പത്തനാപുരം: സഹോദരന്റെ മര്ദ്ദനമേറ്റ് ചികിത്സയിലായിരുന്ന അനുജന് മരിച്ചു. പുന്നല മഞ്ചാംകുന്ന് നാരങ്ങാവിള പുത്തന്വീട്ടില് അജയകുമാറാണ് (45)മരിച്ചത്. കേസുമായി ബന്ധപ്പെട്ട് അജയകുമാറിന്റെ ജ്യേഷ്ഠനായ സുരേന്ദ്രനെ(50) പത്തനാപുരം പോലീസ് അറസ്റ്റ് ചെയ്തു.
കഴിഞ്ഞ 17നാണ് സംഭവത്തിന് തുടക്കം. വിളവെടുത്ത കുരുമുളക് വിറ്റുകിട്ടിയ ഇരുപതിനായിരത്തോളം രൂപയില് നിന്നും കുറച്ച് പണം സുരേന്ദ്രന് അനുജന് അജയകുമാറിന് നല്കി. ഇരുവരുമൊന്നിച്ച് മദ്യപിച്ചശേഷം സന്ധ്യയോടെ മടങ്ങി. അന്ന് രാത്രിയില് മടങ്ങിവന്ന അജയകുമാര് പണം സംബന്ധിച്ച് സുരേന്ദ്രനുമായി വഴക്കുണ്ടായി. തര്ക്കത്തിനിടെ സുരേന്ദ്രന് നടക്കാനുപയോഗിക്കുന്ന വടിയെടുത്ത് അജയനെ മര്ദ്ദിച്ചു. മദ്യപിച്ച് വന്ന അജയന് മുറ്റത്തേക്ക് വീണ് ബോധരഹിതനായി. ഗുരുതരമായി പരിക്കേറ്റ അജയനെ മുറ്റത്ത് ഉപേക്ഷിച്ച് സുരേന്ദ്രനും കുടുംബവും കിടന്നുറങ്ങി. 18ന് രാവിലെ സുരേന്ദ്രന് വന്നു നോക്കുമ്പോള് അജയന് ഗുരുതരമായ പരിക്കാണെന്ന് മനസിലായി.
പുനലൂര് താലൂക്കാശുപത്രിയില് എത്തിച്ച് നടത്തിയ പരിശോധനയിലാണ് അജയന്റെ വാരിയെല്ലുകള് ഒടിയുകയും തലക്കും നെഞ്ചിനുമടക്കം ഗുരുതരമായി പരിക്കേറ്റതും അറിയുന്നത്. ഇതിനിടെ സുരേന്ദ്രന് ഒളിവില്പോയി. പ്രാഥമിക ചികിത്സ നല്കി തിരുവനന്തപുരം മെഡിക്കല് കോളജില് പ്രവേശിപ്പിച്ച് ഒരാഴ്ചയായി ചികിത്സയിലായിരുന്ന അജയന് ഇന്നലെ ഉച്ചയോടെയാണ് മരിച്ചത്. അജയന്റെ ഭാര്യ രാജിയുടെ പരാതിയെ തുടര്ന്ന് പത്തനാപുരം പോലീസ് കേസെടുത്ത ശേഷം സിഐ ബൈജുകുമാര്, എസ്ഐ രാഹുല്രവീന്ദ്രന് എന്നിവരുടെ നേതൃത്വത്തില് അന്വേഷണം നടത്തി. കൊലപാതകത്തിന് കേസെടുത്ത് സുരേന്ദ്രനെ അറസ്റ്റ് ചെയ്തു.
