കൊച്ചി: സംസ്ഥാനത്ത് മൂന്നാം മുന്നണിക്ക് പ്രസക്തി വര്ദ്ധിച്ചുവെന്നും അടുത്ത നിയമസഭാ തെരഞ്ഞെടുപ്പില് കഴിഞ്ഞ തദ്ദേശ തെരഞ്ഞെടുപ്പിനേക്കാള് ഒരു മണ്ഡലത്തില് പതിനായിരം വോട്ടുകള് വീതം കൂടുതല് പിടിച്ചാല് ബിജെപിക്ക് 70 സീറ്റുകള് ലഭിക്കുമെന്നും എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് പറഞ്ഞു.
കൊച്ചി ഗുരുദേവ സത്സംഗത്തിന്റെ ശ്രീനാരായണ ധര്മ്മപഠന ശിബിരം പാലാരിവട്ടം ശ്രീരാജരാജേശ്വരി ക്ഷേത്രഹാളില് ഉദ്ഘാടനം ചെയ്യുകയായിരുന്നു അദ്ദേഹം.
ഞാന് നരേന്ദ്രമോദിയെ കണ്ടതാണ് ഏറ്റവും വലിയ പ്രശ്നം. പിന്നാക്കക്കാരനായ പ്രധാനമന്ത്രി പങ്കെടുത്ത ചടങ്ങിന് ശേഷം അവിടെ ചാണകവെള്ളം തളിച്ചത് ചാതുര്വര്ണ്യത്തിന്റെ വക്താക്കളാണ്. മുഖ്യമന്ത്രിക്ക് കൈ കൊടുത്താണ് അദ്ദേഹം മടങ്ങിയത്. അങ്ങനെയെങ്കില് മുഖ്യമന്ത്രി ഡറ്റോള് ഉപയോഗിച്ച് കൈ കഴുകണമല്ലോയെന്നും വെള്ളാപ്പള്ളി ചോദിച്ചു.
സത്സംഗം പ്രസിഡന്റ് ഇ.ടി ഗോപാലകൃഷ്ണന് അദ്ധ്യക്ഷത വഹിച്ചു. എസ്എന്ഡിപി യോഗം കണയന്നൂര് യൂണിയന് ചെയര്മാന് എല്. ശിവാനന്ദന്, കണ്വീനര് പി.ഡി. ശ്യാംദാസ്, എം.വി. പ്രതാപന് ചേന്ദമംഗലം എന്നിവര് പ്രസംഗിച്ചു. ഗിരിജ രവി സ്വാഗതവും വി.കെ. അനില്കുമാര് നന്ദിയും പറഞ്ഞു.
