മട്ടന്നൂര്: നിര്ദ്ദിഷ്ട കണ്ണൂര് വിമാനത്താവളവുമായി ബന്ധപ്പെട്ട് കണ്ണൂര് വിമാനത്താവള കമ്പനി അധികൃതരും ബന്ധപ്പെട്ട ജില്ലാ ഭരണകൂടവും കാര്യങ്ങള് സുതാര്യമാക്കാതെ ഒളിച്ചുകളി നടത്തുകയാണെന്ന് കുടിയിറക്ക് വിരുദ്ധ കര്മ്മസമിതി പത്രസമ്മേളനത്തില് ആരോപിച്ചു. വിമാനത്താവള പദ്ധതിക്കായി നാലാം ഘട്ടത്തില് റണ്വേ വികസനം എന്ന പേരില് അനാവശ്യമായി കല്ലേരിക്കര-പാറപ്പൊയില് പ്രദേശത്തെ 25 ഓളം കുടുംബങ്ങളെ കുടിയൊഴിപ്പിക്കാന് ബോധപൂര്വ്വമായ ശ്രമം നടത്തുകയാണ്. നാളിതുവരെയായി ഈ പദ്ധതിയുമായി ബന്ധപ്പെട്ട് അധികൃതര് പറഞ്ഞതും ചെയ്തതുമൊക്കെ തികച്ചും വഞ്ചനാപരമാണ്.
രണ്ടാം ഘട്ടത്തില് കുടിയൊഴിപ്പിക്കപ്പെട്ട കുടുംബങ്ങള്ക്ക് പുനരധിവാസത്തിന് 10 സെന്റ് ഭൂമി നല്കിയെങ്കിലും പാക്കേജില് പറഞ്ഞ പ്രകാരം കുടിവെള്ളം, റോഡ് തുടങ്ങിയവയൊന്നും ഫലപ്രദമായി നടപ്പിലായിട്ടില്ല. വിമാനത്താവള കമ്പനിയുമായി ബന്ധപ്പെട്ട ഓഫീസില് നൂറുകണക്കിന് ആളുകളെ സ്ഥിരമായും താല്ക്കാലികമായുമൊക്കെ നിയമിച്ചെങ്കിലും കുടിയൊഴിപ്പിക്കപ്പെട്ട കുടുംബങ്ങളിലെ ഒരാളെപ്പോലും നിയമിക്കാന് അധികൃതര് തയ്യാറായിട്ടില്ല. മൂന്നാംഘട്ട സ്ഥലം ഏറ്റെടുക്കലാണെങ്കില് ഇഴഞ്ഞു നീങ്ങുകയുമാണ്.
ഈ പശ്ചാത്തലത്തിലാണ് പദ്ധതിയുമായി ബന്ധപ്പെട്ട നാലാംഘട്ട സ്ഥലമെടുപ്പുമായി ഒരുതരത്തിലും സഹകരിക്കേണ്ടതില്ലെന്ന് കണ്ണൂര് വിമാനത്താവള കുടിയിറക്ക് വിരുദ്ധ കര്മ്മസമിതി തീരുമാനിച്ചത്. എന്നാല് കുടിയൊഴിപ്പിക്കപ്പെടുന്ന കുടുംബങ്ങള്ക്ക് പുനരധിവാസ പ്ലോട്ടുകള് സൗകര്യപ്രദമായ സ്ഥലത്ത് നിശ്ചയിക്കുകയും അത് അവരെ ബോധ്യപ്പെടുത്തുകയും കുടിവെള്ളം, വൈദ്യുതി, ഗതാഗത സൗകര്യപ്രദമായ റോഡ് എന്നിവ ഉറപ്പു വരുത്തുകയും ഭാവിയില് പരിസരത്ത് താമസിക്കുന്നവര്ക്ക് ഒരു തരത്തിലുള്ള ദ്രോഹങ്ങളും ഉണ്ടാവില്ലെന്നും കൂടുതല് സ്ഥലം ഇനിയും ഏറ്റെടുക്കുകയില്ലെന്നുമുള്ള കാര്യങ്ങള് രേഖാമൂലം ബോധ്യപ്പെടുത്താന് അധികൃതര് തയ്യാറായാല് പുനരാലോചനക്ക് കര്മ്മസമിതി തയ്യാറാണെനന്നും ഭാരവാഹികള് അറിയിച്ചു.
1998 ല് രൂപീകരിച്ച കല്ലേരിക്കരയിലെ പ്രഥമ കുടിയിറക്കുവിരുദ്ധ കര്മ്മസമിതി അന്ന് ആവശ്യങ്ങള് അംഗീകരിക്കുമെന്ന അധികൃതരുടെ ഉറപ്പിനെ തുടര്ന്ന് പ്രവര്ത്തനങ്ങള് മരവിപ്പിച്ചിരുന്നു. എന്നാല് ആവശ്യങ്ങള് അംഗീകരിക്കാതെയും വീണ്ടും വീണ്ടും ഭൂമിയേറ്റെടുത്ത് പ്രദേശവാസികളെ ദ്രോഹിക്കുന്ന നിലപാടുമായി ബന്ധപ്പെട്ടവര് മുന്നോട്ട് പോകുന്ന സാഹചര്യത്തിലാണ് കര്മ്മസമിതി വീണ്ടും പുനരുജ്ജീവിപ്പിച്ചത്. സര്ക്കാര് പ്രഖ്യാപനങ്ങള് നടപ്പാക്കാതെ ജനങ്ങളെ വഞ്ചിക്കുന്ന നിലപാടുകളോട് സന്ധി ചെയ്യാന് കര്മ്മ സമിതിക്ക് സാധിക്കുകയില്ല. ആവശ്യങ്ങള് തുടര്ന്നും അംഗീകരിക്കാത്ത പക്ഷം ശക്തമായ പ്രക്ഷോഭങ്ങളുമായി മുന്നോട്ട് പോകാനാണ് കര്മ്മസമിതി തീരുമാനിച്ചിട്ടുള്ളതെന്നും ഭാരവാഹികള് അറിയിച്ചു.
എ.സദാനന്ദന്, കെ.സി.കരുണാകരന്, സി.രവീന്ദ്രന്, പി.പ്രസാദ്, സി.പ്രകാശന് തുടങ്ങിയവര് പത്രസമ്മേളനത്തില് പങ്കെടുത്തു.
