ബത്തേരി:നിലമ്പൂര്‍ – വയനാട് – നഞ്ചന്‍ഗോഡ് റയില്‍പാതയുടെ തുടര്‍ നടപടികള്‍ സംബന്ധിച്ച് ഇന്ത്യന്‍ റയില്‍വേ ഏകാംഗ കമ്മീഷനും ഡി.എം.ആര്‍.സി മുഖ്യഉപദേഷ്ടാവുമായ ഡോ:ഇ.ശ്രീധരന്‍ സംസ്ഥാന സര്‍ക്കാറിന് നിര്‍ദ്ദേശങ്ങള്‍ സമര്‍പ്പിച്ചു. നിര്‍ദ്ദേശങ്ങളുടെ പകര്‍പ്പ് നീലഗിരി-വയനാട് എന്‍.എച്ച് & റയില്‍വേ ആക്ഷന്‍ കമ്മറ്റിക്കും അദ്ദേഹം അയച്ചുനല്‍കി. നിലമ്പൂര്‍ – നഞ്ചന്‍ഗോഡ് റയില്‍പാത ബജറ്റിതര ഫണ്ടിംഗ് വിഭാഗത്തിലാണ് അനുവദിച്ചിട്ടുള്ളതെന്ന് അദ്ദേഹം വ്യക്തമാക്കി. 6000 കോടി രൂപ ചെലവു വരുന്ന പദ്ധതി സതേണ്‍ റയില്‍വേ സോണില്‍നിന്നു മാറ്റി സൗത്ത് വെസ്റ്റേണ്‍ റയില്‍വേക്കാണ് നല്‍കിയിട്ടുള്ളത്. സംസ്ഥാനസര്‍ക്കാറും കേന്ദ്ര ഗവണ്‍മെന്റും തമ്മില്‍ ഏര്‍പ്പെട്ടിട്ടുള്ള ധാരണാപത്ര പ്രകാരം ഈ പദ്ധതിക്കുവേണ്ടി സ്‌പെഷ്യല്‍ പര്‍പ്പസ് വെഹിക്കിള്‍ രൂപീകരിക്കേണ്ടതുണ്ട്. ആദ്യസര്‍വ്വേ പ്രകാരം 236 കി.മി യാണ് പാതയുടെ ദൂരം എങ്കിലും ഇത് 166 കി.മി ആയി കുറക്കാമെന്ന് ഡോ:ഇ.ശ്രീധരന്‍ അറിയിച്ചു. പാത വൈദ്യുതീകരണമടക്കം മൊത്തം ചെലവ് 3500 കോടി രൂപയേ വരൂ. ഷൊര്‍ണ്ണൂര്‍ – നിലമ്പൂര്‍ പാത വൈദ്യുതീകരിക്കുന്നതിനാല്‍ നിലമ്പൂര്‍ – വയനാട് – നഞ്ചന്‍ഗോഡ് പാതയും വൈദ്യുതീകരിച്ചാണ് നിര്‍മ്മിക്കേണ്ടത്. പാതക്കു സ്വകാര്യമൂലധനവും കണ്ടെത്തേണ്ടതിനാല്‍ ഫൈനല്‍ ലൊക്കേഷന്‍ സര്‍വ്വേയെ അടിസ്ഥാനമാക്കി വിശദമായ പ്രോജക്ട് റിപ്പോര്‍ട്ട് തയ്യാറാക്കണം. അതിനാല്‍ ആദ്യഘട്ടം ഫൈനല്‍ ലൊക്കേഷന്‍ സര്‍വ്വേയാണ്. അതിന് 8 കോടി രൂപ ചെലവു വരും. ബജറ്റില്‍ പണമനുവദിക്കുകയോ സംസ്ഥാനസര്‍ക്കാര്‍ നല്‍കുകയോ ചെയ്താലേ റയില്‍വേ നേരിട്ട് ഈ സര്‍വ്വേ നടത്തൂ. എന്നാല്‍ ഡി.എം.ആര്‍.സി, റൈറ്റ്‌സ്, റയില്‍ വികാസ് നിഗം എന്നീ സ്ഥാപനങ്ങള്‍ ഈ സര്‍വ്വേ നടത്താന്‍ അധികാരപ്പെട്ടവരാണ്. പാതയുടെ 63 കി.മീ കര്‍ണ്ണാടകയിലും 12 കി.മി തമിഴ്‌നാട്ടിലും ബാക്കി കേരളത്തിലൂടെയുമാണ് കടന്നുപോകുന്നത്. അതിനാല്‍ കര്‍ണ്ണാടക സര്‍ക്കാരിനേയും സ്‌പെഷ്യല്‍ പര്‍പ്പസ് വെഹിക്കിളില്‍ ഭാഗമാക്കണം. റയില്‍വേ ബജറ്റില്‍ തുക അനുവദിച്ചിട്ടില്ലാത്തതിനാല്‍ സര്‍വ്വേ തുടങ്ങിവെക്കാന്‍ സംസ്ഥാനസര്‍ക്കാര്‍ ഫണ്ട് നല്‍കണം. മേല്‍പ്പറഞ്ഞ 3 സ്ഥാപനങ്ങളെ ഏതിനെയെങ്കിലും സര്‍വ്വേ നടത്താന്‍ ചുമതലപ്പെടുത്താം.
സംസ്ഥാനസര്‍ക്കാറിന് താല്‍പ്പര്യമുണ്ടെങ്കില്‍ ഡി.എം.ആര്‍.സി നിലമ്പൂര്‍ – വയനാട് – നഞ്ചന്‍ഗോഡ് പാതയുടെ ഫൈനല്‍ ലൊക്കേഷന്‍ സര്‍വ്വേ നടത്താന്‍ തയ്യാറാണ്. തിരുവനന്തപുരം – കാസര്‍ഗോഡ് അതിവേഗ റയില്‍വേയുടെ സര്‍വ്വേ നടത്തിയ മാതൃകയില്‍ ഈ സര്‍വ്വേയും നടത്തും. സംസ്ഥാനസര്‍ക്കാര്‍ ഉത്തരവിറക്കുകയാണെങ്കില്‍ സ്‌പെഷ്യല്‍ പര്‍പ്പസ് വെഹിക്കിള്‍ രൂപീകരിക്കാന്‍ കാത്തുനില്‍ക്കാതെതന്നെ ഡി.എം.ആര്‍.സി സര്‍വ്വേ നടപടികള്‍ തുടങ്ങും. സൗത്ത് വെസ്റ്റേണ്‍ റയില്‍വേയുമായി സഹകരിച്ചുകൊണ്ട് 8 മുതല്‍ 9 മാസത്തിനകം ഡി.എം.ആര്‍.സിക്ക് സര്‍വ്വേ പൂര്‍ത്തിയാക്കി വിശദമായ റിപ്പോര്‍ട്ട് സമര്‍പ്പിക്കാനാവും. ഡോ:ഇ.ശ്രീധരന്റെ നിര്‍ദ്ദേശങ്ങള്‍ അടിയന്തിരമായി നടപ്പാക്കണമെന്ന് ആവശ്യപ്പെട്ട് നീലഗിരി – വയനാട് എന്‍.എച്ച് & റയില്‍വേ ആക്ഷന്‍ കമ്മറ്റി വ്യവസായ മന്ത്രി പി.കെ.കുഞ്ഞാലിക്കുട്ടിയുമായി ചര്‍ച്ച നടത്തി. മുഖ്യമന്ത്രിയുമായി ചര്‍ച്ച നടത്തി സര്‍വ്വേ നടപടികള്‍ ഡി.എം.ആര്‍.സി യെ ഏല്‍പ്പിക്കുന്ന കാര്യത്തില്‍ ഉടന്‍ തീരുമാനമെടുക്കുമെന്ന് മന്ത്രി പി.കെ.കുഞ്ഞാലിക്കുട്ടി ഉറപ്പുനല്‍കി.
ഡോ:ഇ.ശ്രീധരന്റെ നിര്‍ദ്ദേശങ്ങള്‍ നടപ്പാക്കാന്‍ അടിയന്തിര നടപടികള്‍ സ്വീകരിക്കുമെന്ന് എം.പി യും എം.എല്‍.എ യും ഉറപ്പുനല്‍കി. മന്ത്രിയും ജനപ്രതിനിധികളുമായുള്ള ചര്‍ച്ചയില്‍ ആക്ഷന്‍ കമ്മറ്റി കണ്‍വീനര്‍ അഡ്വ:ടി.എം.റഷീദ്, അഡ്വ:പി.വേണുഗോപാല്‍, പി.പി.അബ്ദുള്‍ഖാദര്‍, എം.എ.അസൈനാര്‍, പി.വൈ.മത്തായി, നാസര്‍ കാസിം എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: