പള്ളുരുത്തി: കൊച്ചിയുടെ തെരുവോരങ്ങള്‍ നായകള്‍ കീഴടക്കുകയാണ്. ഒഴിഞ്ഞ പറമ്പുകളും പൊതുറോഡും, ഇടറോഡും, സ്‌കൂള്‍ മുറ്റങ്ങളും എല്ലാം കീഴടക്കിനായകള്‍ വിലസുമ്പോള്‍ നായപ്രശ്‌നം കൈകാര്യം ചെയ്യാനാവാതെ നഗരസഭ ഭരണനേതൃത്വം അന്തംവിടുന്നകാഴ്ചയാണ്. കൊച്ചിനഗരസഭാ പ്രദേശങ്ങളില്‍ മാത്രം നായകളുടെ എണ്ണം ലക്ഷങ്ങള്‍ കവിയുമെങ്കിലും ഇതൊന്നും അംഗീകരിച്ചുതരാന്‍ നഗരസഭാ അധികാരികള്‍ മാത്രം തയ്യാറായിട്ടില്ല.
നഗരത്തിന്റെ മുക്കിലും മൂലയിലും നായകള്‍ പെറ്റുപെരുകുമ്പോള്‍ ദിനം പ്രതി എട്ടോളം നായകളെ വന്ധ്യംകരിച്ചുവിടുന്ന ബ്രഹ്മപുരത്തെ ആനിമല്‍ ബെര്‍ത്ത് കണ്‍ട്രോള്‍പ്ലാന്റ് വലിയ പ്രയോജനമൊന്നു മില്ലാതെ തന്നെയാണ് പ്രവര്‍ത്തിക്കുന്നത്. നഗരസഭാ അതിര്‍ത്തിയില്‍നിന്നും നായകളെ വന്ധ്യംകരിക്കാന്‍ പിടികൂടി നായകളെ അതാതു മേഖലകളില്‍തന്നെ വിടണമെന്നുള്ളതാണ് നിയമമെങ്കിലും പലപ്പോഴും അത് പ്രാവര്‍ത്തികമാകാറില്ല. ഏതാനും നാളുകള്‍ മുമ്പുവരെ നഗരസഭാ സോണല്‍ ഓഫീസിനുകീഴില്‍ നായപിടുത്തക്കാര്‍ ഉണ്ടായിരുന്നുവെങ്കിലും നിയമപ്രശ്‌നം മൂലം അവരും ഈ പണി ഉപേക്ഷിച്ചമട്ടാണ്.
പള്ളുരുത്തി പ്രദേശത്ത് നഗരസഭയ്‌ക്കുവേണ്ടിനായ പിടിക്കാന്‍ നിയോഗിക്കപ്പെട്ടിരുന്ന ഒരാളുടെ പേരില്‍ നായയെ പിടികൂടിയതിനു പേരില്‍ നിരവധികേസുകളും ചാര്‍ജ്ജ് ചെയ്യപ്പെട്ടിട്ടുണ്ട്. മനുഷ്യാവകാശകമ്മീഷനും, ഹൈക്കോടതിയും മനുഷ്യന് ഭീഷണിവിതക്കുന്ന നായകളെ കൊല്ലാമെന്ന വിധിപുറപ്പെടുവിച്ചിട്ടുണ്ടെങ്കിലും നായയെ പിടികൂടാന്‍ ആളില്ലാത്തതും പുതിയ പ്രതിസന്ധി സൃഷ്ടിക്കുന്നുണ്ട്.
നഗസഭാ പ്രദേശത്തെ ജനപ്രതിനിധികള്‍ക്ക് ഏറ്റവും വെല്ലുവിളിയായിരിക്കുന്നതും തെരുവുനായകളെ സംബന്ധിച്ചുള്ള പരാതികളാണ്. വന്ധ്യംകരിക്കാന്‍ പിടികൂടുന്ന നായകളെ വീണ്ടും തെരുവുകളിലേക്ക് വിടുന്നതും നാട്ടുകാര്‍ക്ക് ഭീഷണിവര്‍ദ്ധിപ്പിക്കുകയാണ്. പടിഞ്ഞാറന്‍ കൊച്ചിയില്‍ മാത്രം ഒരു മാസം കൊണ്ട് 14 ഓളം പേര്‍ക്ക് നായയുടെ ആക്രമണത്തില്‍ പരിക്കേറ്റിരുന്നു.
