കൊച്ചി: എറണാകുളം കരയോഗം നവതി ആഘോഷത്തിന്റെ രണ്ടാം ദിവസമായ ഇന്നലെ നവരത്ന പ്രതിഭകളായി തെരഞ്ഞെടുക്കപ്പെട്ടവര്ക്ക് പുരസ്ക്കാരം നല്കി ആദരിച്ചു. പ്രശസ്ത പത്രപ്രവര്ത്തകന് ടി.വി.ആര്. ഷേണായി, നടന് പത്മശ്രീ മധു, വ്യവസായി അഡ്വ. സി.കെ. മേനോന്, ഡോ. എം. ലീലാവതി, പ്രൊഫ. എം.കെ. സാനു, ഡോ. വി.പി. ഗംഗാധരന്, ഡോ. എ. സുകുമാരന് നായര്, അഡ്വ. പി.ജി. പരമേശ്വര പണിക്കര്, ഗായിക സുജാത മോഹന് എന്നിവരെ മാതൃഭൂമി ചെയര്മാനും മാനേജിംഗ് ഡയറക്ടറുമായ എംപി വീരേന്ദ്രകുമാര് പുരസ്കാരം നല്കി ആദരിച്ചു.
ടിഡിഎം ഹാളില് നടന്ന ചടങ്ങ് മുന് കേന്ദ്രമന്ത്രി ഒ. രാജഗോപാല് ഉദ്ഘാടനം ചെയ്തു.
സംഘര്ഷവും അസൂയയും സംഘട്ടനങ്ങളും വിദ്വേഷവും മുറ്റി നില്ക്കുന്ന ഈ കാലഘട്ടത്തില് എറണാകുളം കരയോഗം പോലുള്ള സംഘടനകള്ക്ക് സമൂഹത്തില് വലിയ പങ്ക് വഹിക്കാനുണ്ടെന്ന് ചടങ്ങ് ഉദ്ഘാടനം ചെയ്ത ഒ. രാജഗോപാല് പറഞ്ഞു. സംഘടനകള് സംഘടിതമായ സ്വാര്ഥ ലാഭത്തിനും പ്രത്യേക വിഭാഗത്തിന്റെ പുരോഗതിക്കും മാത്രമായി പ്രവര്ത്തിച്ചുകൊണ്ടിരിക്കുന്ന കാലഘട്ടത്തില് ലോകാ സമസ്താ സുഖിനോ ഭവന്തു എന്ന പരമ്പരാഗതമായ നമ്മുടെ പ്രാര്ഥനക്കനുസൃതമായി ആധുനിക കാലഘട്ടത്തിന്റെ ആവശ്യകതയുള്ക്കൊള്ളുന്ന വിധത്തില് പ്രവര്ത്തിക്കുന്ന ഈ സ്ഥാപനം മറ്റു സംഘടനകള്ക്കെല്ലാം മാതൃകയാണെന്ന് അദ്ദേഹം കൂട്ടിച്ചേര്ത്തു. ജാതിഭേദവും മതദ്വേഷവും ഏതുമില്ലാതെ ഏവരും സോദരത്വേന വാഴുന്ന മാതൃകാസ്ഥാനം തേടിക്കൊണ്ടിരുന്ന തനിക്ക് കരയോഗത്തിന്റെ പ്രവര്ത്തനങ്ങളില് അത് കണ്ടെത്താന് കഴിഞ്ഞുവെന്ന് പ്രൊഫ. എം.കെ. സാനു പറഞ്ഞു. അഡ്വ. സി.കെ. മേനോന്, ഡോ. വി.പി. ഗംഗാധരന്, ഡോ. എം. ലീലാവതി, അഡ്വ. പരമേശ്വരപണിക്കര് എന്നിവര് അവാര്ഡ് തുക കരയോഗത്തിന്റെ സന്നദ്ധ പ്രവര്ത്തനങ്ങള്ക്കായി സംഭാവന ചെയ്തു. വേണുഗോപാല് സി. ഗോവിന്ദ് സ്വാഗതവും സുപ്രീം കോടതി മുന് രജി്സ്ട്രാര് അഡ്വ. ടി. ശിവദാസന്നായര് നന്ദിയും പറഞ്ഞു.
സുധീര്മുള്ളൂര്ക്കരയുടെ നേതൃത്വത്തില് കുരുത്തോല പണിക്കൂട്ടം ശില്പശാല നടന്നു. ചിത്രകലാനിരൂപകന് വിജയകുമാര് മേനോന് ആമുഖപ്രഭാഷണം നടത്തി. മതം ഇരുപത്തിയൊന്നാം നൂറ്റാണ്ടില് എന്ന വിഷയത്തല് നടന്ന സെമിനാര് ജസ്റ്റിസ് ആര് ഭാസ്കരന് ഉദ്ഘാടനം ചെയ്തു. ഡോ. മുരളീവല്ലഭന്, സ്വാമി ചിദാനന്ദപുരി, ഫാ. പോള് തേലക്കാട്ട്, അഡ്വ. എം ആര് രാജേന്ദ്രന്നായര്,എം ശ്രീവല്ലഭന് എന്നിവര് സംസാരിച്ചു.
