ആലുവ: വ്യാപാരികളുടെ കടയടപ്പ് സമരവുമായി സഹകരിച്ചില്ലെന്ന പേരില് ഹോട്ടലിനുനേരെ അക്രമം. ബാങ്ക് കവലയിലെ കമ്മത്ത് റസ്റ്റോറന്റിനുനേരെയാണ് ഇന്നലെ രാവിലെ അക്രമമുണ്ടായത്. അക്രമത്തില് പരിക്കേറ്റ ഹോട്ടല് ഉടമ സുധാകരകമ്മത്ത് (42), രാം (34) എന്നിവരെയാണ് മര്ച്ചന്റ്സ്അസോസിയേഷന്റെ സെക്രട്ടറി റിയാസിന്റെ നേതൃത്വത്തില് 30 ഓളം വരുന്ന സംഘം അക്രമിച്ചത്. ഹോട്ടല് അസോസിയേഷന് സംസ്ഥാനതലത്തില് കടയടപ്പ് സമരത്തിന് ആഹ്വാനം ചെയ്തിട്ടില്ലെന്നും അതുകൊണ്ടാണ് കട തുറന്നതെന്നും കടയുടമ പറഞ്ഞു. ഇതൊന്നും കേള്ക്കാന് തയ്യാറാകാതെ സമരക്കാര് ഹോട്ടല് ഉടമയെയും ജീവനക്കാരെയും ആക്രമിക്കുകയായിരുന്നുവെന്ന് ഹോട്ടല് ഉടമ സുധാകരകമ്മത്ത് ജന്മഭൂമിയോട് പറഞ്ഞു.
പരിക്കേറ്റ ഹോട്ടല് ഉടമയെയും ജീവനക്കാരെയും ആലുവ സ്വകാര്യ ആശുപത്രിയില് പ്രവേശിപ്പിച്ചു. ഹോട്ടലിലെ സാധനങ്ങളും നശിപ്പിച്ചിട്ടുണ്ട്. റസ്റ്റോറന്റ് ഉടമയെയും ജീവനക്കാരനെയും ആക്രമിച്ചവരെ ഉടന് അറസ്റ്റുചെയ്യണമെന്നാവശ്യപ്പെട്ട് ഹിന്ദു ഐക്യവേദിയുടെ ആഭിമുഖ്യത്തില് നഗരത്തില് പ്രകടനം നടത്തി. നഗരസഭാ കൗണ്സിലര് എ.സി. സന്തോഷ്കുമാര്, ഹിന്ദു ഐക്യവേദി മേഖലാ സെക്രട്ടറി ശശി തുരുത്ത്, ബിജെപി ടൗണ് സെക്രട്ടറി അനില് കടവില് എന്നിവര് നേതൃത്വം നല്കി.
