കോഴിക്കോട്: സ്കൂളുകളും പ്രൊഫഷണല് കോളേജുകളും കേന്ദ്രീകരിച്ച് മയക്ക്ഗുളികകള് വിതരണം ചെയ്യുന്ന ശൃംഖലയിലെ മുഖ്യകണ്ണി മെഡിക്കല് കോളജ് പോലീസിന്റെ പിടിയിലായി. കാസര്ഗോഡ് കാഞ്ഞങ്ങാട് സൗത്ത് കൊവ്വല്വീട്ടില് നൗഷാദ്(37) ആണ് ‘നൈട്രോസെപ്പാം’ മയക്കുമരുന്ന് അടങ്ങിയ എഴുന്നൂറ് നൈട്രോസണ് ഗുളികകളുടെ 35 സ്ട്രിപ്പുകള് സഹിതം അറസ്റ്റിലായത്. സിറ്റി പോലീസ് കമ്മീഷണര് പി.എ. വത്സന് ലഭിച്ച രഹസ്യവിവരത്തിന്റെ അടിസ്ഥാനത്തില് നടത്തിയ പരിശോധനയില് മെഡിക്കല് കോളജ് ഒ.പി. ബ്ലോക്കിന് സമീപത്തെ എസ്ബിഐ എടിഎം പരിസരത്ത് വെച്ചാണ് ഇന്നലെ രാവിലെ ഏഴരയോടെ നൗഷാദിനെ മെഡിക്കല് കോളജ് പോലീസ് പിടികൂടുന്നത്. ഇരുപത് ഗുളികകളടങ്ങിയ 34 രൂപ വിലയുള്ള ഒരു സ്ട്രിപ്പ് നൈട്രോസണ് ഗോവയില് നിന്നും കേരളത്തിലെത്തിക്കുന്ന നൗഷാദ് ഒരു ഗുളികയ്ക്ക് അമ്പത് രൂപ ഈടാക്കിയാണ് വിദ്യാര്ത്ഥികള്ക്ക് വില്പന നടത്തുന്നതെന്ന് സിറ്റി നോര്ത്ത് അസിസ്റ്റന്റ് കമ്മീഷണര് ജോസി ചെറിയാന് വാര്ത്താസമ്മേളനത്തില് അറിയിച്ചു.
ഗോവയില് നിന്നും ബാംഗ്ലൂരില് നിന്നുമാണ് മയക്കുഗുളികകള് നൗഷാദ് കേരളത്തിലെത്തിക്കുന്നത്. കോഴിക്കോട്, കാസര്ഗോഡ്, കണ്ണൂര് ജില്ലകളിലെ ക്യാമ്പസുകള് കേന്ദ്രീകരിച്ചാണ് പ്രധാനമായും നൈട്രോസണ് ഗുളികകള് വില്പന നടത്തുന്നത്. കാസര്ഗോഡ് ജില്ലയില് നിന്നും അടുത്തിടെയാണ് നൗഷാദ് മയക്കുഗുളികകളുടെ വില്പന കോഴിക്കോട് ജില്ലയിലേക്ക് മാറ്റിയത്.
ഒരു പ്രാവശ്യം മയക്കുഗുളിക ഉപയോഗിക്കുന്നവര് പിന്നീട് അതിനടിമപ്പെട്ട് നൗഷാദിന്റെ സ്ഥിരം ഉപഭോക്താവാവുകയാണ് പതിവെന്ന് ജോസി ചെറിയാന് അറിയിച്ചു. ചുരുങ്ങിയ പണം കൊണ്ട് കൂടുതല് ലഹരി ലഭ്യമാവുന്നതും, ആര്ക്കും പെട്ടെന്ന് തിരിച്ചറിയാന് പറ്റാത്തതുമായതിനാല് നൈട്രോസണ് ഗുളികകള്ക്ക് ആവശ്യക്കാരേറുന്നുവെന്ന് പോലീസ് അന്വേഷണത്തില് വ്യക്തമായിട്ടുണ്ട്.
മെഡിക്കല് കോളേജ് ക്യാമ്പസുകളിലും സമീപത്തെ എഞ്ചിനീയറിംഗ്, പ്രൊഫഷണല് കോളേജുകളിലും വിദ്യാര്ത്ഥികള്ക്കിടയില് മയക്ക്മരുന്ന് ഗുളികവിതരണം വ്യാപകമാവുന്നെന്ന് സിറ്റി പോലീസ് മേധാവിയ്ക്ക് വിവരം ലഭിച്ചിരുന്നു. അതിന്റെ അടിസ്ഥാനത്തില് മെഡിക്കല് കോളജ് സിഐ ജലീല് തോട്ടത്തില്, എസ്ഐ ബി.കെ. സിജു, ഷാഡോ ടീം അംഗങ്ങളായ ഷാഫി, രണ്ദീര്, എസ്. ശ്രീകാന്ത്, അബ്ദുള് റഹ്മാന്, എം.എം. മുഹമ്മദ്, സുനില് എന്നിവരടങ്ങിയ സംഘമാണ് പ്രതിയെ പിടികൂടിയത്.
കോടതിയില് ഹാജരാക്കിയ നൗഷാദിനെ പിന്നീട് റിമാന്റ് ചെയ്തു. വധശ്രമക്കേസ്, പോലീസിനെ ആക്രമിച്ച കേസ്, കഞ്ചാവ്, കളവ്, പിടിച്ചുപറി തുടങ്ങി കാസര്ഗോഡ് ജില്ലയില് മാത്രം ഇരുപതോളം കേസുകളില് പ്രതിയാണ് നൗഷാദെന്ന് പോലീസ് അറിയിച്ചു.
