കൊച്ചി: ഗവര്ണര് പി.സദാശിവം ഭദ്രദീപം തെളിയിച്ചതോടെ എറണാകുളം കരയോഗത്തിന്റെ അഞ്ച് നാള് നീളുന്ന നവതി ആഘോഷങ്ങള്ക്ക് പ്രൗഢഗംഭീര തുടക്കം. കേരളത്തിലെ ഏറ്റവും പഴക്കമുള്ള സേവന സംഘടനകളിലൊന്നായ എറണാകുളം കരയോഗം 90-ാം പിറന്നാള് ആഘോഷിക്കുന്ന വേളക്ക് സാക്ഷിയാകാന് നഗരത്തിലെ പൗരപ്രമുഖരുടെ നീണ്ടനിര തന്നെ സന്നിഹിതരായി. എറണാകുളം കരയോഗം നേടിയ വിപുലമായ പൊതുസ്വീകാര്യതയും അംഗീകാരവും കരയോഗം ഭാരവാഹികളും പ്രവര്ത്തകരും അര്പ്പണ മനസ്സോടെ നിശ്ചയദാര്ഢ്യത്തോടും ഒറ്റക്കെട്ടായി നടത്തിയ പ്രവര്ത്തനങ്ങളുടെ മാറ്റു കൂട്ടുന്നതായി നവതി ആഘോഷങ്ങളുടെ ഉദ്ഘാടന ചടങ്ങ്. നവതി ആഘോഷങ്ങളുടെ മുന്നോടിയായി കരയോഗം പ്രസിഡന്റ് കെ.പി.കെ. മേനോന് രാവിലെ 8.30ന് കരയോഗം അങ്കണത്തില് പതാക ഉയര്ത്തി. ജാതി-മത-വര്ഗ-ഭാഷാ ഭേദങ്ങളില്ലാതെ എറണാകുളം കരയോഗം സമൂഹത്തിന് നല്കുന്ന സേവന പ്രവര്ത്തനങ്ങളെ ഗവര്ണര് പ്രകീര്ത്തിച്ചു.
എറണാകുളത്തിന്റെ മതേതര പാരമ്പര്യവും കാഴ്ചപ്പാടും എല്ലാ അര്ത്ഥത്തിലും ഉള്ക്കൊണ്ട പ്രസ്ഥാനമാണ് എറണാകുളം കരയോഗമെന്ന് ചടങ്ങില് അദ്ധ്യക്ഷത വഹിച്ച മന്ത്രി കെ. ബാബു പറഞ്ഞു. നഗരത്തില് സ്വാമി ചിന്മയാനന്ദന്റെ പ്രതിമ സ്ഥാപിക്കുമെന്ന കൊച്ചി നഗരസഭയുടെ വാഗ്ദാനം യാഥാര്ത്ഥ്യമാക്കുന്നതിന് എറണാകുളം കരയോഗം മുന്കൈയെടുക്കണമെന്ന് നവതിക്ക് ആശംസയര്പ്പിച്ച് സംസാരിച്ച ചിന്മയമിഷന്റെ കേരളത്തിലെ അദ്ധ്യക്ഷന് സ്വാമി വിവിക്താനന്ദ സരസ്വതി നിര്ദ്ദേശിച്ചു. മന്നത്തു പത്മനാഭന്റെ വാമഭാഗത്ത് സ്ഥിതി ചെയ്യുന്ന സ്ഥാപനം എന്ന നിലയില് എറണാകുളം കരയോഗത്തിന് ഒരു എല്ല് കൂടുതലുണ്ടെന്നാണ് താന് വിശ്വസിക്കുന്നതെന്ന് നടന് സുരേഷ് ഗോപി ആശംസാ പ്രസംഗത്തില് പറഞ്ഞു. അതുകൊണ്ടു തന്നെ കൂടുതല് ഉത്തരവാദിത്വങ്ങളും ഈ കരയോഗത്തിനുണ്ട്. കരയോഗത്തിന്റെ പ്രവര്ത്തനങ്ങളില് താന് ഹൃദയപൂര്വമാണ് പങ്കെടുക്കാറുള്ളതെന്ന് സുരേഷ് ഗോപി കൂട്ടിച്ചേര്ത്തു. നവതി സ്മരണികയായ ‘നവതിക’ കരയോഗം പ്രസിഡന്റ് കെ.പി.കെ. മേനോന് ആദ്യ പ്രതി നല്കി ഗവര്ണര് പ്രകാശനം ചെയ്തു. ആഘോഷ കമ്മറ്റി ചെയര്മാന് ജസ്റ്റിസ് കെ.എസ്. രാധാകൃഷ്ണന് സ്വാഗതം പറഞ്ഞു. കരയോഗത്തിന്റെ ഫോട്ടോ പ്രദര്ശനം ഓര്മചിത്രങ്ങള് ഗവര്ണറും സുരേഷ് ഗോപിയും വീക്ഷിച്ചു. ഉച്ചയ്ക്കുശേഷം നടന്ന ചടങ്ങില് 84 മുതല് 98 വയസ്സുവരെയുള്ള മുതിര്ന്ന കരയോഗ അംഗങ്ങളെ ആദരിച്ചു. ചടങ്ങ് റിട്ട.ജസ്റ്റിസ് എം. രാമചന്ദ്രന് ഉദ്ഘാടനം ചെയ്തു. കരയോഗം പ്രസിഡന്റ് കെ.പി.കെ. മേനോന് അദ്ധ്യക്ഷത വഹിച്ചു. ജനറല് സെക്രട്ടറി പി. രാമചന്ദ്രന്(വേണു), വി.പി. മധുസൂദനന്, എല്.കെ. കൃഷ്ണന്കുട്ടി, ഡോ.എ. രാമചന്ദ്രന്, സിനി ആര്ട്ടിസ്റ്റ് കെ.ജി. ജനാര്ദ്ദനന്, കാര്ട്ടൂണിസ്റ്റ് ടി.വി.ജി. മേനോന് എന്നിവര് സംസാരിച്ചു. വൈകുന്നേരം ടിഡിഎം ഹാള് ഗംഗയില് നടന്ന കുടുക്ക വീണ കച്ചേരിയും മിഴാവ് തായമ്പകയും ആഘോഷചടങ്ങുകള്ക്ക് മാറ്റു കൂട്ടി. ഇന്ന് രാവിലെ 10ന് നടക്കുന്ന നവരത്ന അവാര്ഡ് വിതരണ ചടങ്ങ് മുന് കേന്ദ്രമന്ത്രി ഒ. രാജഗോപാല് ഉദ്ഘാടനം ചെയ്യും. മാതൃഭൂമി ചെയര്മാന് ആന്റ് മാനേജിങ് ഡയറക്ടര് എം.പി. വീരേന്ദ്രകുമാര് അവാര്ഡ് ദാനം നിര്വഹിക്കും.
കൊച്ചി മേയര് സൗമിനി ജെയിന്, കെ.വി.തോമസ് എംപി, എം.എ. ബേബി എംഎല്എ തുടങ്ങിയവര് സംബന്ധിക്കും. ടിഡിഎം കൃഷ്ണയില് രാവിലെ 10 മണിക്ക് ദൃശ്യകല ‘കുരുത്തോല പണിക്കൂടവും’ മറ്റൊരു വേദിയില് യുവജനങ്ങള്ക്ക് വേണ്ടി കവിതാപാരായണവും ഉണ്ടായിരിക്കുന്നതാണ്. ഉച്ചയ്ക്ക് 2 മണിക്ക് മതം ഇരുപത്തി ഒന്നാം നൂറ്റാണ്ടില് എന്ന വിഷയത്തെ അധികരിച്ച് നടക്കുന്ന സെമിനാര് റിട്ട.ജസ്റ്റിസ് ആര്.ഭാസ്കരന് ഉദ്ഘാടനം ചെയ്യും.
അഡ്വ.എം.ആര്.രാജേന്ദ്രന് നായര്, ഡോ.മുരളി വല്ലഭന്, സ്വാമി ചിദാനന്ദപുരി, ഫാദര് പോള് തേലക്കാട്ട്, നിലമ്പൂര് റഹ്മത്തുള്ള കാസിമി മൂത്തേടം തുടങ്ങിയവര് സംബന്ധിക്കും. തുടര്ന്ന് വൈകുന്നേരം 6 മണിക്ക് നളചരിതം ഒന്നാം ദിവസം കഥകളി ഉണ്ടായിരിക്കുന്നതാണ്. കരയോഗത്തിന്റെ ഫോട്ടോ പ്രദര്ശനം ഓര്മചിത്രങ്ങള് എല്ലാ ദിവസവും രാവിലെ 10.00 മണി മുതല് രാത്രി 8 മണി വരെ ഉണ്ടായിരിക്കും. ഫോട്ടോ പ്രദര്ശനം 25-ാം തീയതി സമാപിക്കും.
