അന്റാലിയ (തുര്ക്കി): ലോകത്തെ നടുക്കിയ പാരീസ് ഭീകരാക്രമണത്തിന്റെ പശ്ചാത്തലത്തില് ഇന്നലെ ആരംഭിച്ച ജി 20 ഉച്ചകോടിയില് ഭീകരവാദത്തെ ഒറ്റക്കെട്ടായി നേരിടുമെന്ന് ലോകരാജ്യങ്ങള് പ്രതിജ്ഞയെടുത്തു. ഭീകരവാദത്തെ നേരിടുകയെന്നതാവണം ജി20 യുടെ മുന്ഗണനയെന്ന് പ്രധാനമന്ത്രി നരേന്ദ്രമോദി പ്രഖ്യാപിച്ചു. തുര്ക്കിയുടെ തീരദേശ നഗരമായ അന്റാലിയയില് തുടക്കമിട്ട രണ്ടുദിവസത്തെ ഉച്ചകോടിയില് പാരീസ് ഭീകരാക്രമണം നടത്തിയവരെ വേട്ടയാടിപ്പിടിക്കാന് ഫ്രാന്സിനൊപ്പം നില്ക്കുമെന്ന് യുഎസ് പ്രസിഡന്റ് ബരാക് ഒബാമ പറഞ്ഞു. ”തലതിരിഞ്ഞ ആശയങ്ങളുടെപേരില് നിഷ്കളങ്കരായ മനുഷ്യരെ കൊന്നൊടുക്കുന്നത് ഫ്രാന്സിനും തുര്ക്കിക്കും നേര്ക്കുള്ള ആക്രമണം മാത്രമല്ല, പരിഷ്കൃത ലോകത്തിനെതിരായ ആക്രമണംതന്നെയാണ്” ഒബാമ പറഞ്ഞു.
പാരീസില് നടന്ന, മനുഷ്യത്വം മരവിച്ചുപോകുന്ന ആക്രമണത്തിനെതിരെ നാമെല്ലാവരും ഒരുമിച്ചു നില്ക്കണമെന്ന് ജി20 ഉച്ചകോടിയുടെ ഭാഗമായി നടന്ന ബ്രിക്സ് സമ്മേളനത്തില് മോദി പറഞ്ഞു. മാനവ സമൂഹം മുഴുവനും ഭീകരതയ്ക്കെതിരായ നിലപാട് സ്വീകരിക്കേണ്ടതാണ്. ഭീകരവാദത്തിനെതിരെ ലോകരാഷ്ട്രങ്ങള് മുഴുവനും ഒരുമിച്ചു ചേര്ന്നുള്ള പരിശ്രമം മുമ്പത്തേക്കാള് ആവശ്യമായ സാഹചര്യമാണുള്ളത്. പാരീസ്, ബെയ്റൂട്ട്, റഷ്യയിലെ സിനായ്, അങ്കാറ ആക്രമണങ്ങള് ഭീകരവാദം വ്യാപിക്കുകയാണെന്ന സന്ദേശമാണ് നല്കുന്നത്. ഇതിനെ ലോകരാഷ്ട്രങ്ങള് ഒരുമിച്ചു നേരിടേണ്ടതാണ്. ബ്രിക്സ് രാജ്യങ്ങളുടെ മുന്ഗണന ഇക്കാര്യത്തില് വേണമെന്നും 2016 ഫെബ്രുവരി ഒന്നുമുതല് ബ്രിക്സ് ചെയര്മാന് സ്ഥാനം ഭാരതം ഏറ്റെടുക്കുന്നതോടെ ഭീകരവാദത്തിനെതിരായ പരിശ്രമങ്ങള് ആരംഭിക്കുമെന്നും പ്രധാനമന്ത്രി പറഞ്ഞു.
ബ്രിക്സിന്റെ പ്രധാന്യം ഭാരതം തിരിച്ചറിയുന്നുണ്ട്. നമ്മുടെ അംഗരാജ്യങ്ങളുടെ ശേഷി ചോദ്യം ചെയ്യപ്പെടരുത്. ബ്രിക്സ് അംഗരാജ്യങ്ങള്ക്കായി കൂട്ടായ പ്രവര്ത്തനം ചെയ്യേണ്ടതുണ്ടെന്നും മോദി പറഞ്ഞു. റഷ്യന് പ്രസിഡന്റ് വഌഡമിന് പുടിന്, ചൈനീസ് പ്രസിഡന്റ് സീ ജിന്പിങ്, ദക്ഷിണാഫ്രിക്കന് പ്രസിഡന്റ് ജേക്കബ് സുമ, ബ്രസീല് പ്രസിഡന്റ് ദില്മ റൗസെഫ് തുടങ്ങിയവര് പങ്കെടുത്ത ബ്രിക്സ് യോഗത്തിലായിരുന്നു ഭീകരതയ്ക്കെതിരെ കൂട്ടായ പരിശ്രമം വേണമെന്ന നിര്ദ്ദേശം മോദി മുന്നോട്ടുവെച്ചത്. ആഗോള സാമ്പത്തിക-സുരക്ഷാ പ്രശ്നങ്ങളാണ് ജി20 ഉച്ചകോടി പ്രധാനമായും ചര്ച്ച ചെയ്യുകയെന്ന് പ്രധാനമന്ത്രി നരേന്ദ്രമോദി പ്രസ്താവിച്ചു. ഡിസംബറില് ജി20ന്റെ അധ്യക്ഷ സ്ഥാനം ഏറ്റെടുക്കുന്ന ചൈനയെ പ്രധാനമന്ത്രി അഭിനന്ദിച്ചു. ലോകത്തിന്റെ 85 ശതമാനം സാമ്പത്തികരംഗവും 75 ശതമാനം വ്യാപാരവും കൈകാര്യം ചെയ്യുന്ന ജി20 രാജ്യങ്ങള് ലോകജനസംഖ്യയുടെ മൂന്നില് രണ്ടിനെയും പ്രതിനിധാനം ചെയ്യുന്നതാണ്.
