പറവൂര്‍: മലപ്പുറം യൂണിവേഴ്‌സിറ്റി കാമ്പസില്‍ നടന്ന ഹാന്റ്‌ബോള്‍ മത്സരത്തില്‍ പങ്കെടുത്ത് മടങ്ങവെ വാഹനാപകടത്തില്‍ മരിച്ച അമല്‍ കൃഷ്ണ (15)യുടെ വിയോഗം കരിമ്പാടം ഗ്രാമത്തെ ദുഃഖത്തിലാഴ്ത്തി. കരിമ്പാടം കോളം വീട്ടില്‍ ഷാജി – അജിത ദമ്പതികളുടെ മകനാണ് അമല്‍ കൃഷ്ണ. ഹാന്റ്‌ബോള്‍ ജില്ലാ ടീം അംഗമായ അമല്‍ കൃഷ്ണയും മറ്റംഗങ്ങളും സഞ്ചരിച്ചിരുന്ന കെ.എല്‍ 41-4292 നമ്പര്‍ വാഹനമാണ് ഇന്നലെ പുലര്‍ച്ചെ അപകടത്തില്‍പ്പെട്ടത്. ഇവര്‍ സഞ്ചരിച്ചിരുന്ന വാഹനം മരത്തില്‍ ഇടിച്ച് തോട്ടിലേക്ക് മറിയുകയായിരുന്നു.
കരിമ്പാടം ഡി.ഡി സഭാ ഹൈസ്‌കൂളില്‍ നിന്നും മൂന്ന് വിദ്യാര്‍ഥികളാണ് മലപ്പുറത്ത് സംസ്ഥാനതല മത്സരത്തില്‍ പങ്കെടുക്കാന്‍ പോയത്. അമല്‍ കൃഷ്ണ മരിക്കുകയും ബിജോയ് ജോര്‍ജ്, രാഹുല്‍ എന്നിവര്‍ക്ക് പരിക്കേല്‍ക്കുകയും ചെയ്തു. തലയ്‌ക്ക് പരിക്കേറ്റ ബിജോയ് ജോര്‍ജ് അപകടഘട്ടം തരണം ചെയ്തിട്ടുണ്ട്. രാഹുലിന്റെ പരിക്കുകള്‍ ഗുരുതരമല്ല. പത്താംക്ലാസ് വിദ്യാര്‍ഥികളാണ് മൂന്നുപേരും. അപകടത്തില്‍ ബിജോയ് ജോര്‍ജ്ജിന്റെ വല്യപ്പന്‍ സേവ്യറും മരിച്ചു.
ഇന്നലെ പുലര്‍ച്ചെ ഒന്നരയോടെ അപകട വിവരം നാട്ടിലെത്തി. അപകടത്തില്‍ പറവൂര്‍ കരിമ്പാടം ഡിഡി സ്‌കൂളിലെ മൂന്ന് വിദ്യാര്‍ഥികളടക്കം നാലു പേര്‍ മരിച്ചുവെന്ന ആദ്യ ടിവി ഫഌഷ് വാര്‍ത്തകള്‍ ഭീതി ഉയര്‍ത്തി. പിന്നീട് മരിച്ച മറ്റുള്ളവര്‍ ജില്ലയിലെ തന്നെ മറ്റ് സ്‌കൂളുകളിലെ വിദ്യാര്‍ഥികളാണെന്ന് വെളുപ്പെടുത്തലുകള്‍ ഉണ്ടായി. അപകട വാര്‍ത്തയുമായാണ് കരിമ്പാടം ഗ്രാമം ഉണര്‍ന്നത്. ഗ്രാമവാസികളും ജനപ്രതിനിധികളും സ്‌കൂള്‍ അധികൃതരും അമല്‍ കൃഷ്ണയുടെ വീട്ടില്‍ എത്തിയെങ്കിലും വൈകിയാണ് മരണ വിവരം വീട്ടുകാരെ അറിയിച്ചത്.
