കൊച്ചി: ബിസിജി എഡ്യൂക്കേഷന് സര്വീസസും ഗാര്ഡിയന് പബ്ലിക് സ്കൂളും ചേര്ന്നൊരുക്കുന്ന ‘ഗാര്ഡിയന് സ്റ്റോറീസ്’ ജില്ലാ കളക്ടര് എം.ജി. രാജമാണിക്യം കാക്കനാട്ടെ 64-ാം നമ്പര് അങ്കണവാടിയില് ഉദ്ഘാടനം ചെയ്തു. കൊച്ചുകുട്ടികളില് മൂല്യങ്ങളും അനുകമ്പയും ഭാഷയേക്കുറിച്ചുള്ള അറിവും വളര്ത്താനുദ്ദേശിച്ച് ആരംഭിച്ച ഈ പരിപാടി നവംബറില് പാലക്കാട്ടാണ് ഉദ്ഘാടനം ചെയ്തത്. മാതാപിതാക്കളുടെ സഹായത്തോടെ കുട്ടികളുടെ വായനാശീലം വളര്ത്തുക എന്നതാണ് ഈ പരിപാടിയിലൂടെ ലക്ഷ്യമിടുന്നത്. ബിസിജി എഡ്യൂക്കേഷന് സര്വീസസ് സംഭാവന ചെയ്ത കുട്ടികള്ക്കായുള്ള പുസ്തകങ്ങളുടെ ലൈബ്രറി കളക്ടര് അങ്കണവാടിക്കു സമര്പ്പിച്ചു. കളക്ടര് ഒരു പുസ്തകം വായിച്ച് കുട്ടികള്ക്ക് അതിന്റെ സാരാശം വിശദീകരിച്ചു കൊടുത്തു. ഇതോടൊപ്പം പാലക്കാട് എംഎല്എ ഷാഫി പറമ്പിലിനെ കഥ പറയാന് വെല്ലുവിളിച്ചുകൊണ്ട് കഥ പറച്ചില് മത്സരത്തിനു തുടക്കംകുറിച്ചു.
കുട്ടികളില് ചെറുപ്രായത്തില് തന്നെ വായനാശീലം വളര്ത്തിയെടുക്കുക എന്നതാണ് ഈ പരിപാടിയിലൂടെ സംഘാടകര് ലക്ഷ്യമിടുന്നത്. കുട്ടികള്ക്കായ് കഥ പറയുവാന് മാതാപിതാക്കളേയും പ്രോത്സാഹിപ്പിക്കും. മാതാപിതാക്കളും മക്കളും തമ്മിലുള്ള ബന്ധം ശക്തിപ്പെടുന്നതോടൊപ്പം കുട്ടികളുടെ പദപരിചയവും വിനിമയത്തിനുള്ള കഴിവ് വര്ദ്ധിക്കുന്നതിനും ഇത് ഉപകരിക്കും. പുസ്തകങ്ങളിലെ കഥകളിലെ മൂല്യങ്ങള് മനസിലാക്കുന്നതുവഴി കുട്ടികളില് കൂടുതല് ശക്തമായ മൂല്യബോധം വളര്ത്താന് കഴിയും. കുട്ടികള്ക്ക് കഥകള് പറഞ്ഞുകൊടുക്കാനും അതിന്റെ ഗുണപാഠം പറഞ്ഞുകൊടുക്കാനും കഴിഞ്ഞത് വലിയൊരു അനുഭവമായിരുന്നുവെന്ന് കളക്ടര് എം.ജി. രാജമാണിക്യം പറഞ്ഞു.
രേഖ സി ബാബു, ബിസിജി എഡ്യൂക്കേഷന് ഡയറക്ടര് ബിജോയ് വര്ഗീസ്, സിഡിപിഒ എം. മാലതി, പന്ത്രണ്ടാം വാര്ഡ് കൗണ്സിലര് ദിവ്യ പ്രമോദ് എന്നിവര് ചടങ്ങില് പങ്കെടുത്തു.
