കോഴിക്കോട്: മിഠായിതെരുവിലെ ഖാദി ഗ്രാമോദ്യോഗ് എംപോറിയത്തില് ക്രിസ്മസ്-ന്യൂ ഇയര് ആഘോഷങ്ങളോടനുബന്ധിച്ച് ഖാദി മേള തുടങ്ങി. മേളയില് ഡിസംബര് 16 മുതല് 31 വരെ ഖാദി തുണിത്തരങ്ങള്ക്ക് 30 ശതമാനം ഗവ. റിബേറ്റ് അനുവദിച്ചിട്ടുണ്ട്. ഫര്ണിച്ചര്, കരകൗശല വസ്തുക്കള്ക്ക് 10 ശതമാനം ഡിസ്കൗണ്ട് ലഭിക്കും. ഖാദിസില്ക്ക്, മള്ബറി സില്ക്ക്, ജൂട്ട് സില്ക്ക്, ഡുബിയാന് സില്ക്ക്, കമ്പിളി ഉല്പ്പന്നങ്ങള്, ചേമഞ്ചേരി കുപ്പടം മുണ്ടുകള്, കോട്ടണ് സാരികള്, ബെഡ്ഷീറ്റുകള്, പ്രകൃതി ദത്തമായ നിറക്കൂട്ടുകള് മാത്രം ഉപയോഗിച്ചിട്ടുള്ള കലംകാരി റെഡിമെയ്ഡ് വസ്ത്രങ്ങള്, ഡാക്കാ മസ്ലിന് തുണിത്തരങ്ങള്, ലെതര് ബാഗുകള്, കോലാപ്പുരി ചെരുപ്പുകള്, തേക്കിലും തടിയിലും, ചൂരലിലും തീര്ത്ത മനോഹരമായ ഫര്ണിച്ചറുകള്, വീട്ടിയിലും വൈറ്റ് മെറ്റലിലും മാര്ബിളിലും തീര്ത്ത മനോഹരമായ ശില്പങ്ങള് എന്നിവയും മേളയുടെ പ്രധാന ആകര്ഷണങ്ങളാണ്.
തേന്, മരച്ചക്കില് ആട്ടിയ എള്ളെണ്ണ, ചന്ദനത്തിരികള്, ഗ്രാമ വ്യവസായ ഉല്പ്പന്നങ്ങള്, ആയുര്വേദ മരുന്നുകള്, പ്രകൃതിദത്തമായ സൗന്ദര്യവര്ദ്ധക വസ്തുക്കള് തുടങ്ങിയ നിത്യോപയോഗ സാധനങ്ങള് എന്നിവയും മേളയില് ലഭ്യമാണ്. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി ഉദ്ഘാടനം ചെയ്തു. സര്വോദയ സംഘം വൈസ് പ്രസിഡന്റ് പി. വിശ്വന് അദ്ധ്യക്ഷത വഹിച്ചു. സ്വര്ണ്ണാഭരണ തൊഴിലാളി ക്ഷേമനിധി ബോര്ഡ് ചെയര്മാന് അഡ്വ. എം. രാജന്, കോര്പ്പറേഷന് കൗണ്സിലര് നമ്പിടി നാരായണന്, കാലിക്കറ്റ് സിറ്റി സര്വീസ് കോ-ഓപ്പറേറ്റീവ് ബാങ്ക് ചെയര്മാന് സി. എന് വിജയകൃഷ്ണന് എം. കെ. അനന്തരാമന്, എം. പരമേശ്വരന് എന്നിവര് സംസാരിച്ചു.
