തലശ്ശേരി: തലശ്ശേരി ഗവണ്‍മെന്റ് ബ്രണ്ണന്‍ കോളേജിന്റെ 125-ാം വാര്‍ഷികത്തിന്റെ ഭാഗമായി 14 മുതല്‍ 18 വരെ നടത്തുന്ന അഖിലേന്ത്യാ ശാസ്ത്ര-സാങ്കേതിക-വിദ്യാഭ്യാസ-വ്യാവസായിക-കാര്‍ഷിക പ്രദര്‍ശനം ‘ബ്രണ്ണന്‍ എക്‌സ്‌പോ’യുടെ ഒരുക്കങ്ങള്‍ പൂര്‍ത്തിയായി. ഐഎസ്ആര്‍ഒ സ്റ്റേറ്റ് ആര്‍ക്കൈവ്‌സ്, ഇന്ത്യന്‍ നേവി, സിഎംഎഫ്ആര്‍ഐ, ബിഎസ്എന്‍എല്‍, കേരള ഫോറസ്റ്റ് റിസര്‍ച്ച് ഇന്‍സ്റ്റിറ്റ്യൂട്ട്, കൃഷി വകുപ്പ്, കാര്‍ഷികഫാമുകള്‍, മെഡിക്കല്‍ ഡെന്റല്‍, ആയുര്‍വേദ, നഴ്‌സിങ്ങ് കോളേജുകള്‍, എന്‍.ടി.ടി.എഫ്, പ്രമുഖ പത്രസ്ഥാപനങ്ങള്‍, സാങ്കേതിക വിദ്യാഭ്യാസ സ്ഥാപനങ്ങള്‍, വൈദ്യുതിബോര്‍ഡ്, ജയില്‍, റബ്‌കോ, റെയ്ഡ്‌കോ തുടങ്ങി എഴുപതോളം കേന്ദ്ര-സംസ്ഥാന സര്‍ക്കാര്‍-അര്‍ധസര്‍ക്കാര്‍-സഹകരണ സ്ഥാപനങ്ങള്‍ പങ്കെടുക്കുന്ന പ്രദര്‍ശനത്തിനുവേണ്ടി 120-ഓളം സ്റ്റാളുകള്‍ തയ്യാറാക്കിയിട്ടുണ്ട്. ജില്ലാ കുടുംബശ്രീ മിഷന്‍, മില്‍മ, ദിനേശ് തുങ്ങിയ സ്ഥാപനങ്ങളുടെ ഫുഡ്‌കോര്‍ട്ട് ഒരുക്കുന്നുണ്ട്. അഖിലേന്ത്യാപ്രദര്‍ശനത്തിന്റെ പ്രവേശന കവാടം പ്രശസ്ത ചിത്രകാരന്‍ സെല്‍വന്‍ മേലൂരാണ് രൂപകല്‍പ്പന ചെയ്തത്.
അജീബ് കൊമാച്ചിയുടെ ഫോട്ടോപ്രദര്‍ശനം, ചിത്രപ്രദര്‍ശനം, ബ്രണ്ണന്‍ മലയാളസമിതിയുടെ ഫോട്ടോപ്രദര്‍ശനം, സിനിമാപ്രദര്‍ശനം, നാണയ-സ്റ്റാമ്പ് പ്രദര്‍ശനം, വിത്തുംകൈക്കോട്ടും, പാമ്പ് ബോധവല്‍ക്കരണം, തല്‍സമയ മണ്‍പാത്രനിര്‍മ്മാണം, പക്ഷിക്കൂട് പ്രദര്‍ശനം, ഓര്‍മ്മകളിലെ ബ്രണ്ണന്‍ തുടങ്ങിയവയും പ്രദര്‍ശനത്തിന്റെ ഭാഗമായുണ്ടാവും. സ്‌കൂള്‍-കോളേജ് വിദ്യാര്‍ത്ഥികള്‍ക്കും പൊതുജനങ്ങള്‍ക്കും ഈ വൈജ്ഞാനിക പ്രദര്‍ശനം കാണുന്നതിന് വേണ്ട സൗകര്യങ്ങള്‍ ഒരുക്കിയിട്ടുണ്ടെന്ന് എക്‌സിബിഷന്‍ കമ്മിറ്റി അറിയിച്ചു.
