകലാശാലയിലെ സോഷ്യോളജി വിഭാഗം പ്രൊഫ.ഡോ.പരംജിത് സിംഗ് ജഡ്ജ്, ഗുരുനാനാക് ദേവ് സര്വ്വകലാശാലയുടെ മുന് വൈസ് ചാന്സലര് പ്രൊഫ.എസ്.പി.സിംഗ്, േനാര്ത്ത് ഒറീസ യൂണിവേഴ്സിറ്റി വൈസ് ചാന്സിലര് പ്രൊഫ.പ്രഫുല്ല കുമാര് മിശ്ര, തിരുപ്പതി രാഷ്ട്രീയ സംസ്കൃത് വിദ്യാപീഠത്തിലെ രജിസ്ട്രാര് പ്രഫ.സി.ഉമാശങ്കര്, നാകിന്റെ കണ്സള്ട്ടന്റ് പ്രൊഫ.ലക്ഷ്മിപതി റാവു എന്നിവരാണ് പത്തംഗ നാക് പരിശോധന സംഘത്തില് ഉളളത്. ഇന്നലെ രാവിലെ യൂണിവേഴ്സിറ്റിയിലെത്തിയ സംഘാംഗങ്ങള് വൈസ് ചാന്സിലര് ഡോ.എം.കെ.അബ്ദുള്ഖാദര്, പ്രൊ വൈസ് ചാന്സിലര് ഡോ.ടി.അശോകന്,രജിസ്ട്രാര് ബാലചന്ദ്രന് കീഴോത്ത് തുടങ്ങി വിവിധ ഉന്നത ഉദ്യോഗസ്ഥരുമായി കൂടിക്കാഴ്ച നടത്തി. സര്വ്വകാലാശാലാ അധികൃതര് വളരെ മുമ്പേതന്നെ സെല്ഫ് സ്റ്റെഡി റിപ്പോര്ട്ട് (എസ്എസ്ആര്) നാകിന് നല്കിയിരുന്നു. ഈ റിപ്പോര്ട്ടിലെ കാര്യങ്ങളാണ് പ്രധാനമായും പരിശോധനയ്ക്കും മൂല്യ നിര്ണ്ണയത്തിനും വിധേയമാക്കുന്നത്. വരും ദിവസങ്ങളില് സംഘം സര്വ്വകലാശാലയുടെ വിവിധ ക്യാമ്പസുകളില് സന്ദര്ശിച്ച് പഠന വകുപ്പുകളുമായി ബന്ധപ്പെട്ട കാര്യങ്ങള് വിലയിരുത്തും. അധ്യാപകര്, ജീവനക്കാര് എന്നിവരെ കൂടാതെ വിദ്യാര്ത്ഥികളുമായും രക്ഷിതാക്കളുമായും സംഘം ആശയ വിനിമയം നടത്തും. 20 ന് സംഘം പരിശോധന പൂര്ത്തിയാക്കി മടങ്ങും.
നാക് സംഘം സര്വ്വകലാശാലയില്, ഗ്രേഡ് നിര്ണ്ണയ പരിശോധന തുടങ്ങി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.