പുതുപ്പരിയാരത്ത് ടാര്‍ മിക്‌സിംഗ് പ്ലാന്റ് സ്ഥാപിക്കാന്‍ പഞ്ചായത്തിന്റെ വഴിവിട്ട സഹായം

തൊടുപുഴ: ഗുരുതര ആരോഗ്യ-പാരിസ്ഥിതിക പ്രശ്‌നങ്ങള്‍ ഉണ്ടാക്കുന്ന ടാര്‍ മിക്‌സിംഗ് പ്ലാന്റ് ജനവാസ കേന്ദ്രമായ പുതുപ്പരിയാരത്ത് സ്ഥാപിക്കാന്‍ സ്വകാര്യ വ്യക്തി ശ്രമം ആരംഭിച്ചു. സിപിഎം ഭരിക്കുന്ന പഞ്ചായത്ത് ഭരണ സമിതിയുടെ വഴിവിട്ട നീക്കമാണ് സ്വകാര്യ വ്യക്തിക്ക് ഗുണമായിരിക്കുന്നത്.  ജനങ്ങള്‍ തിങ്ങിപ്പാര്‍ക്കുന്ന പഞ്ചായത്തിലെ 4, 5, 6, 8, 9 വാര്‍ഡുകള്‍ ഭാഗികമായി ഉള്‍പ്പെടുന്നതുമായ പ്രദേശത്ത് കാര്യമായ പരിശോധനയോ അന്വേഷണമോ അധികൃതര്‍ നടത്തിയിട്ടില്ല. പി സി ബിയുടെ മാത്രം സാക്ഷ്യപത്രത്തിന്റെ മറവില്‍ ഫയര്‍ ആന്റ് സേഫ്ടി, പരിസ്ഥിതി, ആരോഗ്യം തുടങ്ങിയ വിവിധ വകുപ്പുകളുടെ അനുമതി പത്രങ്ങള്‍ ഒന്നും ഇല്ലാതെയാണ് മിക്‌സിംഗ് യൂണിറ്റിനായി പ്രവര്‍ത്തനം നടക്കുന്നത്. മാത്രവുമല്ല വീട്, കൃഷിയിടങ്ങളില്‍ നിന്നും ടാര്‍ ഹോട്ട് മിക്‌സ് പ്ലാന്റുകളുടെ ദൂരപരിധിയെ സംബന്ധിച്ച കോടതി നിര്‍ദ്ദേശം, കെ.എസ്.ടി.പി, പൊതുമരാമത്ത് വകുപ്പ് ചട്ടങ്ങള്‍ എന്നിവ ലംഘിച്ചാണ് ഈ ജനദ്രോഹ നടപടി. ടാര്‍, ഡീസല്‍ തുടങ്ങിയ പെട്രോളിയം ഉത്പന്നങ്ങള്‍ ഉയര്‍ന്ന ചൂടില്‍ കത്തുമ്പോള്‍ പുറം തള്ളുന്ന കാര്‍ബണ്‍ മോണോക്‌സൈഡ് അടക്കമുള്ള വിഷപ്പുകയും മെറ്റലും പാറപ്പൊടിയും അന്തരീക്ഷത്തില്‍ വ്യാപിക്കുമ്പോള്‍  ക്യാന്‍സറും ശ്വാസകോശ രോഗങ്ങളും പിടിപെടും. ചെടികള്‍ അടക്കമുള്ള സസ്യജാലങ്ങള്‍ നശിക്കും. ജനങ്ങള്‍ക്ക് ഗുരുതര ആരോഗ്യപ്രശ്‌നങ്ങളും പരിസ്ഥിതിക്ക് നാശവും ഉണ്ടാക്കുന്ന ടാര്‍ പ്ലാന്റ് നിര്‍മ്മിക്കുവാന്‍ പഞ്ചായത്ത് നല്‍കിയ അനുമതി ഉടന്‍ റദ്ദാക്കണമെന്ന് മണക്കാട് സാംസ്‌കാരിക നിലയത്തില്‍ നടന്ന ടാര്‍ പ്ലാന്റ് വിരുദ്ധ ആക്ഷന്‍ കൗണ്‍സില്‍ രൂപീകരണയോഗം ആവശ്യപ്പെട്ടു. നടപടിക്ക് കാലതാമസം വരുത്തിയാല്‍ പഞ്ചായത്ത് ഓഫീസ് മാര്‍ച്ചും ധര്‍ണയും നടത്തുവാനും യോഗം തീരുമാനിച്ചു. കെ.എം. മാത്യു അധ്യക്ഷത വഹിച്ചു. മുന്‍പഞ്ചായത്ത് പ്രസിഡന്റ് പി.എസ്. ജേക്കബ്, ബിജു കൃഷ്ണന്‍,  സിബി മാത്യു, പി.എ. തോമസ്, കെ. ജയരാമന്‍ എന്നിവര്‍ പ്രസംഗിച്ചു.  ബിജു കൃഷ്ണന്‍-ചെയര്‍മാന്‍, പി.എ. തോമസ്-ജനറല്‍ കണ്‍വീനര്‍, കെ.എം. മാത്യു, കെ.ജെ. ബോബി, ആനി ബേബി – വൈസ് ചെയര്‍മാന്‍മാര്‍, എം.കെ. ജോണ്‍സണ്‍, കെ. ജയരാമന്‍, കെ.എസ്. സുരേഷ് – കണ്‍വീനര്‍മാര്‍ എന്നിവര്‍ ഭാരവാഹികളായി 101 അംഗ ജനറല്‍ കമ്മിറ്റിയും 25 അംഗ നിര്‍വ്വാഹക കമ്മിറ്റിയും യോഗം തെരഞ്ഞെടുത്തു. പ്ലാന്റിനെതിരെ ജനരോഷം ഉയര്‍ന്നതോടെ സിപിഎം നേതൃത്വത്തിലുള്ള പഞ്ചായത്ത് ഭരണ സമതി വെട്ടിലായിരിക്കുകയാണ്. സിപിഎമ്മിന്റെ ജനദ്രോഹ മുഖമാണ് ജനവാസ കേന്ദ്രത്തില്‍ പ്ലാന്റ് സ്ഥാപിക്കാനുള്ള നീക്കത്തിലൂടെ വ്യക്തമാകുന്നത്.