കണ്ണൂര്: കുട്ടികളെ സംരക്ഷിക്കാന് ബാധ്യസ്ഥരായവര് തന്നെയാണ് പലപ്പോഴും കുട്ടികള്ക്കെതിരായ അതിക്രമങ്ങളില് പ്രതികളാകുന്നതെന്നും ഇത് തടയാന് നിയമസഹായം പ്രയോജനപ്പെടുത്തണമെന്നും അഡീ. ജില്ലാ ജഡ്ജ് വി ജയറാം പറഞ്ഞു. ശിശുദിനാഘോഷത്തിന്റെ ഭാഗമായി ജില്ലാ ചൈല്ഡ് പ്രൊട്ടക്ഷന് യൂണിറ്റും ജില്ലാ ലീഗല് സര്വീസ് അതോറിറ്റിയും സംയുക്തമായി സംഘടിപ്പിച്ച ഏകദിന നിയമബോധവല്ക്കരണ ശില്പശാല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഉന്നതമായ ആരോഗ്യവിദ്യാഭ്യാസ നിലവാരം എല്ലാ കുട്ടികള്ക്കും ലഭ്യമാക്കാനുള്ള ഭരണസംവിധാനം ഇവിടെയുണ്ട്. ഇത് നിഷേധിക്കപ്പെടാതിരിക്കാന് നിയമവ്യവസ്ഥയുടെ സഹായമുണ്ടാകും. അതിക്രമങ്ങളുണ്ടായാല് അത് യഥാസമയം ബന്ധപ്പെട്ടവരെ അറിയിക്കാന് കുട്ടികള്ക്ക് കഴിയണം. ഇതിനുള്ള സാഹചര്യമാണ് നാം ഒരുക്കിക്കൊടുക്കേണ്ടത്.
ചടങ്ങില് ബാലാവകാശ കമ്മീഷന് അംഗം അഡ്വ. കെ.കെ.നസീര് അധ്യക്ഷത വഹിച്ചു. അഡ്വ. ബിനോയ്, അഡ്വ. ബേബി ലതിക, ജില്ലാ ലീഗല് സര്വീസ് അതോറിറ്റി സെക്രട്ടറി എം.വി.ജയരാജന്, ജില്ലാ ചൈല്ഡ് പ്രൊട്ടക്ഷന് ഓഫീസര് എം.അഞ്ജു മോഹന് എന്നിവര് സംസാരിച്ചു. അഡ്വ. വിജേഷ് ബാബു, അഡ്വ. പി.കെ.രവീന്ദ്രന്, കെ.ഹരിപ്രസാദ് എന്നിവര് ക്ലാസെടുത്തു.
