ന്യൂയോര്ക്ക്: അന്താരാഷ്ട്ര ഭീകരസംഘടനയായ ഐഎസിനു പിന്നിലും പാക് ചാരസംഘടനയായ ഐഎസ്ഐയാണെന്ന് റിപ്പോര്ട്ട്.
ഐഎസ്ഐ ഏറെക്കാലം ഐഎസിന്റെ മാനേജരായിരുന്നു. ഐഎസിന്റെ വളര്ച്ചയ്ക്കു പിന്നിലും അവര് തന്നെയാകാം. ന്യൂയോര്ക്ക് ടൈംസ് മുഖപ്രസംഗ പേജിലെ ലേഖനത്തില് വ്യക്തമാക്കി. താലിബാനെ സഹായിച്ചത് പാക്കിസ്ഥാനാണ്. അഫ്ഗാന് അടക്കം പല രാജ്യങ്ങളിലുമുള്ള സംഘര്ഷങ്ങളില് പാക്കിസ്ഥാന് ഇടപെടുന്നുമുണ്ട്, ലേഖനത്തില് തുറന്നടിക്കുന്നു.
അന്താരാഷ്ട്ര മുജാഹിദ്ദീന് ശക്തികളെയും സുന്നി തീവ്രവാദികളെയും എന്നും സഹായിച്ചിരുന്നത് പാക് ചാരസംഘടനയായ ഐഎസ്ഐയാണ്. ഇസ്ലാമിക് സ്റ്റേറ്റിന്റെ വളര്ച്ചയ്ക്കു പിന്നിലും അവര് തന്നെയാകാം. അഫ്ഗാനിസ്ഥാനെ തങ്ങളുടെ പിന്നാമ്പുറമായാണ് പാക്കിസ്ഥാന് കരുതുന്നത്. അവിടെ തങ്ങളുടെ ആജന്മശത്രുവായ ഭാരതം മേല്ക്കൈ നേടരുതെന്നാണ് അവരുടെ ആഗ്രഹം. അഫ്ഗാന് സുന്നി താവളമായി തുടരാന് പാക്കിസ്ഥാനാണ് താലിബാനെ അവിടെ ഉപയോഗിച്ചത്,ലേഖനത്തില് പറയുന്നു.
അക്രമകാരികളായ മൂന്ന് ജിഹാദികള് അവിടെ സുഖമായി ജീവിക്കുകയാണ്. അവരില് ഒന്നാമനാണ് സിറാജ്ജുദ്ദീന് ഹഖാനി. താലിബാനിലെ രണ്ടാമനും ഹഖാനി ശൃംഖലയുടെ മേധാവിയുമാണ് ഇയാള്.ഇയാള് ഇവിടെ സ്വതന്ത്രനായി വിരാജിക്കുകയാണ്. ഇയാള് റാവല് പിണ്ടിയിലെ അഫ്ഗാന് പ്രചാരണ ഓഫീസ് സന്ദര്ശിക്കുകയും ചെയ്തു. താലിബാന്റെ പുതിയ നേതാവ് മുല്ല അക്തര് മുഹമ്മദ് മന്സൂര് പാക്കിസ്ഥാനില് യോഗങ്ങള് വിളിച്ചു ചേര്ക്കുന്നുണ്ട്. അല്ഖ്വയ്ദ നേതാവ് അയ്മാന് അല് സവാഹിരിയും പാക്കിസ്ഥാനില് എത്തുന്നുണ്ട്,ലേഖനത്തില് പറയുന്നു.
