കാഞ്ഞിരപ്പള്ളി: അടിസ്ഥാന സൗകര്യങ്ങള് ഏര്പ്പെടുത്തിയില്ലെങ്കില് ഐഎച്ച്ആര്ഡി കോളേജിന്റെ അഫിലിയേഷന് നഷ്ടപ്പെടുമെന്ന് എംജി സര്വ്വകലാശാല മുന്നറിയിപ്പ് നല്കിയതോടെ വിദ്യാര് ത്ഥികള് ആശങ്കയില്.
കോളേജിന് സ്വന്തമായി കാമ്പസ്, കെട്ടിടം, സൗകര്യമുള്ള ശൗചാലയം, ക്ലാസ്മുറികളും ലാബുകളും തുടങ്ങിയവയൊന്നും കോളജില് ഇല്ലെന്ന് കഴിഞ്ഞ ദിവസം കോളജില് പരിശോധന നടത്തിയ എംജി സര്വ്വകലാശാലയുടെ ഇന്സ്പെക്ഷന് കമ്മീഷന് കണ്ടെത്തിയിരുന്നു.
നിലവില് പേട്ട ഗവ. ഹൈസ്കൂളിലെ എട്ടു മുറികളിലും, ഇവിടെ നിന്നും ഒരു കിലോമീറ്റര് അകലെ കാഞ്ഞിരപ്പള്ളി സര്വ്വീസ് സഹകരണ ബാങ്കിന്റെ വാടകയ്ക്കെടുത്ത ഒരു ഹാളിലുമായാണ് ഉന്നത വിദ്യാഭാസ വകുപ്പിന്റെ കീഴിലുള്ള ഐഎച്ച്ആര്ഡി അപ്ലൈഡ് സയന്സ് കോളേജ് പ്രവര്ത്തിക്കുന്നത്. സ്കൂളിലെ അഞ്ചു മുറികളിലായി 2010ല് ആരംഭിച്ച കോളജിന് 2011-12 അദ്ധ്യായനവര്ഷം പുതിയ ബാച്ചിന് പ്രവേശനം നല്കാനുള്ള സൗകര്യമില്ലായിരുന്നു. തുടര്ന്ന് ജനപ്രതിനിധികള് ഇടപെട്ട് സ്കൂളിന്റെ മൂന്നു മുറികള് കൂടി കോളേജിനു വേണ്ടി താല്ക്കാലികമായി നല്കുകകയായിരുന്നു. എന്നാല് കോളജിനു വേണ്ടി അഞ്ചു വര്ഷമായിട്ടും സ്ഥല സൗകര്യങ്ങള് കണ്ടെത്തി നല്കാന് കഴിഞ്ഞിട്ടില്ല. ബിഎസ്സി ഇലക്ട്രോണിക്സ്, ബിഎസ്സി കമ്പ്യൂട്ടര് സയന്സ്, ബികോം വിത്ത് കമ്പ്യൂട്ടര് ആപ്ലിക്കേഷന് എന്നീ കോഴ്സുകളാണ് കോളേജിലുള്ളത്. സ്കൂളിലെ മൂന്നു മുറികളില് ക്ലാസ് മുറികളും, ഒരു മുറിക്കുള്ളില് ഇലക്ട്രിക്കല് ലാബും, സ്റ്റാഫ് റൂമും, ഇതിനിടെ ലൈബ്രറിയും ചേര്ന്നാണ് പ്രവര്ത്തിക്കുന്നത്. ഒരു മുറിയില് ഓഫിസും പ്രവര്ത്തിക്കുന്നു. ബാങ്കിന്റെ ഹാളില് ഒരു ഓഫിസ് റൂം, സ്റ്റാഫ് മുറി മൂന്ന് ക്ലാസ് മുറികള് എന്നിവയാണ് താല്ക്കാലികമായി പ്രവര്ത്തിക്കുന്നത്.
കോളേജ് തുടങ്ങുന്നതുമായി ബന്ധപ്പെട്ട് 2009 മെയ് 25ന് അന്നത്തെ വിദ്യാഭ്യാസ മന്ത്രിയുടെ നേതൃത്വത്തില് മന്ത്രിയുടെ ഓഫിസില് നടത്തിയ യോഗത്തില് പേട്ട ഗവ. സ്കൂളിന്റെ വകയായ സ്ഥലത്തു നിന്നും കോളേജിന് ആവശ്യമായ 1.80 ഏക്കര് സ്ഥലം 30 വര്ഷത്തേക്ക് പാട്ടത്തിന് നല്കാന് തീരുമാനം എടുത്തിരുന്നു. കാഞ്ഞിരപ്പള്ളി വില്ലേജില ബ്ലോക്ക് നമ്പര് രണ്ടിലെ, സര്വ്വേ നമ്പര് 253/5, 254/4 പ്രകാരമുള്ള 1.80 ഏക്കര് സ്ഥലമാണ് പാട്ടത്തിന് നല്കാന് തീരുമാനിച്ചത്. പൊതുവിദ്യാഭ്യാസ വകുപ്പ് സെക്രട്ടറി, അല്ഫോന്സ് കണ്ണന്താനം എംഎല്എ, ഐഎച്ച്ആര്ഡി ഡയറക്ടര് എന്നിവരുള്പ്പെട്ട യോഗത്തിലായിരുന്നു തീരുമാനം. തീരുമാനം നടപ്പാക്കുന്നതിന്റെ ഭാഗമായി ജില്ലാ പഞ്ചായത്തിന് നിര്ദ്ദേശവും നല്കിയിരുന്നു. എന്നാല് സ്ഥലം വിട്ടുകിട്ടുന്നതിനുള്ള യാതൊരു നടപടികളും ഉണ്ടായില്ല.
ഇതിനിടെ കോളേജിന് ആവശ്യമായ വെള്ളവും, സാനിട്ടേഷന് സൗകര്യങ്ങളും ഒരുക്കാന് 2011 മെയ് 31ന് ചേര്ന്ന ഗ്രാമപഞ്ചായത്ത് കമ്മിറ്റിയും തീരുമാനം എടുത്തിരുന്നു. കോളേജിന് കെട്ടിടം നിര്മ്മിക്കാന് ഒരു ഏക്കര് സ്ഥലം ബ്ലോക്ക് പഞ്ചായത്ത് വളപ്പില് നല്കാമെന്ന് ബ്ലോക്ക് പഞ്ചായത്ത് കമ്മിറ്റിയും അറിയിച്ചിരുന്നു. എന്നാല് ഇവയൊന്നും ഇതുവരെ നടപ്പായിട്ടില്ല. പ്രവര്ത്തനം ആരംഭിച്ച് അഞ്ചു വര്ഷമായിട്ടും കോളേജിന് കെട്ടിടം നിര്മ്മിക്കാന് ആവശ്യമായ സ്ഥലം കണ്ടെത്തി നല്കാന് കഴിഞ്ഞിട്ടില്ലെന്നതാണ് വാസ്തവം.
