പയ്യന്നൂര്‍: കളിവിളക്കിന് മുന്നില്‍ ദമയന്തിയും സഖിയും ഉദ്യാനത്തില്‍ ഉലാത്തുന്ന രംഗം ശൃംഗാര രസത്തില്‍ അരങ്ങിലെത്തിയപ്പോള്‍ വിദ്യാര്‍ത്ഥികള്‍ക്കും അധ്യാപകര്‍ക്കും രക്ഷിതാക്കള്‍ക്കും നവ്യാനുഭവം. കേന്ദ്ര മാനവ വിഭവ ശേഷി മന്ത്രാലയത്തിന് കീഴിലുള്ള ഡല്‍ഹി സ്പീക്മാക്കെയുമായി ചേര്‍ന്ന് കടന്നപ്പള്ളി യുപി സ്‌കൂളില്‍ അരങ്ങേറിയ നളചരിതം കഥകളിയാണ് സോദാഹരണത്തിലൂടെയും അവതരണത്തിലൂടെയും ആകര്‍ഷകമാക്കിയത്.
കലാമണ്ഡലം ഹരിനാരായണന്‍ ആശാന്‍ സോദാഹരണ ക്ലാസെടുത്തു. വെള്ളിനേഴി ഹരിദാസ്-ദമയന്തി, സദനം സദാനന്ദന്‍-സഖി, കലാമണ്ഡലം ജയചന്ദ്രന്‍-ഹംസം എന്നിവര്‍ വേഷത്തിലും പനയൂര്‍ കുട്ടന്‍ നമ്പൂതിരി (സംഗീതം) കലാമണ്ഡലം നന്ദകുമാര്‍ (ചെണ്ട) മട്ടന്നൂര്‍ സതീശന്‍ നമ്പൂതിരി (മദ്ദളം) എന്നിവര്‍ മേളത്തിലും സംഗീതത്തിലും വേദിനിറഞ്ഞു. മോഹന്‍ മഞ്ചുതരയും സുരേഷ് അടയ്‌ക്കാപുത്തൂരും അണിയറക്കാരായി.
കടന്നപ്പള്ളി-പാണപ്പുഴ പഞ്ചായത്ത് പ്രസിഡണ്ട് ഇ.പി.ബാലകൃഷ്ണന്‍ കളിവിളക്ക് തെളിച്ച് ഉദ്ഘാടനം ചെയ്തു. സ്പീക്ക് മാക്കെ കോ-ഓര്‍ഡിനേറ്റര്‍ കെ.രമേഷ് ബാബു അധ്യക്ഷത വഹിച്ചു. എം.ശുഭ, എം.സരോജിനി, ടി.രാധ, ഒ.കെ.നാരായണന്‍ നമ്പൂതിരി എന്നിവര്‍ സംസാരിച്ചു. മാനേജര്‍ പി.ടി.ഗോവിന്ദന്‍ നമ്പ്യാര്‍ ഉപഹാരങ്ങള്‍ നല്‍കി.
