മുട്ടത്തെ തീപിടിത്തം; ഫയര്‍ഫോഴ്‌സ് ഉണര്‍ന്ന് പ്രവര്‍ത്തിച്ചു

മുട്ടം: കോടതിക്ക് സമീപമുള്ള വ്യവസായ മേഖലയില്‍ ബുധനാഴ്‌ച്ച പുലര്‍ച്ചെ 2 മണിയോടെ പ്ലൈവുഡ് കമ്പനിക്ക് തീപിടിച്ചത് ഫയര്‍ഫോഴ്‌സിന്റെ അവസരോചിത ഇടപെടല്‍ മൂലം നിയന്ത്രിക്കാന്‍ കഴിഞ്ഞു. പാതിരാത്രി കഴിഞ്ഞ് തീ പടരുന്നത് ശ്രദ്ധയില്‍പെട്ട തൊഴിലാളികള്‍ ഉടന്‍ തന്നെ തൊടുപുഴ ഫയര്‍ ഫോഴ്‌സിനെ വിവരം  അറിയിച്ചു. തൊടുപുഴ ഫയര്‍ ഫോഴ്‌സില്‍ നിന്നും വിവരം അറിഞ്ഞ മൂലമറ്റം ഫയര്‍ഫോഴ്‌സ് യൂണിറ്റും സംഭവ സ്ഥലത്തേക്ക് കുതിച്ചെത്തി. തൊടുപുഴയിലെ 4 യൂണിറ്റും മൂലമറ്റത്തെ 2 യൂണിറ്റും വാഹനങ്ങള്‍ തീ അണയ്‌ക്കുവാന്‍ ഉപയോഗിച്ചു. രാത്രിയെ പകലാക്കി ഫയര്‍ഫോഴ്‌സ് അംഗങ്ങള്‍ അക്ഷീണ പ്രയത്‌നം നടത്തിയതുകൊണ്ട് മാത്രമാണ് പ്ലൈവുഡ് കമ്പനിക്ക് സമീപമുള്ള മറ്റ് സ്ഥാപനങ്ങളിലേക്ക് തീ പടരാതിരുന്നത്. അനേകം ചെറുകിട വ്യവസായ സ്ഥാപനങ്ങളാണ് ഇവിടെ പ്രവര്‍ത്തിക്കുന്നത്. മലങ്കര ജലാശത്തില്‍ നിന്നും 9 പ്രാവശ്യമാണ് ഫയര്‍ഫോഴ്‌സ് വെള്ളം എടുത്തത്. 5 ദിവസം മുമ്പാണ് ഇളംദേശത്ത് ചാത്തുണ്ണി ശിവക്ഷേത്രത്തിന് സമീപം പള്ളിക്കാമാലിയിലെ 5 ഏക്കര്‍ റബ്ബര്‍ തോട്ടം അഗ്നി വിഴുങ്ങിയത്.