ഹൊബാര്ട്ട്: ഓസ്ട്രേലിയന് വനിതകള്ക്കെതിരായ രണ്ടാം ഏകദിനത്തിലും പരാജയം ഏറ്റുവാങ്ങിയ ഇന്ത്യ മൂന്ന് മത്സരങ്ങളുടെ പരമ്പര നഷ്ടപ്പെടുത്തി. ഇന്നലെ നടന്ന മത്സരത്തില് ആറ് വിക്കറ്റിനാണ് ഓസ്ട്രേലിയന് വനിതകള് ഇന്ത്യയെ കീഴടക്കിയത്. ആദ്യം ബാറ്റ് ചെയ്ത ഇന്ത്യ എട്ട് വിക്കറ്റിന് 252 റണ്സെടുത്തു. മറുപടി ബാറ്റിങ്ങിനിറങ്ങിയ ഓസ്ട്രേലിയ 20 പന്തുകള് ബാക്കിനില്ക്കേ നാല് വിക്കറ്റ് നഷ്ടത്തില് 253 റണ്സെടുത്ത് വിജയം നേടുകയായിരുന്നു.
ആദ്യം ബാറ്റിങ്ങിനിറങ്ങിയ ഇന്ത്യന് വനിതകള് സ്മൃതി മന്ദനയുടെ തകര്പ്പന് സെഞ്ചുറിയുടെയും (109 പന്തില് 102) ക്യാപ്റ്റന് മിതാലി രാജിന്റെ അര്ദ്ധസെഞ്ചുറിയുടെയും (98 പന്തില് 58) മികച്ച ബാറ്റിങ്ങിന്റെ കരുത്തിലാണ് എട്ട് വിക്കറ്റ് നഷ്ടത്തില് 252 റണ്സ് നേടിയത്. ഇവര്ക്ക് പുറമെ ശിഖ പാണ്ഡെ പുറത്താകാതെ 33ഉം ഹര്മന്പ്രീത് കൗര് 21ഉം ഏക്ത ബിഷ്ത് 14ഉം റണ്സ് നേടി. ഇവര് മാത്രമാണ് ബാറ്റിങ്ങില് രണ്ടക്കം കടന്ന ഇന്ത്യന് വനിതകള്. ഓസ്ട്രേലിയക്ക് വേണ്ടി എല്ലിസെ പെരി മൂന്നും മെഗാന് സ്കട്ട് രണ്ടും വിക്കറ്റുകള് വീഴ്ത്തി. ഇന്ത്യന് താരം സ്മൃതി മന്ദനയാണ് മത്സരത്തിലെ താരം.
മറുപടി ബാറ്റിങിനിറങ്ങിയ ഓസ്ട്രേലിയക്ക് വേണ്ടി മുന്നിര താരങ്ങളെല്ലാം മികച്ച പ്രകടനം നടത്തി. ഓപ്പണര്മാരായ നിക്കോളെ ബോള്ട്ടന് 77ഉംമെഗ് ലാന്നിങ് 61ഉം നേടി മികച്ച തുടക്കം നല്കി. ഒന്നാം വിക്കറ്റില് ഇവര് 138 റണ്സ് കൂട്ടിച്ചേര്ത്തു. ഇവര് നല്കിയ അടിത്തറയില് നിന്ന് കളിച്ച എല്ലിസെ പെരി 31ഉം ജെസ്സ് ജോനാസ്സന്, അലിസ്സ ഹീലി എന്നിവര് പുറത്താകാതെ 29ഉം റണ്സ് നേടിയതോടെ അനായാസ ജയം ഓസീസ് വനിതകള് സ്വന്താമാക്കുകയായിരുന്നു. ഇന്ത്യന് വനിതകളില് രണ്ട് വീതം വിക്കറ്റുകള് വീഴ്ത്തി ശിഖ പാണ്ഡെയും രാജേശ്വരി ഗെയ്ക്ക്വാദും ഭേദപ്പെട്ട പ്രകടനം നടത്തി. നേരത്തെ ട്വന്റി 20 പരമ്പര ഇന്ത്യന് വനിതകള് സ്വന്തമാക്കിയിരുന്നു. നാളെ അവസാന ഏകദിനം നടക്കും.
