ന്യൂദല്ഹി: ഡോ.ബി.ആര്. അംബേദ്കറുടെ സാമ്പത്തിക വീക്ഷണം തിരിച്ചറിയുന്നതില് രാജ്യം പരാജയപ്പെട്ടെന്ന് പ്രധാനമന്ത്രി നരേന്ദ്രമോദി പറഞ്ഞു. അംബേദ്കറുടെ സാമ്പത്തിക രംഗത്തെപ്പറ്റിയുള്ള ചിന്തകളും കാഴ്ചപ്പാടും വളരെ ആഴത്തിലുള്ളവയായിരുന്നു. ഡോ.അംബേദ്കറുടെ 60-ാം ചരമവാര്ഷിക ദിനത്തില് സംസാരിക്കുകയായിരുന്നു പ്രധാനമന്ത്രി. അംബേദ്കറുടെ സ്മരണികയായി 125 രൂപയുടേയും 10 രൂപയുടേയും നാണയങ്ങളും പ്രധാനമന്ത്രി പുറത്തിറക്കി.
ആഴത്തില് ചിന്തിച്ചിരുന്ന വലിയ ദാര്ശനികനായിരുന്ന അംബേദ്കറുടെ സാമൂഹ്യ വീക്ഷണവും സാമൂഹ്യ നീതിക്കുവേണ്ടി നടത്തിയ പരിശ്രമങ്ങളും നമുക്ക് ശരിയായ അര്ത്ഥത്തില് മനസ്സിലാക്കാന് സാധിച്ചിട്ടുണ്ടെന്ന് പ്രധാനമന്ത്രി പറഞ്ഞു. മരണശേഷം അറുപതു വര്ഷങ്ങള്ക്കിപ്പുറവും നിരന്തരം സ്മരിക്കപ്പെടുകയെന്നത് വളരെക്കുറച്ച് വ്യക്തികള്ക്ക് മാത്രം പൊതുസമൂഹത്തില് നിന്നും ലഭിക്കുന്ന അംഗീകാരമാണ്. രാജ്യം പ്രശ്നങ്ങളെ നേരിടുന്ന സമയത്ത് നാം അംബേദ്കറുടെ വാക്കുകള് ഓര്മ്മിക്കാറുണ്ട്. അദ്ദേഹത്തിന്റെ ദര്ശനവും സമത്വത്തെപ്പറ്റിയുള്ള വീക്ഷണവും നാം അപ്പോഴെല്ലാം സ്മരിക്കും.
അംബേദ്കറും അദ്ദേഹം രാജ്യത്തിനായി വിഭാവനം ചെയ്ത ഭരണഘടനയും നാം എല്ലായ്പ്പോഴും ഓര്ക്കാറുണ്ട്. നവംബര്26ന് ഭരണഘടനാ ദിവസമായി ആചരിക്കുന്നത് ഇതിന്റെ ഭാഗമായാണ്. വനിതാ ശാക്തീകരണം, ധനകാര്യം, വിദ്യാഭ്യാസം, രാജ്യത്തിന്റെ ഫെഡറല് സംവിധാനം എന്നിവയെപ്പറ്റിയുള്ള അദ്ദേഹത്തിന്റെ കാഴ്ചപ്പാടുകള് അഭിനന്ദനാര്ഹമായിരുന്നെന്നും മോദി കൂട്ടിച്ചേര്ത്തു.
ധനകാര്യമന്ത്രി അരുണ് ജെയ്റ്റ്ലി, സാമൂഹ്യനീതി വകുപ്പ് മന്ത്രി തവര് ചന്ദ് ഗെലോട്ട് എന്നിവര് ചടങ്ങില് പങ്കെടുത്തു. പാര്ലമെന്റ് ഹൗസിലെ അംബേദ്കറിന്റെ ഛായാചിത്രത്തില് പ്രധാനമന്ത്രി നരേന്ദ്രമോദി പുഷ്പാര്ച്ചനയും നടത്തി.
