ന്യൂദല്ഹി: നേതാജി സുഭാഷ് ചന്ദ്രബോസുമായി ബന്ധപ്പെട്ട 100 ഫയലുകള് ഇന്ന് കേന്ദ്രസര്ക്കാര് പുറത്തുവിടും.നേതാജിയുടെ ജന്മദിനവാര്ഷികത്തില് നടക്കുന്ന ചടങ്ങില് പ്രധാനമന്ത്രി നരേന്ദ്രമോദി ഫയലുകളുടെ ഡിജിറ്റല് പകര്പ്പുകള് പുറത്തിറക്കും. നേതാജിയുടെ കുടുംബാംഗങ്ങളുമായി പ്രധാനമന്ത്രി നടത്തിയ കൂടിക്കാഴ്ചയിലെ തീരുമാനപ്രകാരമാണ് രഹസ്യരേഖകള് പരസ്യപ്പെടുത്തുന്നത്.
പ്രാഥമിക സൂക്ഷിപ്പിനും ഡിജിറ്റലൈസേഷനും ശേഷമാണ് ആദ്യപടിയായി ദേശീയ പുരാവസ്തു വകുപ്പ് നേതാജി ഫയലുകള് പരസ്യപ്പെടുത്തുന്നത്. നേതാജിയുമായി ബന്ധപ്പെട്ട ഫയലുകള് കേന്ദ്ര സര്ക്കാര് രഹസ്യപ്പട്ടികയില് നിന്നും നീക്കുകയും പൊതുജനങ്ങള്ക്കായി പരസ്യപ്പെടുത്തുകയും ചെയ്യുമെന്ന് പ്രധാനമന്ത്രിയുടെ ഓഫീസ് നേതാജിയുടെ കുടുംബത്തെ അറിയിച്ചിരുന്നു.
ഇതേത്തുടര്ന്ന് പ്രധാനമന്ത്രിയുടെ ഓഫീസ് 33 ഫയലുകള് രഹസ്യപ്പട്ടികയില് നിന്നും നീക്കി ഡിസംബര് നാലിന് പുരാവസ്തു വകുപ്പിന് കൈമാറി. ഇതിനു പുറമേ ആഭ്യന്തരകാര്യ മന്ത്രാലയവും വിദേശകാര്യമന്ത്രാലയവും നേതാജിയുമായി ബന്ധപ്പെട്ട ഫയലുകകള് രഹസ്യപ്പട്ടികയില് നിന്ന് നീക്കുന്നതിനുള്ള നടപടികള് ആരംഭിച്ചു. കൂടുതല് ഫയലുകള് ഓഫീസില് നിന്ന് കൈമാറ്റപ്പെടുകയും ചെയ്തു.
ഒരോ മാസവും നേതാജിയുമായി ബന്ധപ്പെട്ട 25 ഫയലുകള് വീതം പരസ്യപ്പെടുത്തി ഡിജിറ്റലൈസ് ചെയ്യാനും പുരാവസ്തു വകുപ്പിന് പദ്ധതിയുണ്ട്. 19997ല് കേന്ദ്രപ്രതിരോധവകുപ്പില് നിന്നും ലഭിച്ച 990 ഫയലുകളും കോസ്ല കമ്മീഷനില് നിന്നും ലഭിച്ച 271 ഫയലുകളും മുഖര്ജി കമ്മീഷന്റെ 759 ഫയലുകളും ഇത്തരത്തില് പരസ്യപ്പെടുത്തും.
