കോഴിക്കോട്: എഫ്സി വോളിന്ലൂട്സ്കിനെ സമനിലയില് തളച്ച് അത്ലറ്റിക്കോ പരാനെസ്. നാഗ്ജി കപ്പ് ഫുട്ബോളില് ഇന്നലെ നടന്ന മത്സരത്തില് ബ്രസീലിയന് ടീമായ അത്ലറ്റിക്കോ പരാനെസ് ഉക്രെനിയന് ടീമായ എഫ്സി വോളിന്ലൂട്സ്ക്കിനെ സമനിലയില് (2-2)തളച്ചു.
കളിയുടെ ആദ്യ നിമിഷങ്ങള് മുതല് എഫ്സി വോളിന്ലൂട്സ്കിന്റെ ആധിപത്യമായിരുന്നു. അത്ലറ്റിക്കോ പരാനെസിന്റെ ഗോള് മുഖം ലക്ഷ്യമാക്കി എഫ്സി വോളിന്ലൂട്സ്ക് താരങ്ങള് നിരവധി തവണ മുന്നേറിയെങ്കിലും ഗോളാക്കി മാറ്റാന് അവര്ക്കായില്ല.
21-ാം മിനിറ്റിലാണ് കളിയിലെ ആദ്യ ഗോള് പിറന്നത്. എന്നാല് അതു നേടിയത് അത്ലറ്റിക്കോ പരാനെസ് ആയിരുന്നു. വോളിന്ലൂട്സ്ക് പ്രതിരോധ നിരയെ കബളിപ്പിച്ച് മുന്നേറിയ പരാനെസിന്റെ ഗസ്റ്റാവോ കസ്കാര്ഡോ ഡി അസിസ് നല്കിയ പാസ്സ് വെസ്ലി ലിമ ഡാ സില്വ ഗോളാക്കി മാറ്റുകയായിരുന്നു. പന്തുവരുന്നതു കണ്ട് മുന്നോട്ടു നീങ്ങിയ ഗോളിക്കും തടുക്കാനായില്ല. തുടര്ന്ന് ഗോള് തിരിച്ചടിക്കാനുള്ള ശ്രമവുമായി വോളിന്ലൂട്സ്ക് താരങ്ങള് നിരവധി തവണ മുന്നേറിയെങ്കിലും മറുപടി ഗോള് പിറന്നത് 29-ാം മിനിറ്റിലായിരുന്നു. ലൊഗിനേവ് സെര്ജിയാണ് പന്ത് വലയിലാക്കിയത്. ഇടതുവശത്ത് നിന്ന് ജെര്മ്യൂക് എടുത്ത കോര്ണര് കിക്ക് ഒന്പതാം നമ്പര് താരം മെമസേവ് റെഡ്വാന് ഹെഡ് ചെയ്തെങ്കിലും അതല്റ്റികോ ഗോളി ലൂക്കാസ് മക്കാന് തട്ടിയകറ്റി. തെറിച്ചുവീണ പന്ത്, ഓടിക്കയറിയ ലോഗിനവ് സെര്ജി വലയിലേക്ക് തിരിച്ചുവിടുകയായിരുന്നു.
63-ാം മിനിറ്റില് വോളിന്ലൂട്സ്ക് രണ്ടാം ഗോള് നേടി. ലൊഗിനവ് സെര്ജി നല്കിയ പാസ് മെമസേവ് റെഡ്വാന് അത്ലറ്റികോയുടെ ജോസ് ഇവാള്ഡോയെ കബളിപ്പിച്ച് വലയിലേക്ക് അടിച്ചു കയറ്റുകയായിരുന്നു. വിജയിച്ചെന്നുറപ്പിച്ച നിമിഷങ്ങളിലൂടെയാണ് വോളിന്ലൂട്സ്ക് കടന്നു പോയത്. എന്നാല് കളിയുടെ അവസാന നിമിഷങ്ങളില് പകരക്കാരനായി ഇറങ്ങിയ യാഗോ സീസര് ഡാ സില്വ ബ്രസീലിനായി സമനില ഗോള് നേടി. ഇടതുവശത്ത് നിന്ന് കയോ ഫെര്ണാഡോ നല്കിയ പാസ്സാണ് തൊണ്ണൂറാം മിനിറ്റില് സില്വ ഗോളാക്കി മാറ്റിയത്.
ഇന്ന് രാത്രി ഏഴിന് കോഴിക്കോട് കോര്പ്പറേഷന് സ്റ്റേഡിയത്തില് നടക്കുന്ന മത്സരത്തില് ഉക്രൈന് ടീമായ എഫ്സി നിപ്രോയും അര്ജന്റീനിയന് അണ്ടര് 23 ടീമും ഏറ്റുമുട്ടും.
