പാരിപ്പള്ളി: അനധികൃതമായി സ്വകാര്യ മില്ലിലേക്ക് കടത്തികൊണ്ടുപോയ റേഷനരി പാരിപ്പള്ളി പോലീസ് പിടികൂടി. കൊല്ലം സിറ്റി പോലീസ് കമ്മീഷണര്ക്ക് ലഭിച്ച രഹസ്യവിവരത്തെ തുടര്ന്നാണ് നടപടി. ഒരാള് പിടിയിലായി. പാരിപ്പള്ളി കേന്ദ്രമാക്കി പ്രവര്ത്തിക്കുന്ന ജീവന് ഫുഡ് പ്രോഡക്ട്സ് എന്ന സ്ഥാപനത്തില് നിന്നാണ് 28 ചാക്ക് റേഷനരിയും 3 ചാക്ക് ഗോതമ്പും ഉള്പ്പെടെ പിടികൂടിയത്.
ഉമയനല്ലൂര് സഞ്ജു ഭവനില് സദാശിവന് പിള്ളയുടെ മകന് സാജന് (30) ആണ് പിടിയിലായത്. കൊല്ലം മുഖത്തലയിലുള്ള ഒരു റേഷന് കടയില് നിന്നാണ് ധാന്യങ്ങള് ലഭിച്ചതെന്ന് ഇയാള് സമ്മതിച്ചിട്ടുണ്ട്. ഇതിനെ തുടര്ന്ന് താലൂക്ക് റേഷനിങ് ഇന്സ്പെക്ടര് റെജിയുടെ നേതൃത്വത്തില് ഉദ്യോഗസ്ഥസംഘം എത്തി പരിശോധന നടത്തി. പൊതുവിതരണ ശൃംഖലയിലൂടെ പൊതുജനങ്ങള്ക്ക് ലഭിക്കേണ്ട അരിയും ഗോതമ്പും മറ്റും സ്വകാര്യകമ്പനികള്ക്ക് മറിച്ച് വിറ്റ് വന്ലാഭം കൊയ്യുന്ന ലോബി പ്രവര്ത്തിക്കുന്നുണ്ടെന്ന വിവരത്തിന്റെ അടിസ്ഥാനത്തില് നടത്തിയ റെയ്ഡിലാണ് പ്രതികള് പിടിയിലായത്. റേഷന് അരിയും ഗോതമ്പും തങ്ങളുടെ ഗോഡൗണുകളിലെത്തിച്ച് രൂപമാറ്റം വരുത്തി സ്വകാര്യബ്രാന്റിലാക്കി വിപണിയിലിറക്കുകയാണ് പദ്ധതി.
ചാത്തന്നൂര് എസിപി എസ്. ശിവപ്രസാദ്, സ്പെഷ്യല് ബ്രാഞ്ച് എസിപി റെക്സ് ബോബി അര്വിന്, പരവൂര് സിഐ വി.എസ് ബിജു, പാരിപ്പള്ളി എസ്ഐ എസ്.ജയകൃഷ്ണന് എന്നിവരുടെ നേതൃത്വത്തിലായിരുന്നു അറസ്റ്റ്.
