കുന്നത്തൂര്: കൊല്ലം-തേനി ദേശീയപാത കടന്നുപോകുന്ന ഭരണിക്കാവിലെ പാതയോരങ്ങളില് മാലിന്യ നിക്ഷേപം കാല്നട യാത്രക്കാരടക്കമുള്ളവരെ ബുദ്ധിമുട്ടിലാക്കുന്നു. ദിനംപ്രതി ഇവിടെ മാലിന്യങ്ങള് പാതയോരത്ത് തള്ളുകയാണ്.‘ഭരണിക്കാവ് ജംഗ്ഷനില് നിന്നും പഞ്ചായത്ത് ഓഫീസിലേക്ക് കടന്നുപോകുന്ന പാതയോരത്ത് മാലിന്യങ്ങള് കുന്നുകൂടി കിടക്കുകയാണ്. പഴം-പച്ചക്കറി മാലിന്യങ്ങളും ഹോട്ടല് മാലിന്യങ്ങളുമാണ് ഇവിടെ കൂടുതലായി തള്ളുന്നത്.
മാസങ്ങള്ക്ക് മുമ്പ് ഇവിടെ പ്രവര്ത്തിച്ചിരുന്ന മത്സ്യമാര്ക്കറ്റ് മാലിന്യപ്രശ്നം കാരണമുള്ള പ്രതിഷേധത്താല് അടച്ചിരുന്നു. അന്ന് അത്തരം പ്രതിഷേധങ്ങള്ക്ക് നേതൃത്വം കൊടുത്ത വ്യാപാരികളാണ് ഇന്ന് മാലിന്യം പൊതുനിരത്തില് നിക്ഷേപിക്കുന്നത്. ബസ് സ്റ്റാന്ഡിലും സമീപം പ്രവര്ത്തിക്കുന്ന സ്കൂളിലും പോകുന്ന അദ്ധ്യാപകരും വിദ്യാര്ത്ഥികളും നാട്ടുകാരെയും ഈ പ്രശ്നം ഒരു പോലെ ബാധിച്ചിരിക്കുകയാണ്. മഴ കനത്താല് ഇവിടെ കുന്നുകൂടി കിടക്കുന്ന മാലിന്യം അഴുകിയൊലിച്ച് റോഡിലേക്ക് ഇറങ്ങുകയാണ്.
പ്രദേശത്തെ കുടിവെള്ള സ്രോതസ്സുകള് ഇതു മൂലം മലിനമാക്കപെടുന്നു. സമീപത്തെ വ്യാപാരികളാണ് മാലിന്യങ്ങള് നിക്ഷേപിക്കുന്നതെന്ന് നാട്ടുകാര് ആരോപിക്കുന്നു. പ്രശ്നത്തിന് പരിഹാരം കാണണമെന്നാവശ്യപ്പെട്ട് പഞ്ചായത്ത് അധികാരികളെ സമീപിക്കാനൊരുങ്ങുകയാണ് ഇവര്.
