കാശിമഠാധിപതി സുധീന്ദ്രതീര്ത്ഥസ്വാമികളുടെ പട്ടശിഷ്യന് ശ്രീമദ് സംയമീന്ദ്രതീര്ത്ഥ മഠം ഉത്തരാധികാരിയായി 2002 അവരോധിതനായി. ഹരിദ്വാറില് ഗംഗാതീരത്ത് ജൂണില് നടന്ന സന്ന്യാസദീക്ഷാചടങ്ങുകളോടെ ശിഷ്യനായി അവരോധിതനായ സംയമീന്ദ്രതീര്ത്ഥ കാശിമഠാനുബന്ധ ആചാരനിഷ്ഠകളും ശാസ്ത്ര-ഭാഷ-വേദ-പൂജാദിമന്ത്രങ്ങളും പഠനം നടത്തിയാണ് മഠം ഉത്തരാധികാരിയായത്.
എറണാകുളം ജില്ലയിലെ വടക്കന് പറവൂര് ദേശത്ത് സുരേന്ദ്ര മല്ല്യ-വിന്ദില ദമ്പതികളുടെ രണ്ടാമത് പുത്രന് ഉമേശ്മല്ല്യയെ ജാതകനിരീക്ഷണത്തിലൂടെയാണ് ശിഷ്യനായി പ്രഖ്യാപനം നടത്തിയത്. ബി.കോം രണ്ടാം വര്ഷ ബിരുദവിദ്യാര്ത്ഥിയായ ഉമേശ് മല്ല്യയെ ഗംഗാതീര വ്യാസാശ്രമങ്കണത്തില് വെച്ച് ദീക്ഷനല്കി സംയമീന്ദ്രതീര്ത്ഥ സ്വാമികളെന്ന നാമധേയവും പ്രഖ്യാപിക്കപ്പെട്ടപ്പോള് ജിഎസ്ബി സമുദായത്തിനും കാശിമഠനത്തിനും പുതിയൊരു ഉണര്വ്വാണ് ധര്മ്മഗുരു പകര്ന്നുനല്കിയത്. ഒരു വ്യാഴവട്ടക്കാലം പിന്നിട്ട സന്ന്യാസ ജീവിതത്തില് സംയമീന്ദ്രതീര്ത്ഥ സ്വാമികള് വ്രതനിഷ്ഠകളും സുധീന്ദ്രതീര്ത്ഥ സ്വാമി ഹസ്തങ്ങളാല് ലഭിച്ച സാളഗ്രാമപൂജയും ജപ-തപ-പാരായണവുമായി കാശിമഠ ശിഷ്യഗണങ്ങളില് ആത്മീയഗുരുസ്ഥാനീയാംഗീകാരവും നേടിക്കഴിഞ്ഞു.
ചാതുര്മാസവ്രതാനുഷ്ഠാനം നടത്തുന്നതോടൊപ്പം സമുദായക്ഷേത്രദര്ശനവും ധര്മ്മപ്രചാരണവും നടത്തി വന്നിരുന്ന സംയമീന്ദ്രതീര്ത്ഥ സ്വാമികള് കൈവിട്ടുവെന്ന് കരുതിയ കാശിമഠ പൂജാബിംബങ്ങള് തിരികെ നേടി 2012-ല് പ്രതിഷ്ഠാകര്മ്മങ്ങള് നടത്തിയതോടെ ഗുരുപരമ്പര പൂജിച്ച ദേവവിഗ്രഹ നിത്യപൂജയ്ക്കും നിയുക്തനായി. കാശിമഠത്തിന്റെ മാര്ഗ്ഗവും മാനവും മഹിമയും തിരിച്ചറിഞ്ഞ് മഠപരമ്പര ഗുരുമൂല്യങ്ങളെ ഉയര്ത്തി ജിഎസ്ബി സമൂഹത്തിന് പ്രേരണാശക്തിയായും മാറിക്കഴിഞ്ഞു. സുധീന്ദ്രതീര്ത്ഥ സ്വാമികളുടെ നവതി ആഘോഷങ്ങള്ക്ക് മാര്ഗ്ഗദര്ശനവും നേതൃത്വവും ഏറ്റെടുത്ത് മാസങ്ങള്മുമ്പേ ഹരിദ്വാര് വ്യാസാശ്രമത്തില് സംയമീന്ദ്രതീര്ത്ഥ സ്വാമികള് സന്നിഹിതനായിരുന്നു.
