ഇസ്ലാമബാദ്: പാക്കിസ്ഥാനിലെ പെഷവാറില് ബസിലുണ്ടായ ബോംബ് സ്ഫോടനത്തില് 16 പേര് കൊല്ലപ്പെട്ടു. മരിച്ചവരില് മൂന്നുപേര് സ്ത്രീകളാണ്. 30ഓളം പേര്ക്ക് പരിക്കേറ്റു. ഇതില് എട്ടുപേര് ഗുരുതരാവസ്ഥയിലാണ്. പ്രമുഖ വ്യാപാര കേന്ദ്രത്തിനു സമീപത്തുകൂടെ മര്ദാനില് നിന്നും പെഷവാറിലേക്ക് സര്ക്കാര് ജീവനക്കാരുമായി പോവുകയായിരുന്ന ബസിലാണ് സ്ഫോടനമുണ്ടായത്.
ഇന്നലെ രാവിലെ പെഷവാര്, സുനീഹ്രീ മസ്ജിദ് റോഡിനു സമീപത്തായിരുന്നു അപകടം. ബസിനുള്ളിലെ ടൂള് ബോക്സില് ഒളിപ്പിച്ചിരുന്ന സ്ഫോടകവസ്തുക്കളാണ് പൊട്ടിത്തെറിച്ചതെന്ന് പോലീസ് സൂപ്രണ്ട് കാസിഫ് സുള്ഫിക്കര് പറഞ്ഞു. സ്ഫോടനം നടക്കുമ്പോള് അമ്പതോളം സര്ക്കാര് ജീവനക്കാര് ബസിലുണ്ടായിരുന്നു. ഉദ്യോഗസ്ഥരെ കയറ്റിയശേഷം ബസ് പ്രധാന റോഡിലേക്ക് പ്രവേശിക്കുമ്പോഴാണ് സ്ഫോടനം. അതേസമയം ആക്രമണത്തിന്റെ ഉത്തരവാദിത്വം ഇതുവരെ ആരും ഏറ്റെടുത്തിട്ടില്ല.
