നായാട്ടുപാറ: ദേശീയതയ്ക്കെതിരായ പ്രവര്ത്തനമാണ് ഭാരതത്തിലെ കമ്മ്യൂണിസ്റ്റുകളുടെ നയമെന്ന് രാഷ്ട്രീയ സ്വയംസേവക സംഘം സഹ പ്രാന്ത പ്രചാരക് എസ്. സുദര്ശന് അഭിപ്രായപ്പെട്ടു. ഭാരതത്തെ ഭാരതമായി നിലനിര്ത്താന് സനാതന ധര്മ്മമായ ഹിന്ദുത്വം ശക്തിപ്പെട്ടാല് മാത്രമേ സാധ്യമാകൂ എന്നും അദ്ദേഹം പറഞ്ഞു. നായാട്ടുപാറ കെപിസി ഹയര്സെക്കണ്ടറി സ്കൂളില് നടന്നുവരുന്ന രാഷ്ട്രീയ സ്വയംസേവക സംഘം പ്രാഥമിക ശിക്ഷാവര്ഗ്ഗിന്റെ സമാപനത്തോടനുബന്ധിച്ചുള്ള പരിപാടിയില് സംസാരിക്കുകയായിരുന്നു അദ്ദേഹം. മഹത്തായ ഹൈന്ദവ സംസ്കാരം ആചാരങ്ങളിലൂടെയും അനുഷ്ടാനങ്ങളിലൂടെയുമാണ് നിലനിന്നുവരുന്നത്. ഇന്ന് ലോകത്ത് കാണുന്ന എല്ലാ പ്രതിസന്ധികള്ക്കും പരിഹാരം കാണാന് ഹിന്ദുത്വ ദര്ശനത്തിന് മാത്രമേ കഴിയൂ എന്ന് ഭാരതത്തിലെ ദാര്ശനികര് മാത്രമല്ല, വൈദേശിക ചരിത്രകാരന്മാരും നിരീക്ഷകരും അഭിപ്രായം പറയുകയും ചെയ്തിട്ടുണ്ട്.
വൈജാത്യത്തിലെ ഏകത്വമെന്ന് കാഴ്ചപ്പാടാണ് ഈ ദര്ശനത്തെ മഹത്തരമാക്കുന്നത്. ഭാരതത്തിന്റെ ആഗോള ദൗത്യം നിര്വ്വഹിക്കുന്നതിന് വ്യക്തികളെയും മാതൃകകളെയും സൃഷ്ടിക്കുകയാണ് സംഘം അതിന്റെ പരിശീലനം കൊണ്ട് ഉദ്ദേശിക്കുന്നത്.
ഭാരതത്തില് നിന്നും ഹിന്ദുത്വം പറിച്ചെറിയുകയാണെങ്കില് അത് ഭാരതത്തിന്റെ സര്വ്വനാശത്തിന് കാരണമാകുമെന്ന് ഡോ.ആനിബസന്റ് പറഞ്ഞിട്ടുണ്ട്. മഹത്തായ സംസ്കാരത്തിന്റെ ശാക്തീകരണത്തിനായ് രാഷ്ട്രീയ സ്വയംസേവക സംഘം മുന്നോട്ട് പോകുമ്പോള് വളരെയേറെ പ്രതിസന്ധികള് നേരിടേണ്ടിവരുന്നുണ്ട്. കേരളത്തില് പ്രത്യേകിച്ച് കമ്മ്യൂണിസ്റ്റുകളില് നിന്ന്. വസ്തുതകള് പഠിക്കാതെ സംഘത്തിനെതിരെ പച്ചക്കള്ളം പടച്ചുവിടാന് നേതൃത്വം കൊടുക്കുകയാണവര്. ഒരുകാലത്ത് കമ്മ്യൂണിസ്റ്റ് രാജ്യങ്ങളായിരുന്നവര് ഇപ്പോള് അതില് നിന്നും വിമുക്തി നേടിക്കൊണ്ടിരിക്കുകയാണ്.
സഹിഷ്ണുത പഠിപ്പിക്കാന് മുന്നോട്ട് വരുന്ന കേരളത്തിലെ കമ്മ്യൂണിസ്റ്റുകള് സ്വന്ത് ചരിത്രം പഠിക്കാന് തയ്യാറാകണം. സ്വാതന്ത്ര്യ സമരത്തെ ഒറ്റുകൊടുക്കാന് തയ്യാറായവരാണവര് ക്വിറ്റ്ഇന്ത്യാ സമരം പോലുള്ളവ അതിന് ഉദാഹരണമാണ്. ചൈന ഭാരതത്തെ അക്രമിച്ചപ്പോള് ഭാരതത്തിനനുകൂലമായ നിലപാടെടുക്കാതെ ചൈനാ അനുകൂലമായ നിലപാടെടുത്തവരാണിവര്. ദേശ വിരുദ്ധര്ക്കെതിരെയുള്ള ഉയിര്ത്തെഴുന്നേല്പ്പാണ് ഭാരതത്തില് ഇപ്പോള് കണ്ടുവരുന്നതെന്നും സുശക്തമായ സമാജത്തിനായി നമുക്ക് ഒന്നിച്ചു പ്രവര്ത്തിക്കാന് സാധിക്കണമെന്നും എതിര്പ്പിനെയെല്ലാം മറികടന്ന് സമാജ ശാക്തീകരണത്തിനായി സംഘപ്രവര്ത്തകര് അക്ഷീണം പ്രവര്ത്തിക്കണമെന്നും അദ്ദേഹം പറഞ്ഞു.
സ്വാഗതസംഘം സെക്രട്ടറി ചെന്താമരാക്ഷന് അധ്യക്ഷത വഹിച്ചു. ശിബിര കാര്യവാഹ് കെ.പി.പ്രജില് സ്വാഗതം പറഞ്ഞു. ശിബിരാധികാരി സി.ബാലഗോപാലന് മാസ്റ്റര് വേദിയില് സന്നിഹിതനായിരുന്നു. കണ്ണൂര് വിഭാഗ് കാര്യവാഹ് വി.ശശിധരന്, ജില്ലാ കാര്യവഹ് കെ.പ്രമോദ് തുടങ്ങിയവര് പങ്കെടുത്തു. 19ന് ആരംഭിച്ച ശിബിരം ഇന്ന് സമാപിക്കും. സമാപന പരിപാടിക്ക് മുന്നോടിയായി ശിബിരാര്ത്ഥികള് പഥസഞ്ചലനം നടത്തി. ശിബിരാര്ത്ഥികളുടെ കായിക പ്രദര്ശനവും ഉണ്ടായിരുന്നു.
ദേശീയ ബാലശാസ്ത്ര കോണ്ഗ്രസില് പങ്കെടുത്ത വൈശാഖ് രമേശന്, ജിഷ്ണു മാധവന് എന്നിവരെയും സംസ്ഥാന അമ്പെയ്ത് മത്സരത്തില് കോബൗണ്ട് വിഭാഗത്തില് ചാമ്പ്യനായ സിദ്ധാര്ത്ഥ് രാജഗോപാലന്, സംസ്ഥാന അമ്പെയ്ത്തില് ഇന്ത്യന് റൗണ്ടില് സ്വര്ണ്ണം നേടിയ ഋഷികാ രാജഗോപാല്, ജില്ലാ സ്കൂള് അത്ലറ്റിക്സില് വ്യക്തിഗത ചാമ്പ്യനായ വി.കെ.ശ്രീഷ്ണു എന്നിവരെ എസ്.സുദര്ശന് അനുമോദിച്ചു.
