പാനൂര്: യുവമോര്ച്ച റാലി കഴിഞ്ഞ് മടങ്ങി വരുന്ന ബസുകള്ക്ക് നേരെ കൊട്ടയോടിയില് വെച്ച് സിപിഎം കല്ലേറ്. അഞ്ചുപേര്ക്ക് പരിക്ക്. ബിജെപി പ്രവര്ത്തകരായ ഒളവിലത്തെ മളളില് ജനാര്ദ്ധനന്(58), നായിപടി ബാബുരാജ്(34) ,കാട്ടില് പുതിയവീട്ടില് പുരുഷു(65), ഒതയോത്ത് രാരിഷ്(23)സ വളളങ്ങാട് നേതാജി വായനശാലയ്ക്ക് സമീപത്തെ ലിഖില്(27)എന്നിവര്ക്കാണ് പരിക്കേറ്റത്.ഇതില് സാരമായി പരിക്കേറ്റ ജനാര്ദ്ധനന്, ബാബുരാജ് എന്നിവരെ തലശ്ശേരി സ്വകാര്യ ആശുപത്രിയില് പ്രവേശിപ്പിച്ചു. മറ്റുളളവര് പാനൂര് സിഎച്ച്സിയില് ചികിത്സയിലാണ്. മുഖത്തും കണ്ണിനുമാണ് പരിക്ക്. ഒളവിലം, വളളങ്ങാട് എന്നിവിടങ്ങളില് നിന്നും റാലിക്കു പോയ വാഹനങ്ങള്ക്കുനേരെയാണ് കല്ലേറു നടന്നത്. ഇന്നലെ രാത്രി 7.30ഓടെയാണ് പാട്യം വില്ലേജ് ഓഫീസ് പരിസരത്തു നിന്നും കല്ലേറുണ്ടായത്. സിപിഎം ജില്ലാസെക്രട്ടറി പി.ജയരാജന്റെ വീടിനടുത്തു വെച്ചാണ് സിപിഎം അക്രമികള് അഴിഞ്ഞാടിയത്. അക്രമമുണ്ടാവുമെന്നതിനാല് ഇവിടെ പോലീസിനെ വിന്യസിച്ചിരുന്നു.
കഴിഞ്ഞവര്ഷം പയ്യന്നൂരില് നടന്ന ജയകൃഷ്ണന് മാസ്റ്റര് അനുസ്മരണ പരിപാടിയില് പങ്കെടുത്ത് മടങ്ങുകയായിരുന്ന വാഹനം അക്രമിച്ച് ഒരു ബിജെപി പ്രവര്ത്തകനെ സിപിഎം സംഘം കൊലപ്പെടുത്തിയിരുന്നു. സമാനരീതിയില് അക്രമം നടത്തി പ്രവര്ത്തകരെ കൊലപ്പെടുത്താനുളള ആസൂത്രിതമായ നീക്കമാണ് കൊട്ടയോടിയില് നടന്നത്.
സിപിഎം നടത്തുന്ന അസഹിഷ്ണുതയുടെ പ്രത്യക്ഷ ഉദാഹരണങ്ങളാണ് സിപിഎം ജില്ലാസെക്രട്ടറിയുടെ വീടിനടുത്തു തന്നെ അരങ്ങേറിയിട്ടുളളതെന്ന് ബിജെപി ജില്ലാവൈസ് പ്രസിഡണ്ട് പി.സത്യപ്രകാശ് ആരോപിച്ചു. കെടി.ജയകൃഷ്ണന് മാസ്റ്റര് ബലിദാനദിന പരിപാടിയുടെ വിജയത്തില് വിളറി പിടിച്ച് സിപിഎം നടത്തിയ അക്രമമാണിത്. പരിപാടികള് കഴിഞ്ഞു പോകുന്നവരെ അക്രമിക്കുന്ന പ്രവണത സിപിഎം മാത്രമാണ് ജില്ലയില് നടത്തിക്കൊണ്ടിരിക്കുന്നത്. ഇതിനെതിരെ ശക്തമായ നടപടി പോലീസ് സ്വീകരിക്കണം. പാര്ട്ടി സമ്മേളനങ്ങള് നടത്താന് സിപിഎം ജില്ലാസെക്രട്ടറിയുടെ മുന്നില് വെറ്റിലയിട്ട് അനുവാദം വാങ്ങണമെന്നാണെങ്കില് സിപിഎം നേതാക്കള് കരുതിയിരിക്കുന്നത് നല്ലതാണ്. എല്ലാവര്ക്കും സഞ്ചാരസ്വാതന്ത്ര്യമനുവദിക്കപ്പെട്ട രാജ്യത്ത് പാട്യവും കണ്ണൂരും മാത്രമല്ലയുളളതെന്ന്് കൂപമണ്ഡൂകങ്ങളായ സിപിഎം നേതാക്കള് ഓര്ക്കുന്നത് നല്ലതാണെന്നും പി.സത്യപ്രകാശ് പ്രസ്താവനയില് പറഞ്ഞു.
