നെയ്യാറ്റിന്കരയില് തിരുവനന്തപുരം റവന്യൂ ജില്ലാ കലോത്സവത്തിന്റെ ഉദ്ഘാടനത്തിന് മുന്നോടിയായി ഘോഷയാത്രയ്ക്ക് അണിനിരന്ന വിദ്യാര്ഥിനികള് സെല്ഫിയെടുക്കുന്നു
ചിത്രം – അനില് ഗോപി
നെയ്യാറ്റിന്കര: സംഗീതജ്ഞന്മാരായ നെയ്യാറ്റിന്കര വാസുദേവന്റെയും മോഹനചന്ദ്രന്റെയും അനുഗ്രഹീത ചലച്ചിത്ര നടി നെയ്യാറ്റിന്കര കോമളത്തിന്റെയും നാട്ടില് റവന്യൂ ജില്ലാ കലോത്സവത്തിന് വര്ണശബളമായ തുടക്കം. ഇനി മൂന്നുനാള് നെയ്യാറിന് തീരത്ത് ചിലങ്കയുടെ താളമേളങ്ങള്. എസ്എന് ആഡിറ്റോറിയത്തില് നിന്നാരംഭിച്ച ഘോഷയാത്രയോടെയാണ് കലാമാമാങ്കത്തിന് തുടക്കമായത്. രാവിലെ ജില്ലാ ഉപ വിദ്യാഭ്യാസ ഓഫീസര് പതാക ഉയര്ത്തിയതോടെ രചനാ മത്സരങ്ങള്ക്ക് തുടക്കമായിരുന്നു. ഉദ്ഘാടനത്തിനുശേഷം തിരുവാതിരക്കളി മത്സരത്തിനും കേരള നടനവും ആരംഭിച്ചു.
നെയ്യാറ്റിന്കര നഗരസഭ ചെയര്പേഴ്സണ് ഡബ്ല്യൂ. ആര്. ഹീബ സാംസ്കാരികഘോഷയാത്ര ഫഌഗ്ഓഫ് ചെയ്തു. കേരളത്തനിമയില് നടന്ന ഘോഷയാത്രയില് വിവിധ വേഷവിധാനങ്ങള് അണിനിരന്നു. സാംസ്കാരിക നായകന്മാരും സമൂഹ്യ പരിഷ്കാര്ത്തക്കളുമെല്ലാം വിദ്യാര്ഥികളിലൂടെ പുനരാവിഷ്കരിക്കപ്പെട്ടപ്പോള് നെയ്യാറ്റിന്കരപട്ടണം മറ്റൊരു ചരിത്രസംഗമത്തിനു വേദിയാവുകയായിരുന്നു.
ശ്രീനാരായണഗുരുദേവനും ചട്ടമ്പസ്വാമിയും അയ്യന്കാളിയും സ്വാമി വിവേകാനന്ദനുമെല്ലാം കൈകോര്ത്ത് നീങ്ങിയ ഘോഷയാത്രയില് നിരവധി വാദ്യമേളങ്ങളും സ്ഥാനം പിടിച്ചു. പൂമ്പാറ്റകളുടെ വേഷത്തില് കുരുന്നുകളും കേരളവേഷത്തില് കുഞ്ഞുമങ്കമാരും നിരന്ന യാത്രയെ വരവേല്ക്കാന് നിരവധിപേര് ഘോഷയാത്ര കടന്നുപോയ വീഥിക്ക് ഇരുവശവും തടിച്ചുകൂടി. സ്റ്റുഡന്റസ് പോലീസ് കേഡറ്റുകള്, എന്സിസി, എന്എസ്എസ് എന്നിവരുടെ മാര്ച്ചും ചിട്ടയോടെ പങ്കെടുത്തു. പ്ലാസ്റ്റിക് പൂര്ണമായും ഒഴിവാക്കി ഹരിതഘോഷയാത്രയായിരുന്നു സംഘാടകര് ഒരുക്കിയത്.
പ്രാധാന വേദിയായ ഗവ. ബിഎച്ച്എസ്എസില് ഘോഷയാത്ര സമാപിച്ചു. തുടര്ന്ന് നടന്ന ഉദ്ഘാടനസമ്മേളനം നഗരസഭ ചെയര്പേഴ്സണ് ഡബ്ല്യൂ.ആര്. ഹീബയുടെ അധ്യക്ഷതയില് ഡെപ്യൂട്ടി സ്പീക്കര് പാലോട് രവി ഉദ്ഘാടനം ചെയ്തു. മത്സരം വിദ്യാര്ഥികള് തമ്മിലാകണമെന്നും അമ്മമാര് ഇതിനു മുതിരരുതെന്നും ഡപ്യൂട്ടി സ്പീക്കര് പറഞ്ഞു. ജില്ലാ വിദ്യാഭ്യാസ ഡെപ്യൂട്ടി ഡയറക്ടര് ബി. വിക്രമന്, സ്റ്റാന്റിംഗ് കമ്മറ്റി ചെയര്മാന്മാരായ പുന്നക്കാട് സാജു, എന്.കെ. അനിതകുമാരി, കൗണ്സിലര്മാരായ ഹരികുമാര്, അനിതകുമാരി, ഗ്രാമം പ്രവീണ് തുടങ്ങിയവര് സംബന്ധിച്ചു. സബ് ജില്ലകളില് നിന്നായി അയ്യായിരത്തില് അധികം കലാപ്രതിഭകളാണ് മാറ്റുരയ്ക്കുന്നത്.
