കൊച്ചി: എറണാകുളം ശിവക്ഷേത്ര ഉത്‌സവത്തിന് മുന്നോടിയായി നടത്തുന്ന ദ്രവ്യകലശാഭിഷേകത്തിന്റെ ചടങ്ങുകള്‍ ആരംഭിച്ചു. ക്ഷേത്രം തന്ത്രിമാരായ പൊതിയില്‍ ചേന്നാസ് ഗിരീശന്‍ നമ്പൂതിരിയെ ആചാര്യനായി വരിച്ചുകൊണ്ട് വസ്ത്രവും ദക്ഷിണയും സമര്‍പ്പിച്ച് ആചാര്യവരണം നടന്നു. പുലിയന്നൂര്‍ മുരളീനാരായണന്‍ നമ്പൂതിരി, ചേന്നാസ് ചെറിയനാരായണന്‍ നമ്പൂതിരി എന്നിവര്‍ സഹാചാര്യന്മാരായിരുന്നു. ക്ഷേത്രം മേല്‍ശാന്തിമാരായ ബി.വി. ഗണേശന്‍ എമ്പ്രാന്തിരി, ഏറന്നൂര്‍ നാരായണന്‍ നമ്പൂതിരി എന്നിവര്‍ സഹകാര്‍മികത്വം വഹിച്ചു. തുടര്‍ന്ന് പ്രസാദശുദ്ധി, ബിംബശുദ്ധി ക്രിയകള്‍, രക്ഷോഘ്‌നഹോമം, ആവഹന്തിഹോമം എന്നിവയും നടന്നു.
രാവിലെ ഉത്‌സവത്തോടനുബന്ധിച്ച് നടത്തുന്ന പ്രസാദ ഊട്ടിനുള്ള അരി, പച്ചക്കറി, പലവ്യഞ്ജനങ്ങളുമായി ക്ഷേത്രം മേല്‍ശാന്തി ബി.വി. ഗണേശന്‍ എമ്പ്രാന്തിരിയുടെ നേതൃത്വത്തില്‍ ഭക്തജനങ്ങളുടെ സഹകരണത്തോടെ കലവറനിറയ്‌ക്കല്‍ ചടങ്ങും നടന്നു. ദേവസ്വം ഓഫീസര്‍ പി.ബി. ബിജു, ഉത്‌സവാഘോഷകമ്മറ്റി പ്രസിഡന്റ് പി. രാജേന്ദ്രപ്രസാദ്, സെക്രട്ടറി ഐ.എന്‍. രഘു, ജോ.സെക്രട്ടറി കെ.എന്‍. ചന്ദ്രശേഖരന്‍, പി. വേണുഗോപാല്‍, എ.ആര്‍. കൃഷ്ണന്‍ എന്നിവരുടെ നേതൃത്വത്തില്‍ ഭക്തജനങ്ങള്‍ നാമജപത്തോടെ ക്ഷേത്രം വലംവെച്ച് വിഭവങ്ങള്‍ ഭഗവാന് മുമ്പില്‍ സമര്‍പ്പിച്ചു.
രാവിലെയും വൈകുന്നേരും കൂട്ടവെടി വഴിപാട്. നിറമാല, വിളക്കുവെപ്പ് എന്നിവയും ആദിത്യ. എസ്. പൈയുടെ കീബോര്‍ഡ് കച്ചേരിയും നടന്നു. വ്യാഴാഴ്ച രാവിലെ ബിംബശുദ്ധിക്രിയകള്‍, പരികലശപൂജകള്‍, ബ്രഹ്മകലശപൂജ, അധിവാസഹോമം എന്നിവ നടക്കും. വൈകിട്ട് 6.30ന് നടപ്പുര ഒന്നാംഘട്ട സമര്‍പ്പണവും ചക്കംകുളങ്ങര ഭജനസമിതിയുടെ നാമസങ്കീര്‍ത്തനവും നടക്കും.
