പള്ളുരുത്തി: വിവിധ സര്ട്ടിഫിക്കറ്റുകള്ക്കായി എത്തുന്ന നാട്ടുകാരെ പള്ളുരുത്തിയില് പ്രവര്ത്തിക്കുന്ന അക്ഷയ കേന്ദ്രം ബുദ്ധിമുട്ടിക്കുന്നതായി പരാതി. ഇ-ഡിസ്ട്രിക്ട് പദ്ധതി പ്രകാരം സര്ക്കാര് സംബന്ധമായ 23-തരം സര്ട്ടിഫിക്കറ്റുകള് നല്കുന്നത് അക്ഷയകേന്ദ്രങ്ങള് വഴിയാണ്. രേഖാമൂലം അപേക്ഷ ലഭിച്ചു കഴിഞ്ഞാല് 24 മണിക്കൂറിനകം അപേക്ഷകന് സര്ട്ടിഫിക്കറ്റുകള് നല്കണമെന്നാണ് നിര്ദ്ദേശമെങ്കിലും അനാവശ്യ കാരണങ്ങള് നിരത്തി പള്ളുരുത്തിയിലെ അക്ഷയ കേന്ദ്രത്തില് നിന്നും ആളുകളെ മടക്കുകയാണ്.
വരുമാനം, ജാതി, പുരതാമസം, റിലേഷന്ഷിപ്പ് തുടങ്ങിയ സര്ട്ടിഫിക്കറ്റുകള് അക്ഷയകേന്ദ്രങ്ങള് അതത് വില്ലേജ് ഓഫീസുകളിലേക്ക് ഓണ്ലൈനായി അയയ്ക്കുകയും ഡിജിറ്റല് ഒപ്പു രേഖപ്പെടുത്തിയശേഷം അക്ഷയകേന്ദ്രങ്ങള്ക്ക് തിരിച്ച് അയയ്ക്കുകയും പിന്നീട് മൊബൈല് ഫോണില് അറിയിപ്പുവന്നശേഷം സര്ട്ടിഫിക്കറ്റുകള് ഉടനടി ലഭ്യമാക്കണമെന്നുള്ളതുമാണ് നിര്ദ്ദേശം. വിവിധ ക്ഷേമ പെന്ഷനുകള്ക്കും സ്കൂള് അഡ്മിഷനുകള്ക്കും കേന്ദ്രസര്ക്കാരിന്റെ വിവിധ ക്ഷേമപദ്ധതികള്ക്കാവശ്യമായ രേഖകള്ക്കും പള്ളുരുത്തി അക്ഷയകേന്ദ്രത്തെ സമീപിക്കുമ്പോഴെല്ലാം അക്ഷയകേന്ദ്രം നടത്തിപ്പുകാരന് പൊതുജനങ്ങളെ അനാവശ്യ ചോദ്യങ്ങള് ഉയര്ത്തി ബുദ്ധിമുട്ടിക്കുകയാണെന്നും നാട്ടുകാര് പരാതിയില് പറയുന്നു. അടിയന്തരമായി നല്കേണ്ട സര്ട്ടിഫിക്കറ്റുകള് പോലും അക്ഷയകേന്ദ്രം നടത്തിപ്പുകാരന്റെ കണ്ടുപിടുത്തംമൂലം വേണ്ട സമയത്തു ലഭിക്കുന്നില്ല. ജില്ലാ കളക്ടര്ക്കും ബന്ധപ്പെട്ട കേന്ദ്രങ്ങളിലും പ്രസ്തുത കേന്ദ്രത്തെപ്പറ്റിയുള്ള പരാതി നല്കാന് ഭീമഹര്ജി ഒപ്പുശേഖരണം നടത്താന് ഒരുങ്ങുകയാണ് പ്രദേശത്തെ സംഘടനകള്.
