തൊടുപുഴ: കോടതിയേയും പോലീസിനെയും കബളിപ്പിച്ച് യുവാവിനെ ജാമ്യത്തിലിറക്കാന് സഹായിച്ച കേസില് ഒരാള് പിടിയില്.കരമടച്ചതായി കാണിച്ച് വ്യാജ രസീത് ഉണ്ടാക്കിയാണ് തട്ടിപ്പ് നടത്തിയത്. കഴിഞ്ഞ മാസം പത്തിന് കഞ്ചാവ് കേസില് ശിക്ഷിക്കപ്പെട്ട് ജയിലില് കഴിഞ്ഞ ജിജോയെ ജാമ്യത്തിലിറക്കാന് മുട്ടം കോടതിയില് വ്യാജ രസീത് ഹാജരാക്കിയ ആലക്കോട് ശൗര്യംമാക്കല് സണ്ണി തോമസി(50)നെയാണ് പോലീസ് പിടികൂടിയത്. ഇയാള് ഇത്തരത്തില് തട്ടിപ്പ് നടത്തിയെന്ന് പോലീസിന് വിവരം ലഭിച്ചിരുന്നു. ആലക്കോട് വില്ലേജിലെ രസീതില് കരിമണ്ണൂര് വില്ലേജിലെ സീലായിരുന്നു ഉണ്ടായിരുന്നത്. കംപ്യൂട്ടര് സഹായത്തോടെയാണ് വ്യാജ രസീത് നിര്മ്മിച്ചത്. പ്രതിയെ കോടതിയില് ഹാജരാക്കിയ സമയത്ത് ജാമ്യത്തിനായി കരം അടച്ച രസീതാവശ്യപ്പെട്ടപ്പോള് വളരെ പെട്ടന്ന് രേഖ ഹാജരാക്കി എന്ന് പോലീസിന് വിവരം ലഭിച്ചിരുന്നു. ഇത് പോലീസിന് സംശയത്തിന് ഇടയാക്കിയിരുന്നു. തുടര്ന്ന് നടന്ന അന്വേഷണമാണ് പ്രതിയെ പിടികൂടാന് സഹായിച്ചത്. നഗരത്തില് ഇത്തരം കേസുകള്ക്ക് ജാമ്യമെടുക്കുന്നതിനായി വന് തുക പാരിതോഷികമായി വാങ്ങുന്ന സംഘം പ്രവര്ത്തിക്കുന്നുണ്ടെന്നാണ് രഹസ്യ വിവരം. 2500 രൂപയാണ് ഒരു ജാമ്യമെടുത്തു നല്കുന്നതിനു ഇയാള്ക്ക് ലഭിച്ചിരുന്ന പ്രതിഫലം. നിരവധി കേസുകളില് ഉള്പ്പെട്ട സംഘങ്ങളുടെ ജാമ്യ വിവരങ്ങള് പോലീസ് ശേഖരിച്ചുവരികയാണ്. കേസ് തൊടുപുഴ പോലീസ് കഞ്ഞാര് പോലീസിനു കൈമാറും. തൊടുപുഴ പ്രിന്സിപ്പല് എസ് ഐ വിനോദ്കുമാര്, വി എം ജോസഫ്, ഷാഡോ പോലീസ് എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. കേസില് കൂടുതല് പ്രതികള് ഉള്പ്പെട്ടിട്ടുണ്ടോ എന്ന് പോലീസ് അന്വേഷിച്ച് വരികയാണ്. പ്രതിയെ ഇന്ന് കോടതിയില് ഹാജരാക്കും.
കരംകെട്ടിയ വ്യാജ രസീത് നിര്മ്മിച്ച് ജാമ്യമെടുക്കല്; ഒരാള് പിടിയില്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.