പാരീസ്: പാരീസിലെ ഭീകരാക്രമണത്തെത്തുടര്ന്ന് യൂറോപ്യന് രാജ്യങ്ങളിലെങ്ങും അതീവ സുരക്ഷയാണ് ഏര്പ്പെടുത്തിയിരിക്കുന്നത്. 129 പേരുടെ മരണത്തിനിടയാക്കിയ പാരീസിലെ ബോംബാക്രമണത്തിന് ശേഷം ബെല്ജിയവും ഹംഗറിയുമെല്ലാം അതിര്ത്തിയില് പരിശോധന ശക്തമാക്കി. അതിര്ത്തിയിലെത്തുന്ന വാഹനങ്ങളെല്ലാം സുരക്ഷാ പരിശോധനക്ക്ശേഷമാണ് കടത്തിവിടുന്നത്. പാരീസ് ആക്രമണത്തിന്റെ വെളിച്ചത്തില് അഭയാര്ത്ഥികളെക്കുറിച്ചുള്ള ചര്ച്ചകളും യൂറോപ്യന് രാജ്യങ്ങളില് ആരംഭിച്ചിട്ടുണ്ട്.
ഭീകരാക്രമണത്തില് പങ്കുണ്ടെന്ന് സംശയിക്കുന്ന മൂന്ന് പേരെ ബെല്ജിയം പോലീസ് അറസ്റ്റ് ചെയ്തു. അക്രമികള് എത്തിയ ബെല്ജിയം രജിസ്ട്രേഷനിലുള്ള കാര് കേന്ദ്രീകരിച്ചു നടന്ന അന്വേഷണത്തിലാണ് ഭീകരരെ അറസ്റ്റുചെയ്യുവാനായത്. ജര്മ്മനി ഈ മാസമാദ്യം ഒരാളെ അറസ്റ്റ് ചെയ്തിരുന്നു. ബെല്ജിയം പോലീസ് വ്യാപകമായ റെയ്ഡുകളും അറസ്റ്റുകളുമാണ് നടത്തിക്കൊണ്ടിരിക്കുന്നത്. അഭയാര്ത്ഥി മേഖലകളില് ഇസ്ലാമിക ഭീകരര്ക്ക് ബന്ധമുണ്ടാവാമെന്നാണ് കരുതപ്പെടുന്നത്. യുറോപ്യന് രാജ്യമായ ബെല്ജിയത്തില് 11 മില്യണ് ജനസംഖ്യയാണുള്ളത്. ഇതില് പകുതിയോളം മുസ്ലിങ്ങളാണ്. ആഭ്യന്തരയുദ്ധം നടക്കുന്ന സിറിയയില് വിദേശ പോരാളികളെ എത്തിച്ചതും ബെല്ജിയമാണ്.
ഇതിനിടയില് പാരീസ് ഭീകരാക്രമണത്തില് ചാവേറായി പൊട്ടിത്തെറിച്ച ഭീകരന്മാരില് ഒരാളെ തിരിച്ചറിഞ്ഞു. പാരീസ് സ്വദേശിയായ ഒമര് ഇസ്മായ്ല് മോസ്റ്റെഫയ് (29) ആണു ബറ്റാക്ലാന് സംഗീതഹാളില് ആക്രമണം നടത്തിയശേഷം പൊട്ടിത്തെറിച്ചത്. ഇയാളുടെ അച്ഛനെയും സഹോദരനെയും അന്വേഷണസംഘം കസ്റ്റഡിയിലെടുത്തതായി പാരീസ് ചീഫ് പ്രോസിക്യൂട്ടര് ഫ്രാന്സ്വാ മോളിന്സ് പറഞ്ഞു. കൊല്ലപ്പെട്ട ഒമറിന്റെപേരില് ഭീകരവാദവുമായി ബന്ധപ്പെട്ട കേസുകള് നിലവിലുണ്ടെങ്കിലും ജയില് ശിക്ഷ അനുഭവിച്ചിട്ടില്ലെന്നും അദ്ദേഹം പറഞ്ഞു. ഇയാളുമായി ബന്ധപ്പെട്ടവര്ക്കായി തെരച്ചില് തുടരുകയാണെന്ന് അന്വേഷണസംഘം അറിയിച്ചു. അതേസമയം ജര്മ്മനിയില് അഭയാര്ത്ഥികള്ക്കിടിയലേക്ക് ഭീകരര് നുഴഞ്ഞുകയറിയിട്ടുണ്ടോയെന്ന് അന്വേഷണം ആരംഭിച്ചിട്ടുണ്ട്.
പാരീസിലെ ഭീകരാക്രമണം മൂന്നു സംഘങ്ങള് പരസ്പരം ഏകോപിപ്പിച്ചു നടത്തിയ ഒന്നായിരുന്നുവെന്ന് പ്രാഥമിക അന്വേഷണത്തില് കണ്ടെത്തിയതായും പാരീസ് ചീഫ് പ്രോസിക്യൂട്ടര് അറിയിച്ചു. ഭീകരരെല്ലാം കലാഷ്നിക്കോവ് തോക്കാണ് ഉപയോഗിച്ചിരുന്നതെന്നും, ഒരേ മാതൃകയിലുള്ള സ്ഫോടകവസ്തുക്കളാണ് ഇവരുടെ കൈവശം ഉണ്ടായിരുന്നതെന്നും അന്വേഷണസംഘം അറിയിച്ചു. സംഗീതപരിപാടി നടന്ന സ്ഥലത്ത് അക്രമികള് എത്തിയ ബെല്ജിയം നമ്പര് പ്ലേറ്റുള്ള ഫോക്സ്വാഗന് പോളോ പോലീസ് കണ്ടെത്തി. ബെല്ജിയത്തില് താമസിക്കുന്ന ഒരു ഫ്രഞ്ചുകാരനാണ് ഇത് വാടകയ്ക്ക് എടുത്തതെന്ന് പോലീസ് പറഞ്ഞു.
നവംബര് 30ന് പാരീസിന്റെ പ്രാന്തനഗരത്തില് ഐക്യരാഷ്ട്രസഭ കാലാവസ്ഥാ ഉച്ചകോടി നടക്കുമോയെന്ന ചര്ച്ചകളും ആരംഭിച്ചിട്ടുണ്ട്. നിരവധി രാഷ്ട്രനേതാക്കളാണ് ഉച്ചകോടിയില് പങ്കെടുക്കുന്നത്. ഭീകരാക്രമണം ഉണ്ടായെങ്കിലും ഉച്ചകോടി മാറ്റില്ലെന്നു ഫ്രാന്സ് വ്യക്തമാക്കിയിട്ടുണ്ട്.
