കൊല്ലം: സ്നേഹപൂര്വം കൊല്ലത്തിന്റെ ചെൈന്നയിലേക്കുള്ള ദുരിതാശ്വാസ സഹായവുമായുള്ള ആദ്യവാഹനം സിവില്സ്റ്റേഷന് പരിസരത്തുനിന്നും പുറപ്പെട്ടു.
ജില്ലാ കളക്ടര് എ.ഷൈനാമോള് വാഹനം ഫഌഗ് ഓഫ് ചെയ്തു. ആദ്യവാഹനത്തില് കൂടുതലും വസ്ത്രങ്ങളാണ് അയക്കുന്നത്. കൂടാതെ പായ്ക്കറ്റ്’ഭക്ഷണം, കുപ്പിവെള്ളം, ബിസ്ക്കറ്റ് തുടങ്ങിയവയുമുണ്ട്. ജില്ലയിലെ സര്ക്കാര് ജീവനക്കാര് സംഭാവനയായി നല്കിയ തുക ഉപയോഗിച്ച് അവശ്യവസ്തുക്കള് വാങ്ങി പായ്ക്ക് ചെയ്താണ് ചെൈന്നയിലേക്ക് വിടുന്നത്. കൂടാതെ താലൂക്ക് ഓഫീസുകളിലും കളക്ട്രേറ്റില് വിവിധ സ്ഥാപനങ്ങള്, സംഘടനകള്, വ്യക്തികള് എന്നിവര് വാങ്ങി നല്കിയ അവശ്യസാധനങ്ങളും പായ്ക്ക് ചെയ്ത് അയക്കുന്നുണ്ട്. റവന്യൂ ജീവനക്കാരായ ശരത്, രജിന്, രാജേഷ് എന്നിവരാണ് വാഹനത്തെ അനുഗമിക്കുന്നത്.
ഹോട്ടല് ആന്റ് റസ്റ്ററന്റ് ‘ഭാരവാഹികള് ഒരു ലക്ഷം രൂപയുടെ വസ്ത്രങ്ങളാണ് സ്നേഹപൂര്വം കൊല്ലത്തിലേക്ക് സംഭാവനയായി നല്കിയത്. പോലീസ് സേനാംഗങ്ങള് സംഭാവനയുടെ ആദ്യവിഹിതമായ ഒരുലക്ഷം രൂപ കളക്ടറെ ഏല്പ്പിച്ചു. ചവറ കെഎംഎംഎല്ലിലെ ജീവനക്കാര് 1.34 ലക്ഷം രൂപയുടെ ചെക്ക് കളക്ടര്ക്ക് കൈമാറി. കൂടാതെ എല്ലാ താലൂക്ക് കേന്ദ്രങ്ങളില് നിന്നും വസ്ത്രങ്ങളും ഭക്ഷണസാധനങ്ങളും സംഭാവനയായി ലഭിച്ചു. ജീവനക്കാരില് നിന്ന് മാത്രമാണ് തുകയായി സംഭാവന സ്വീകരിച്ചിട്ടുള്ളത്. പൊതുജനങ്ങളില് നിന്നും സ്വകാര്യസ്ഥാപനങ്ങളില് നിന്നും അവശ്യവസ്തുക്കള് മാത്രമേ സ്നേഹപൂര്വം കൊല്ലം പദ്ധതിയില് സ്വീകരിക്കുകയുള്ളുവെന്ന് ജില്ലാ കളക്ടര് അറിയിച്ചു.
