ആലപ്പുഴ: സീബ്രാലൈനുകളില് പോലും കാല്നടയാത്രികരെ റോഡ് മുറിച്ചു കടക്കാന് അനുവദിക്കാതെ വാഹനങ്ങള് പായുന്നു. നഗരത്തിലെ റോഡുകളിലെ തിരക്കേറിയ ഭാഗങ്ങളിലെ സീബ്രാ ലൈനുകളില് പോലും നിയമം ലംഘിച്ച് വാഹനങ്ങള് കുതിക്കുകയാണ്.
കാല്നടയാത്രക്കാര് സീബ്രാ ലൈനില് പ്രവേശിച്ചുകഴിഞ്ഞാല് ഇരുഭാഗത്തുമുള്ള വാഹനങ്ങള് നിര്ത്തണമെന്നും കാല്നടയാത്രക്കാരന് റോഡ് മുറിച്ചുകടന്നതിനുശേഷം വാഹനങ്ങള് കടന്നുപോകണമെന്നുമാണ് ഗതാഗത നിയമം. നിയമം ലംഘിക്കുന്നവര്ക്ക് പിഴയടക്കമുള്ള ശിക്ഷയും ലഭിക്കും.
തിരക്കേറിയ ജില്ലാ കോടതിയ്ക്ക് മുന്നിലെ ഇരു സീബ്രാലൈനുകളിലൂടെയും കാല്നടയാത്രക്കാര് റോഡ് മുറിച്ചുകടക്കുന്നത് ഭീതിയോടെയാണ.് കോടതിയുടെ വടക്കേ ഗേറ്റിനരുകിലെ സീബ്രാ ലൈനില് പലപ്പോഴും പോലീസ് ഉദ്യോഗസ്ഥന് ഡ്യൂട്ടിക്കുള്ളതിനാല് വാഹനങ്ങളെ നിയന്ത്രിക്കാന് കഴിയും എന്നാല് തെക്കേ ഗേറ്റിനരുകിലെ സീബ്രാ ലൈനിനരുകില് പോലീസ് ഉദ്യോഗസ്ഥരുണ്ടാകാറില്ല.
കോടതിയിലേക്കെത്തുന്നവരും മണ്ണഞ്ചേരി ഭാഗത്തുനിന്നെത്തി ബസിറങ്ങി കുടുംബ കോടതി, താലൂക്ക് ഓഫീസ് എന്നിവിടങ്ങളിലേക്ക് പോകുന്നതിനും തെക്കുനിന്ന് ജില്ലാ കോടതിയിലേക്കു പോകുന്നതിനുമായെത്തുന്ന കാല്നടയാത്രക്കാരാണ് വാഹനങ്ങളുടെ ലക്കുംലഗാനുമില്ലാത്ത പാച്ചില് മൂലം ബുദ്ധിമുട്ടുന്നത്.
രാവിലെയും വൈകുന്നേരവും ഇരുചക്രവാഹനങ്ങളില് അമിത വേഗതയില് സഞ്ചരിക്കുന്ന യുവാക്കളും ഇവിടെ അപകടഭീതിയുയര്ത്തുന്നു. നഗരത്തിലെ പല വിദ്യാലയങ്ങള്ക്ക് മുന്നിലെ റോഡിലുള്ള സീബ്രാ ലൈനുകളിലും കാല്നടയാത്രക്കാരുടെ അവസ്ഥ ഇതുതന്നെയാണ്.
