തലശ്ശേരി: വിവേകാനന്ദ സ്വാമികളുടെ 125-ാം ജന്മദിനാഘോഷങ്ങളുടെ ഭാഗമായി ഭാരതീയ വിചാരകേന്ദ്രം തലശ്ശേരിയുടെയും സംസ്കൃതി തിരുവങ്ങാടിന്റെയും സംയുക്താഭിമുഖ്യത്തില് വിവേകാനന്ദ ജയന്തി വിചാരയജ്ഞം സംഘടിപ്പിക്കുമെന്ന് സംഘാടകര് പത്രസമ്മേളനത്തില് അറിയിച്ചു. ആഘോഷത്തിന്റെ ഭാഗമായി വിദ്യാര്ത്ഥികള്ക്കായി പ്രസംഗമത്സരവും ഉപന്യാസ മത്സരവും നടന്നുകഴിഞ്ഞു. ഇന്ന് തലശ്ശേരി ടാഗോര് വിദ്യാപീഠത്തില് വെച്ച് ക്വിസ് മത്സരം നടക്കും. സ്വാമിജിയുടെ ജന്മദിനമായ 12 ന് പുതിയ ബസ് സ്റ്റാന്റ് പരിസരത്ത് സ്വാമജിയുടെ ഛായാചിത്രത്തിന് മുന്നില് പുഷ്പാര്ച്ചനയും വൈകുന്നേരം 6 മണിക്ക് സ്വാമി വിവേകാന്ദന്റെ ജീവിതത്തെ ആസ്പദമാക്കിയുള്ള ഡോക്യുമെന്ററി വീഡിയോ പ്രദര്ശനവും ഉണ്ടായിരിക്കും. ആഘോഷ പരിപാടികളുടെ സമാപനം കുറിച്ചുകൊണ്ട് 16 ന് വൈകുന്നേരം 4 മണിക്ക് പുതിയ ബസ് സ്റ്റാന്റ് പരിസരത്ത് നടക്കുന്ന സാംസ്കാരിക സമ്മേളനത്തില് ഞാനറിഞ്ഞ സ്വാമി വിവേകാനന്ദന് എന്ന വിഷയത്തെ ആസ്പദമാക്കി ഡോ.എം.എം.ബഷീറും സ്ത്രീ സമൂഹവും സനാതന ധര്മ്മവും-സ്വാമി വിവേകാനന്ദന്റെ വീക്ഷണത്തില് എന്ന വിഷയത്തെ ആസ്പദമാക്കി ഹിന്ദു ഐക്യവേദി സംസ്ഥാന അധ്യക്ഷ കെ.പി.ശശികല ടീച്ചറും പ്രഭാഷണം നടത്തും. ഭാരതീയ വിചാരകേന്ദ്രം പഠന ഗവേഷണ കേന്ദ്രം, സംസ്കൃതി തിരുവങ്ങാട് എന്നിവയെക്കുറിച്ച് വിചാരകേന്ദ്രം ജില്ലാ പ്രസിഡണ്ട് രവീന്ദ്രനാഥ് ചേലേരി സംസാരിക്കും. തുടര്ന്ന് വിവിധ മത്സര വിജയികള്ക്കുള്ള സമ്മാനദാനവും നടക്കും.
പത്രസമ്മേളനത്തില് സംഘാടക സമിതി പ്രസിഡണ്ട് ഇ.എന്.വിശ്വനാഥന്, ഉപാധ്യക്ഷന്മാരായ റഷീദ് പാനൂര്, സി.കെ.രഘുനാഥന്, ജനറല് കണ്വീനര് കെ.അനില് കുമാര് എന്നിവര് പങ്കെടുത്തു.
