കൊച്ചി: കേരളത്തിന്റെ തൊഴില്‍ സംസ്‌കാരത്തില്‍ മാറ്റമുണ്ടാകേണ്ടത് അനിവാര്യമാണെന്നും മെച്ചപ്പെട്ട തൊഴില്‍ സംസ്‌കാരത്തിനായി സമൂഹത്തിന്റെ എല്ലാ മേഖലകളിലുമുള്ളവര്‍ മുന്നോട്ടു വരണമെന്നും കരയോഗം നവതി ആഘോഷങ്ങളോടനുബന്ധിച്ച് ‘മാറുന്ന തൊഴില്‍ സംസ്‌കാരം’ എന്ന വിഷയത്തില്‍ ടിഡിഎം ഹാളില്‍ സംഘടിപ്പിച്ച സെമിനാര്‍ അഭിപ്രായപ്പെട്ടു. കേരളത്തിന്റെ നഷ്ടപ്പെട്ട കാര്‍ഷിക സംസ്‌കാരം തിരിച്ചുപിടിക്കുന്നതിന് സര്‍ക്കാര്‍ സംവിധാനങ്ങള്‍ കൃഷിയിടങ്ങളിലേക്ക് ഇറങ്ങിച്ചെല്ലണമെന്ന് സെമിനാര്‍ ഉദ്ഘാടനം ചെയ്ത ജസ്റ്റിസ് സി.എന്‍. രാമചന്ദ്രന്‍നായര്‍ പറഞ്ഞു. കര്‍ഷകര്‍ക്ക് പ്രയോജനമില്ലാത്ത ഇന്നത്തെ കൃഷി ഓഫീസുകളെയും കൃഷി ഓഫീസര്‍മാരെയും കൃഷിയിടങ്ങള്‍ക്ക് പ്രയോജനപ്പെടുന്ന രീതിയില്‍ വിന്യസിക്കണം. ഇന്ധന വിലയില്‍ വലിയ പങ്ക് സര്‍ക്കാര്‍ നികുതിയിനത്തില്‍ ഈടാക്കുകയാണ്. ജനങ്ങളില്‍ നിന്ന് പിരിച്ചെടുക്കുന്ന ഈ പണത്തിന്റെ ഒരു വിഹിതം കാര്‍ഷിക സബ്‌സിഡിയായി ലഭ്യമാക്കണം. കര്‍ഷകര്‍ക്ക് വലിയ തോതില്‍ സബ്‌സിഡി നല്‍കുന്ന യൂറോപ്യന്‍ രാജ്യങ്ങളുടെ മാതൃക നമുക്കും പിന്തുടരാന്‍ കഴിയും. സമൂഹത്തിന് സേവനം നല്‍കുന്നവര്‍ക്കെല്ലാം ക്ഷേമനിധിയും നിത്യപെന്‍ഷനും ലഭിക്കണം. ഗള്‍ഫ് രാജ്യങ്ങളില്‍ നിന്ന് ഭാവിയില്‍ ലക്ഷക്കണക്കിന് മലയാളികള്‍ കേരളത്തിലേക്ക് തിരിച്ചുവരുമ്പോഴുണ്ടാകാനിടയുള്ള ദുരന്തം മുന്നില്‍ കണ്ട് അതിനെ നേരിടാന്‍ സര്‍ക്കാരും സമൂഹവും സജ്ജമാകണമെന്നും ഇതിനായി നിയമസംവിധാനങ്ങളില്‍ മാറ്റം വരുത്തണമെന്നും രാമചന്ദ്രന്‍നായര്‍ നിര്‍ദേശിച്ചു.
കര്‍ഷകനും കര്‍ഷകത്തൊഴിലാളിക്കും അര്‍ഹിക്കുന്ന മാന്യതയും ബഹുമാനവും നല്‍കാന്‍ സമൂഹവും അധികാരികളും തയ്യാറാകാത്തതാണ് ജനം കൃഷി ഉപേക്ഷിക്കാനുള്ള പ്രധാന കാരണമെന്ന് ബിഎംഎസ് സംസ്ഥാന പ്രസിഡണ്ട് കെ.കെ. വിജയകുമാര്‍ അഭിപ്രായപ്പെട്ടു. ഓരോ തൊഴിലിനും സമൂഹത്തില്‍ ലഭിക്കുന്ന മാന്യതയും അംഗീകാരവും വളരെ പ്രധാനപ്പെട്ടതാണ്. ഗള്‍ഫില്‍ കൂലിപ്പണിയെടുക്കുന്നവനും നാട്ടില്‍ കൂലിപ്പണിയെടുക്കുന്നവനും സമൂഹം നല്‍കുന്ന അംഗകാരത്തിന്റെ തോത് വ്യത്യസ്തമാണെന്നും അദ്ദേഹം പറഞ്ഞു.
തൊഴില്‍ മേഖലയിലുണ്ടായ മാറ്റങ്ങള്‍ തൊഴിലാളി യൂണിയനുകളുടെ പ്രസക്തി തന്നെ നഷ്ടപ്പെടുത്തിയിരിക്കുകയാണെന്ന് ഐഎന്‍ടിയുസി നേതാവും മുന്‍ എംപിയുമായ എ.സി. ജോസ് അഭിപ്രായപ്പെട്ടു. മാനേജ്‌മെന്റുകളോട് സമരം ചെയ്തിരുന്ന തൊഴിലാളികള്‍ ഇന്ന് മാനേജ്‌മെന്റുകളെ സഹായിക്കുകയും മാനേജ്‌മെന്റിന്റെ ഭാഗമായി നില്‍ക്കുകയും ചെയ്യുന്നു. തൊഴിലാളികളും മാനേജ്‌മെന്റുകളും പരസ്പരം മനസിലാകുന്ന രീതിയിലേക്ക് മാറിക്കഴിഞ്ഞു. പിന്നോക്ക സംസ്ഥാനങ്ങളിലെ സ്ത്രീകളുടെ ജീവിത സാഹചര്യം മെച്ചപ്പെടുത്താനായി നടപ്പിലാക്കിയ തൊഴിലുറപ്പ് പദ്ധതി കേരളത്തില്‍ ദുരുപയോഗം ചെയ്യപ്പെടുകയാണെന്നും എ.സി. ജോസ് പറഞ്ഞു. ട്രേഡ് യൂണിയന്‍ പ്രവര്‍ത്തനം ഇന്ന് ഉദ്യോഗമായി മാറിയിരിക്കുകയാണെന്നും തൊഴിലാളി വര്‍ഗം വര്‍ഗപരമായ കടമകള്‍ വിസ്മരിച്ച് ഉടമകള്‍ക്ക് വേണ്ടി വക്കീല്‍പണി ചെയ്യുന്നവരായി മാറുകയാണെന്നും മുന്‍ മന്ത്രിയും സിപിഐ നേതാവുമായ ബിനോയ് വിശ്വം പറഞ്ഞു. ഡോ. എം.പി. സുകുമാരന്‍നായര്‍ മോഡറ്ററായി. പി. സകുമാര മേനോന്‍ നന്ദി പറഞ്ഞു.
